Australia tus thawj pwm tsav hais tias cov tswv lagluam uas tsis xub ntiav neeg Australia ua hauj lwm ua ntej yuav raug teev zwm npe thiab yuav raug coj mus nthuav qhia rau zej tsoom paub kom lawv poob ntsej muag rau lub caij uas tsoom hwv Australia tau muab cov visa 457 tso tseg tsis siv ntxiv lawm. Yog li ces cov tswv lagluam uas tsis kub siab nrhiav kom tau neeg Australia los ua hauj lwm ua ntej tso yuav tsis muaj peev xwm ntiav tau cov neeg txawv teb chaws uas siv cov visa no tuaj ua hauj lwm ntxiv lawm raws li tsoom hwv Turnbull cov visa tshiab 2 xyoos thiab 4 xyoos uas nws yuav coj los siv txuas ntxiv ntawd. Australia tus thawj pwm tsav tseem hais ntxiv tias tsis tau paub seb yuav pub cov neeg coob npaum li cas siv los yog thov cov visa tshiab tuaj ua hauj lwm hauv Australia no li cas. Nyob ntawm seb tej lagluam xav tau cov neeg no ntau npaum li cas xwb. Vim lub hom phiaj yog xav kom yuav tsum tau los xyaum neeg Australia kom ua tau tej hauj lwm ntawd ntev ntxiv mus rau yav pem suab.
Kim Turnbull tau qhia meej tias tsoom hwv Australia tseem tab tom kub siab los kho tsab cai tswj cov neeg tsiv teb tsaws chaws no thiab nws tau ceeb toom tias nws yuav tsim tsab cai kom nruj thiab ua tib zoo txheeb xyuas tias seb tej kiab khw lagluam puas tsim nyog yuav ntiav cov neeg txawv tebchaws siv cov visa tuaj ua hauj lwm hauv tebchaws Australia tiag.
Tsis tas li los nws tseem tau qhia tias tsoom hwv tseem yuav hloov kho cov kev thov xeem los ua pej xeem Australia kom siv tau tej cai no thiab ua raws li Australia tej kab lis kev cai coj taug lawm xwb.
Thiab kim Turnbull qhia tias yuav hloov cov visa 457 rau cov neeg muaj txuj tes thiab hloov cov visa uas tej tswv lagluam ntiav cov neeg tuaj hauj lwm nyob ruaj kiag hauv tebchaws Australia uas cov tswv lagluam tos tsis hais yuav nyob hauv nroog los yog ua hauj lwm rau yaj sab tib si.
Kim Turnbull hais tias " Yuav muab cov neeg tuaj ua hauj lwm muaj hnoob nyoog 50 xyoo txo los ua 45 xyoos lawm xwb. Cov neeg yuav tuaj ua hauj lwm hauv Australia no yuav tsum paub siv thiab hais tau lus English zoo, paub ua txoj hauj lwm lawv yuav tuaj ua thiab cov neeg no yuav tsum tuaj nyob yam tsawg li 3 xyoos hauv Australia mam muaj cai thov thiab xeem ua tau pej xeem Australia tsis yog 2 xyoos li yav tas los lawm. Vim cov kev hloov rau kev xeem ua pej xeem Australia yuav pab cov hauj lwm tswj neeg tsiv teb tsaws chaws tsim tau kev sib koom npoj thiab sib raug zoo thiab pab tau txoj kev ruaj ntseg. Thiab Australia yuav tsum tos tej neeg uas yeem thiab pom zoo ua raws li Australia tej kev coj taug ua zoo thiab cov kev coj ntseeg mus rau kis zoo xwb tsis hais cov neeg ntawd yuav yog haiv neeg twg los yog coj kev caij coj ntseeg mooj kav moj coj dab tsi li."
Yog li ces Australia tus thawj pwm tsav thiaj qhia tias yuav tsis siv cov visa 457 no ntxiv lawm thiab mam li muab ib cov temperary visa class rau cov neeg siv lawm xwb.
Kim Malcolm Turnbull qhia tias yuav ntxiv 2 nqe lus ntxiv rau cov visa neeg txawv tebchaws siv tuaj ua hauj lwm hauv tebchaws Australia no. Thawj nqe ces yog yuav tsum muab cov hauj lwm no tshaj qhia los yog haub tau yauam hauv Australia no ua ntej tso yog tsis muaj neeg ua ces mam li tshaj tawm rau cov neeg txawv tebchaws tuaj ua. Nws hais txiv tias cov neeg no yuav tsum paub siv lub thiab siv ntawv English zoo thiab yuav tau txheeb xyuas tej neeg no seb lawv puas yog cov neeg ua txhaum cai dab tsi. Tsis tas li no los tsoom hwv Australia tseem cog lus tias yuav txos tsis pub muaj cov neeg txawv tebchaws tuaj ua ntau yam hauj lwm hauv Australia lawm thiab.
Kim Turnbull qhia tias cov kev pauv hloov no tsuas yog tsim coj los pab Australia tej lagluam thiab Australia cov neeg ua hauj lwm xwb.
Nws hais tias " Cov visa tshiab no yog cov yuav pab kom Australia tej lagluam muaj peev xwm nrhiav tau tej neeg txawv tebchaws muaj txuj tes paub ua hauj lwm tiag tiag los ua txoj hauj lwm uas tsis muaj neeg muaj txuj tes thiab tsis muaj peev xwm ua tau xwb tsis yog yuav siv tej visa no los ua lwm yam kom thiaj li muaj hauj lwm rau pej xeem Australia ua."
Tsoom hwv Australia hais tias muaj cov neeg txog li 95,000 tus siv cov visa 457 tuaj ua hauj lwm hauv Australia tam sim no.
Yog li Australia tus thawj pwm tsav thiaj tau tso ib tsab xo rau ib diam yeeb yaj duab qhia txog cov kev tsis siv cov visa 457 no rau hauv Facebook coj los qhia txog cov visa tshiab ua hauj lwm ib ntus uas yuav coj los siv ntawd tias:
" Australia cov neeg yuav tsum yog cov xub muaj cai nrhiav tau hauj lwm no ua ntej, yog li peb thiaj muab cov visa 457 no tso tseg tsis siv ntxiv lawm. Kom cov neeg txawv teb chaws txhob siv tau cov visa no tuaj nrhiav hauj lwm ua los yog pab kom lawv tau ras los ua pej xeem Australia ntxiv lawm. Tab sis kuj yog tej yam tseem ceeb pab kom Australia cov lagluam muaj peev xwm nrhiav tau tej neeg muaj txuj tes paub ua hauj lwm zoo los pab lawv tej lagluam kom loj hlob huam vam thiab nqes peev lagluam ntxiv. Yog li no ces peb thiaj siv cov visa tshiab uas tso cai rau cov neeg txawv tebchaws tuaj ua hauj lwm ib ntus lawm xwb kom nrhiav tau cov neeg tshaj lij muaj txuj tes thiab paub ua hauj lwm coj los pab peb haiv neeg. Yog li cov visa tshiab no thiaj yog tsim los nrhiav cov neeg uas muaj txuj tes tiag tiag uas Australia tsis muaj siv rau nws tej nroog los yog tej yaj sab uas cov neeg no yuav tau mus xeem lus English, yuav tsum tau ua dua txoj hauj lwm ntawd, thiab txheeb xyuas tej kiab khw lagluam seb Australia puas muaj neeg yuav ua tau tej hauj lwm no tso mam li ntiav lawv tuaj."
Cov tswv lagluam uas siv cov visa 457 ntiav cov neeg txawv teb chaws tuaj ua hauj lwm ib ntus hauv Australia vim lawv nrhiav tsis tau neeg los ua hauj lwm los yuav tsum tshwm nyiaj los pab xyaum ib hom hauj lwm thiab xyaum cov neeg Australia kom txawj ua ib txoj hauj lwm dab tsi ntxiv thiab.
Tom qab nom tswv Australia qhia tias yuav tsis pub cov visa 457 rau cov neeg txawv tebchaws tuaj ua hauj lwm ib ntus hauv Australia ntxiv lawm, tau ua rau cov tswv lagluam tsis txaus siab heev tab sis ho ua rau Trade Unions hais tias nom tswv yeej tsis ua tib zoo los xyuas tej hauj lwm no.
Yav dhau los ces cov neeg thov cov visa 457 tuaj ua hauj lwm hauv Australia yuav tsum paub ua txog hauj lwm yuav tuaj ua yam tsawg 2 xyoo thiab yuav tsum paub siv lus English zoo.
Yog li Peter Dutton uas yog Australia tus pwm tsav lis laj fai tswj neeg tsiv teb tsaws chaws thiaj qhia rau tsev nthuav xov xwm ABC tias, lub hom phiaj yog yuav tau xub los xyuas kom pej xeem Australian xub nrhiav tau hauj lwm ua ua ntej tshaj plaws.
Tab sis Scott Ludlam uas yog ib tug nom kis xeev (Senator) ntawm pab nom Greens tau qhia rau tsev nthuav xov xwm Sky News tias tsuas yog ib cov tswv yim hlub tsuas pov puag haiv siv coj los xyuas tej teeb meem no thaum tsoom hwv Australia ntsib tej teeb meem uas nws daws tsis tau xwb.
Kim Ludlam hais tias " Vim tsis hais lub caij twg uas tus tsoom hwv no raug teeb meem feem ntau, ces nws yeej siv tej tswv yim pov puag thiab hlub haiv uas yeej txawv Australia tej kab li kev cai kev coj taug zoo. Yog li ces kuv thiaj ntseeg tias Australia tus thawj pwm tsav yeej tau ua yuam kev rau Australian values uas yog Australia tej kev coj tau zoo lawm. Tsis yog lub tswv yim yuav los xeem cov neeg xav thov ua pej xeem Australia xwb tab sis tseem yog tej kev nws tsim teeb meem rau cov neeg tsis muaj peev xwm pab tau lawv tus kheej uas xav tuaj nyob rau hauv lub tebchaws no thiab tseem muaj feem cuam tshuam txog haiv neeg no txoj kev ruaj ntseg thiab. Yog li kuv thiaj xav tias nws siv tej lus muaj ntsiab lus tob tob no coj los teev theev txog tej hauj lwm no xwb."
Dr Michael Gannon uas yog tus coj Australia lub koom haum tswj kev noj qab haus huv thiab kho mob tau qhia rau tsev nthuav xov xwm Sky News tias xav kom cov kev pauv hloov tshiab no txhob muaj teeb meem dab tsi rau Australia cov kiab khw ntiav tej dagzog uas ua hauj lwm tswj kev noj qab haus huv no kom nws muaj cib fim ntiav tau cov neeg txawv teb chaws tuaj ua hauj lwm hauv Australia no thiab.
Nws hais tias " Ntau xyoo tsis ntev los no peb yeej pom muaj kev nqes peev lagluam ntau heev txhawb nqa tej tub kawm kawm los tswj kev noj qab haus huv thiab kho mob thiab lwm yam hauj lwm cuam tshuam txog fab kev noj qab haus huv. Yog li peb thiaj xav kom lis tau tej hauj lwm no yooj yim me ntsi yog tham txog tej hauj lwm yuav siv tej txuj ci uas peb nrhiav tsis tau ntawd kom peb muaj peev xwm ntiav tau cov neeg txawv tebchaws tuaj pab."
Yog li lub tuam chav lis laj fai tswj neeg tsiv teb tsaws chaw thiaj qhia tias nws yuav pib siv cov visa tshiab no txij lub 3 hlis ntuj xyoo tshiab ntxiv no mus lawm.
Tab sis pab nom opposition (Labor) ntawm teb chaws Australia hais tias tsuas yog ib co laj fai kum xeeb uas Australia tus thawj pwm tsav siv coj los pab nws kom nws ua tau tswj tau nws txoj hauj lwm txuas ntxiv xwb. Ed Husic uas yog pab nom Labor tus pwm tsav lis laj fai ntiav dag zog hais tias tsis yog ib cov kev hloov kho tseem ceeb dab tsi.
Nws hais tias " Peb yeej tau hais los ntev lawm tias yuav tau los xyuas tej cai kom txhob muaj neeg siv kom lawv tau txais txiaj ntsim, peb yuav tau kho peb tej kiab khw lagluam ntiav dagzog thiab los nrog txheeb xyuas thiab pab neeg Australia kom tau hauj lwm ua. Kom lawv muaj kev cia siab tso siab thiab ntseeg Australia cov kev ntiav dag zog, kom nrhiav tau hauj lwm ua rau lub caij uas tseem muaj neeg poob hauj lwm coob heev no tab sis tseem khwv tau nyiaj tsawg li qub xwb. Yog li peb thiaj xav tias peb mam xyuas tej xov xwm kom ntxaws seb yog li cas tiag. Vim zoo li tseem yog ib cov tswv yim pom zemzuag xwb tsis tau yog cov tswv yim tseeb tiag yuav coj los daws tej teeb meem li zej tsoom xav."
Thaum xub ces Bill Shorten uas yog tus coj ntawm pab nom Labor Party yeej tau qhia tias tsuas yog Malcolm Turnbull ua li no kom nws pab tau nws tus kheej xwb.
Pab nom Greens los kuj tau hais tias Australia tus thawj pwm tsav cov kev pauv hloov no yog ib cov kev faib cai ntxub ntxaug tsis nyiam lwm haiv neeg thiab tsuas muab cov visa no lub npe hloov kom txawv lawm xwb.
Sarah Hanson Young tau sau ib co lus hauv social media tias zoo li tsoom hwv tsuas rov qab los txhawb nqa kom muaj kev faib cai ntxub ntxaug lwm haiv neeg dua thiab tsis yog ib cov cai coj los txhawb nqa kom tsim tau hauj lwm rau Australia tej hluas ua tiag tiag.
Tab sis Senator Cory Bernadi uas yog ib tug nom tawm tsam nrog nws pab nom Liberal Party dhau los tau sau ntawv rau hauv twitter tias nws zoo siab heev rau cov kev pauv hloov tshiab no, tab sis yeej yuav tsim tsis tau tsab cai no los siv yog tsis muaj feem koom los ntawm nws pab nom Australian Concersvertive.
Ms. Pauline Hanson uas yog tus coj ntawm pab nom One Nation los kuj hais tias tsoom hwv tsis kub siab los daws tej teeb meem cuam tshuam nrog cov hauj lwm tsiv teb tsaws chaw tiag thiab tsuas npaj los txwv tsis pub siv cov visa 457 vim nws pab nom One Nation thiab zej tsoom sawv daws yeej paub qhov tseeb tias yog li cas tiag lawm.
Joe Caputo uas yog tus coj ntawm Lub koom haum lis laj fai pab rau cov pab pawg neeg me ntawm tej neeg zejzog los kuj tsis pom zoo nrog tsoom hwv cov kev pauv hloov nws cov visa no thiab nws yeej yuav los tawm tsam nrog tsoom hwv.
Kim Caputo hais tias " Peb yuav tsis pom zoo nrog cov visa tshiab no vim tseem yog ib cov hauj lwm tshiab ces peb mam soj ntsuam txuas ntxiv rau ntau plua ntau limpiam los yog ntau hli ntxiv no seb yog li cas tiag"
Txawm yog li ntawd los tsoom hwv Turnbull kuj tau coj ib cov zauv teev txog cov neeg thov thiab siv visa 457 tuaj ua hauj lwm hauv tebchaws Australia no tias muaj neeg siv cov visa no tuaj ua hauj lwm tsawg txog 1 feem 3 rau tsaib no lawm thiab.
Scotty Ryan uas yog tus pwm tsav Special Minister of State tau qhia rau tsev nthuav xov xwm Sky News tias yog tej yam txawv yog piv rau tus tsoom hwv Labor lub caij Bill Shorten tseem yog tus pwm tsav lis laj fai ntiav dag zog rau lub 12 hlis ntuj xyoo 2011 mus txog rau lub 7 hli ntuj xyoo 2013 ntawd.
Kim Ryan hais tias " Nws tsuas tsim tej hauj lwm ua rau sawv daws tu siab no thiab ua kom tej neeg ntshai tias tsam cov neeg txawv tebchaws tuaj txeeb neeg Australia tej hauj lwm ua xwb. Tab sis raws li tau teev zwm tej hauj lwm nws ua lawm ces yeej sib cov nyom nrog tej lus nws hais ntawd thiab tej neeg yuav los txheeb xyuas kom nws qhia qhov tseeb rau sawvdaws paub. Vim rau qhov yog tej yam tseem ceeb heev rau tej laj fai kum xeeb no tias peb yuav tsum tau los txheeb xyuas qhov tseeb tias txog nom tswv tej lus uas hais siav tseg kom sawv daws paub zoo tias yog li cas."
Ntxiv ntawv los pab nom Labor tus nom Matt Thistlewaithe los yeej hais tias tsis yog pab nom Liberal Party yog tus pab kom muaj cov neeg siv cov visa no tsawg tab sis yog pab nom Labor tej cai muaj feem pab xwb.
Kim Thistlewaithe hais tias " Thawj nqe pab kom muaj kev pauv hloov los twb vim yog pab lom Labor cov kev txheeb xyuas tej kev ntiav dab zog seb puas tsim nyog ua ntej yuav ntiav cov neeg txawv tebchaws uas siv cov visa 457 tuaj ua hauj lwm. Yog li no ces thiaj ua rau muaj kev hloov cai los tswj tej hauj lwm no thiab thiaj muaj neeg tsawg lawm. Thiab ho tsis muaj neeg nrhiav tau hauj lwm ua ntau lawm thiab ces thiaj muaj cov neeg no tsawg txij lub caij ntawd los txog rau lub caij tus tsoom hwv Turnbull tswj hwm lawm. Yog li qhov tseeb tiag ces yeej yog Bill Shorten yog tus tau los xyuas thiaj tau muaj cov neeg no tsawg lawm xwb."
Tab sis raws li cov kws paub zoo txog fab kev tsiv teb tsaws chaw tau qhia ces tam sim no cov neeg siv cov visa 457 ua hauj lwm hauv Australia no txog 95,000 tus tab sis tsoom hwv cov kev tsis siv cov visa 457 no tau ua rau muaj ib txhia neeg uas tseem thov visa yuav tuaj ua hauj lwm hauv Australia thiab tej lagluam txhawj xeeb tsis pom qab yuav ua li cas.
Bill Shorten hais tias xyov tsoom hwv tebchaws lub tswv yim los daws cov teeb meem 457 visa no siv puas tau hauj lwm zoo. Nws tau nrog ABC Lateline program tham tias muaj cov neeg siv visa 457 txog 9 tug ntawm 10 tus twg yuav tsis muaj teeb meem dab tsi thiab tej tuam txhab lagluam los tseem muaj peev xwm ntiav tau cov neeg txawv teb chaws tuaj ua hauj lwm raws li cov kev sib khom pom zoo lagluam ywj pheej tau muaj nrog lwm lub tebchaws. Vim muaj cov neeg no txog 92% tseem ua cov hauj lwm uas lawv muaj peev xwm siv tau tej visa ua hauj lwm txuas ntxiv rau yav pem suab thiab yeej muaj cov neeg no txog li 77% tam sim tsis raug txheeb xyuas tias seb puas muaj neeg Australia mus nrhiav tej hauj lwm lawv ua ntawd ua ntej mam pub rau lawv ua li.
Kev sib tw ntawm Hmong Australia Easter Soccer 2017 ntawm Cairns no pab twg yuav yeej thiab muaj kev pauv hloov dab tsi:
Cov tebchaws twg rau txim tuag rau nws tej pej xeem ntau tshaj plaws?
READ MORE
Cov kev rau txim tuag
Thaum twg mam kho tau cov kab mob Parkinson zoo tu qab?
Thiab mloog tau ntau yam xov xwm ntawm xov tooj cua SBS Radio Hmong Program ntawm:
Digital TV tshooj 38
Downlaod SBS Radio App ntawm Google Play thiab App Store tso rau koj lub smartphone ces mloog tau rau hnub Thursday 6pm thiab Sunday 11am.
Xa messenger tuaj rau SBSHmong facebook los yog 042 999 6263
Hu xov tooj tuaj nrog SBS Radio Hmong Program tham tau ntawm +61 3 9949 2259.
Thiab mloog tau raws li cov Radio freguencies ntawm Australia ccov nroog li hauv qab no tau:
HOBART 105.7FM
MELBOURNE 93.1FM OR 1224 AM
CANBERRA 105.5FM OR 1440 AM
SYDNEY 97.7FM or 1107 AM
BRISBANE 93.3 FM
CAIRNS 90.5 FM
SBS Radio Hmong Program.
