Ntsiab lus:
- Tsoom fwv teb chaws Australia tej cai yuav txwv tsis pub tsim tej data centres ze ntawm tej vaj tse thiab tej teej kawm.
- Tab sis tej neeg zos uas nyob ze tej chaw no hais tias twb tau ua rau tsis muaj neeg kub siab txog lawv lawm thiab zoo li lawv tsis muaj fwj chim ua tau dab tsi li.
Thaum uas Sean Brown tau mus nyob rau ntawm West Footscray ob xyoos dhau los, ces tau ntau hnub tsis ntev tom qab ntawd txawm yug tau nws tus tub, nws tau xav tias yog ib lub zos zoo rau nws npaj nws lub neej — vim muaj tej xyoob ntoo ntsuab xiab, muaj ib lub chaw caij tsheb ciav hlau nyob ze, thiab tseem tshuav chaw rau zejzog loj hlob tuaj ntxiv.
Tab sis tam sim no ces twb tua ua ib lub data centre loj tshaj plaws ntawm teb chaws no uas tsuas nrug ntawm nws tsev 300 metre xwb.
"Yog ib lub tsev loj heev tsaus nti uas nyob kiag hauv plawv zos. Zoo li yeej pom tias yog ib lub tsev uas loj, hnyav tuab thiab yeej pom nyob ntawd kiag lawm," raws li Brown qhia rau SBS News.
Nws hais tias lub NextDC's M3 data centre ntawm Melbourne lub zos no tau ua rau muaj tej suab ntxhe txhe txawm tias nyob nrug 100 metres, rau lub caij uas tseem tab tom tshim lub chaw no, ces thiaj pom tej teeb ci ntsa, hnov tej suab nrov thiab ua rau muaj kev cuam tshuam ntau yam.
Yeej tsis muaj tej chaw nres tsheb txaus rau tej neeg siv, tsis hais tej neeg ua hauj lwm uas sib tw seb puas tau ib qho chaw nres tsheb ntawm tej kev, thiab Brown hais tias tag nrog tej kev ces yeej tsis tau hluav taws xob siv ntau hnub rau ib zaug twg rau lub caij tseem tab tom tsim cov hauv paus txhim kho no, tsis tas li ntawd los tsuas muaj cov kev ceeb toom tsawg tsawg xwb thiab yeej tsis muaj nyiaj paj tshab them rau tej neeg zejzog dab tsi li. Tsis tas li ntawd los nws kuj txhawj xeeb tsam tsis tau txais kev noj qab nyob zoo thiab lub neej pem suab ntawm tag nrho lub zos no.
Branded by its chief executive, Craig Scroggie uas yog tus coj ceg lagluam no uas tswj 'Australia lub AI factory loj tshaj plaws', ntawm thaj chaw M3 yuav yog ib lub centre uas loj tuaj ntxiv txog ob npaug txog xyoo 2027 — uas yuav kuav chaw dav txog 10 hectares, thiab yuav siv hluav taws xob txog 225MW thiab yuav ua hauj lwm 24 teev ib hnub twg.
Tsis tas li ntawd los kuj tseem yuav tsim ib lub ntxiv uas yog lub hu ua Perri Melbourne Data Centre (PMDC), uas twb tau txais kev tso cai pom zoo ua thiab tau npaj yuav tsa nrug mus deb txog li ntawm ob peb blocks xwb thiab.
Tam sim no ces muaj 162 lub data centres uas tseem tab tom siv thoob Australia no, thiab tseem xav thov tsim 90 lub ntxiv raws li lub koom haum Climate Council qhia — thiab kuj tsis paub tseeb tias xyov puas yuav siv tej cai tswj cov kev tsim vaj tse rau zejzog nyob los tswj cov kev tsim tej chaw data centres no li thiab.
Tsoom fwv cov kev tswj tej data centres uas xav tsim tshiab nruj tuaj ntxiv
Thawj pwm tsav Anthony Albanese thiaj tau hais ib cov lus thaum nws tau mus koom plua hmo ntawm lub koom txoos Business Council of Australia uas muaj ib xyoos ib zaug rau hmo zwj Quag (Tuesday) coj los qhia txog ib co cai tshiab uas yuav los txwv tsis pub tsim cov data centres ze tej vaj tse, tej teej kawm thiab tej av cog qoob loo.
Tej neeg uas xav tsim tej chaw no yuav raug hais kom yuav tsum tsim tej chaw uas siv tej renewable energy coj los pab Australia tej chaw tsim hluav taws xob siv tsis yog pheej yuav siv tej uas muaj siv tam sim no xwb, yuav tau los nrog xyuas kom siv dej kom tsawg npaum li tsawg tau, thiab ua tib zoo xyuas kom xaiv tau tej chaw kom haum thiab tsim nyog tsim tej chaw tshiab no — thiab lug tsis txhob tsim rau tej chaw uas yuav sim los tsim vaj tse ua zejzog nyob.
Albanese hais tias ''Australia yeej muaj peev xwm xyuas kom muaj cov kev xav nqes peev los tsim tej data centres no, tab sis yuav tsum xyuas kom txaus siab lees txhais thiab txhawb nqa los ntawm tej zejzog."
"Txhais tias yuav tsum ua tib zoo xyuas kom tej nqe hluav taws xob tsis txhob kim tuaj ntxiv, uas tib zoo txheeb kom tau txais kev ruaj ntseg rau cov kev siv dej thiab tswj tej chaw ntawd raws li qhov tsim nyog tswj."
Thaum tau nug txog tias tej zejzog twg tab tom ua lub neej nyob nrog tej data centres no lawm, ces Albanese kuj tsis teb ib co lus teb ncaj nqa thaum ABC Perth tau nug nws rau hnub zwj Quag (Tuesday), tab sis nws tsuas hais tias yeej yuav tau ua tib zoo xyuas kom tau txais kev pom zoo thiab txhawb nqa ntawm zejzog thiab xwb.
Thaum SBS News tau nug tias seb puas muaj ib co cai twg yuav los tswj tej data centres uas muaj siv tam sim no los yog muaj ib co cai yuav los siv daws zej tsoom cov kev txhawj xeeb, vim tias zoo li tej cai tshiab tseem tsis tau pov puag tej neeg uas twb tau raug teeb meem lawm, ces thawj pwm tsav lub tuam chav tsis kam tawm tswv yim dab tsi.
Muaj cov kev sib tu ncua loj heev
Txawm tias Chris Brown zoo siab rau cov kev pauv hloov tej ntsiab cai no, los nws hais tias yeej tseem pab tsis tau tej neeg ua lub neej nyob uas tab tom ntsib tej teeb meem ntau yam.
Brown tau hais tias "Yog tej cai no twb tsis daws tej teeb meem uas tau tshwm sim ntawm West Footscray no ces yuav muaj qab ntxhiab dab tsi? Twb tsis muaj leej twg kub siab txog peb lub zos no. Vim li cas peb tej me nyuam thiaj yog cov pheej yuav raug tej teeb meem no mas?''
Nws yeej tsis ntseeg tias tej data centres ntawd yuav tau txais kev tso cai tsim raws li tsoom fwv tej cai tshiab li, thiab hais tias tej cai no yuav tsum yog cov siv tau nthuav dav coj los tswj tej data centres uas tseem xav tsim kom loj nthuav dav tuaj ntxiv no thiab tsis yog pheej yuav los tswj cov kev tsim tej data centres tshiab xwb.
"Yog tias pheej tseem cia tej chaw uas tej data centres no tau mus tsim rau yam tsis tsim nyog tsim lawm pheej cia lawv los pov puag lawv tus kheej xav ces, yeej tsis ncaj li?''
Associate Professor Dr Ehsan Noroozinejad ces kuj yog ib tug kws teeb txheeb ntawm lub chaw teeb txheeb Urban Transformations Research Centre ntawm tsev kawm qib siab Western Sydney University yeej zoo siab rau tsoom fev tej kev pauv hloov no tab sis kuj tau hais tias tseem muaj cov kev sib tu ncua rau tej cai no li qub thiab.
Nws tau qhia rau SBS News tias "Tej cai uas xav thov tsim coj los siv ces tsuas yog tswj cov kev txhim kho rau yav pem suab xwb, ces thiaj yuav tsis cia li muaj peev xwm los daws tau ntau yam kev txhawj xeeb txog tej data centres uas muaj siv tam sim no,"
"Tej zejzog ces tab tom ua lub neej nyob nrog tej kev muaj tej data centres nyob ze, yog li thiaj yuav tsum xyuas kom muaj tej cai zoo los tswj tej suab nrov, cov kev siv dej, thiab cov kev taws tshuab tsim hluav taws xob siv lub caij hluav taws xob tuag, tswj tej tsheb thiab kev tsheb, tswj tej teeb meem yuav muaj rau cov kev siv hluav taws xob thiab yuav tsum txhawb nqa kom muaj cov kev txheeb xyuas kom paub qhov tseeb tias yog li cas tiag."
Noroozinejad tau hais tias Australia yeej tseem xav tau tej data centres, tab sis yuav muaj teeb meem tshwm sim tuaj yog tias tsis tsim rau tej chaw tsim nyog tsim thiab tsis muaj tej hauv paus txhim kho tsim nyog los pab.
Nws tau hais tias "Yog tej yam tseem ceeb uas tsis txhob lam tau lam xav tias txhua lub data centres tsim tib co teeb meem zoo tib yam. Yuav tsum tau txheeb qhov tseeb seb lawv ua li cas tiag, txheeb tej chaw, thiab txheeb tias seb puas yog lawv ua rau tej zejzog ib puag ncig yuav tau ris tej nqe ntau yam."
Dr Michael Vardon ntawm lub tuam chav Fenner School of Environment and Society ntawm tsev kawm qib siab Australian National University hais tias qhov uas muaj teeb meem tob tshaj ntawd ces yog cov kev los tswj tej txheej txheem thiab tej cai: vim rau qhov zoo li tej zejzog yeej tsis muaj feem xyuam tawm tswv yim dab tsi ua ntej uas yuav tso cai pom zoo tsim ib lub data centre twg li.
Vordon qhia rau SBS News tias ''Tej no ces yog tej data centres tshiab no pheej ua, thiab tej cai uas pheej ua rau muaj teeb meem no los twb vim tsis ua tib zoo rov qab los ua tib zoo txheeb tej tau ua dhau los,"
"Pheej xub tso cai pom zoo tsim ua ntej, ces tej zejzog mam li paub txog tom qab xwb, thiab txog thaum ntawd ces tsoom fwv ua tsis tau dab tsi lawm tsuas nyob rau ntawm seb tej cai ntawd ho yuav tswj tias kom tej chaw ntawd yuav tsum tau ua li cas lawm xwb."
Olivia Shen ces yog tus coj uas tswj cov strategic technologies program nrog lub chaw teeb txheeb United States Studies Centre ntawm tsev kawm qib siab University of Sydney hais tias ntau yam tseem ceeb uas yuav pab kom muaj cov kev pauv hloov no ces yuav tsum tau txheeb txog seb tej cai no puas tswj cov kev tsim kom tej data centres uas twb ua tau tam sim no siv puas pub tsim kom loj tuaj ntxiv thiab yuav tswj tej data centres tshiab no li cas xwb.
Shen qhia rau SBS News tias "Yeej muaj ntau cov data centres tau raug tsim coj los siv tau ntau caum xyoo ntawm Australia no lawm, feem ntau mas tej zejzog ib puag ncig tej chaw no yeej tsis ras txog tias muaj tej chaw no. Txawm li cas los yog tias tseem tso cai rau tej chaw uas muaj siv tam sim no tsim kom loj tuaj ntxiv rau tej chaw ua vaj tse, tej teej kawm, tej chaw ua liaj ua teb thiab, ces tsoom fwv tej cai no yog tej uas tseem tsis tau yog ib tsab cai ntxaws uas siv tau zoo thiab."
'Peb tsis muaj fwj chim ua tau ib yam dab tsi li'
Kendal Coombs kuj yog ib tug neeg ntawm zos West Footscray ntxiv uas tau yuav ib lub tsev plaub (4) xyoos dhau los thiab nws lub tsev tsuas nyob nrug 200 metres ntawm lub data centre M3 no xwb, thaum uas thaj chaw no tseem tsis tau ua tsev rau.
Nws tau hais tias thaum xub ces nom tswv zos tau qhia rau nws tias thaj chaw no yuav raug tsim ua ''business park'', tab sis tau ntau hli tom qab uas nws tau tsiv los nyob ces nws mam ras txog tias thaj chaw ntawd yuav raug siv tsim ib lub data centre — uas thaum xub mas yeej tsis txaus txhawj dab tsi txog rau thaum uas pom tias zoo li lub chaw no raug tsim loj zuj zus tuaj lawm.
Coombs hais tias "Tag nrho peb sawv daws yeej chim heev thiab txhawj xeeb heev tab sis kuj tsis paub tias xyov yuav ua li cas, vim peb mloog tau tias zoo li peb tsis muaj fwj chim yuav ua tau dab tsi li,"
"Tej projects no txov peb tej zejzog. Yog tias lawv tseem tab tom txiav txim tias [yav pem suab tsis pub tsim tej data centres nyob ze tej vaj tse thiab tej teej kawm] vim yuav tsis tau txais kev nyab xeeb los yog yuav raug kev phom sij ua rau peb tsis tau txais kev noj qab nyob zoo yog peb nyob ze, ces lawv yuav tsum them nyiaj paj tshab pauj rau tej teeb meem ua raug rau tej neeg zejzog."
Brown hais tias tej chaw no twb tau ua rau nyuaj heev uas yuav muag tej vaj tse no thiab cov kev tsiv tawm lawm.
"Yeej muaj tej neeg ntawm no coob heev uas ua chim kawg nkaug rau tej teeb meem uas tab tom muaj rau lawv tej nqe tsev — vim kuv yej paub tseeb tias tias yeej tsis muaj leej twg xav nyob ze ib lub data centre twg li. Kuv yeej tsis xav yuav lub tsev ntawd."
Nws los yeej txhawb nqa kom yuav tsum them nyiaj paj tshaj pauj: tsis hais kom lub tuam txhab ntawd yuav lawv tej tsev raws li tej nqe tsev uas kiab khw muag rau tej neeg uas tsis xav nyob ze ntawm lub chaw ntawd, los yog kom pab them tej nqe tsiv tsev rau tej tswv tsev los yog tej neeg ntiav tsev nyob ntawm lub zos ntawd thiab them nyiaj rau tej neeg uas twg tau raug kev cuam tshuam los ntev lawm.
Brown hais tias NextDC yeej tsis teb dab tsi txog tej no, thiab hais tias tsim nyog tsoom fwv raus tes pab.
Ces Noroozinejad thiab Vardon hais tias yuav tsum xyuas kom qhia qhov tseeg thiab muaj cov kev cej luam txog tej data centres uas muaj siv tam sim no ntawm tej zejzog — hais tsi ntsees txog tej xov xwm txog cov kev siv dej, siv hluav taws xob, tej suab nrov (tej teeb meem plua plav, cua tsis huv, tej paug tsuas rau tej ib puag ncig, thiab tej teeb meem tsim lub chaw ntawd etc), thiab tej neeg tuaj nruab nrab cov kev muaj peev xwm txheeb tau tej data centres kom lawv ua tib zoo tswj lawv tej chaw thiab ua raws cai, tsis tas li no los yuav tau teev txog ntau yam xwm txheej cuam tshuam txog lub koom haum no tias muaj teeb meem dab tsi thiab yuav daws li cas.
Noroozinejad tau hais tias tej tswv yim li txo kom muaj tej suab nrov toog ntsej tsawg zog, cov kev kho kom lub zos zoo nkauj, cov kev twj tej kev tsheb thiab tej tsheb kom siv tau raws li qhov tsim nyog siv thiab tau txais kev nyab xeeb, thiab tsis txhob pub sim siv tej tshuab (siv roj diesel) los tsim hluav taws xob siv kuj yog tej yam yuav muaj peev xwm pab tau thiab.
Tab sis yog tham rau Brown lawm ces tej zaum ntshe tej zaum lig dhau heev lawm.
Nws hais tias "Lawv twb tau ua rau muaj teeb meem phem tshaj qub ntxiv rau lub zos no tam sim nod lawm. Thiab zoo li peb tab tom pom tias zoo li lub zos no ces tau raug kev puas tsuaj loj heev thiab raug txov lawm."
Txawm li cas los NextDC tsis kam tawm tswv yim dab tsi.
Mloog tau xov xwm tshiab ntawm SBS Hmong, download SBS Adio app, caum SBS Hmong ntawm Facebook,mloog tau Youtube, Spotify, Podfollow, iHeart Radio, Google Podcast thiab Apple Podcast.
