The citizenship ceremony los yog lub koom txoos zoo siab txais tos cov neeg tsiv teb tshaws chaw lees ua pej xeem Australia yog cov txheej txheem theem kawg uas ib tug neeg twg tau los txiav haiv ua neeg Australia lawm. Yog thaum nom tswv pom zoo muab daim ntawv pov thawj ua pej xeem Australia rau koj lawm ces koj yuav tsum tau mus koom lub koob tsheej txais daim ntawv pov thawj no thiab los lees thiab cog lus ua pej xeem Australia.
Tej yam tsim nyog koj paub:
Yuav muaj lub koom txoos tos txais ntawv pov thawj thiab ua kev zoo siab lees ua pej xeem Australia no ntawm koj tus nom tswv zos (Local council) li ntawm lub sij hawj 6 hli tom qab uas nom tswv tso cai rau koj ua tau pej xeem Australia lawm. Koj tus nom zos los sis lub tuam chav Department of Home Affairs yuav xa ib tsab ntawv tuaj caw kom koj mus koom. Thiab yog koj tsis mus koom lub koom txoos no li ntawm 1 lub xyoos (12 hlis) thiab ho tsis muaj laj thawj zoo txaus qhia rau lawv tias vim li cas koj thiaj koom tsis tau ces tej zaum nom tswv yuav los txheeb xyuas koj tej ntaub ntawv thiab muab koj khij tawm lawm.
Yuav npaj li cas:
Koj muaj peev xwm caw tau koj tsev neeg thiab koj tej phooj ywg mus nrog koj koom lub koom txoos no tau, tab sis tsis pub koj coj ntau tus neeg xwb, thiab nom tswv yeej qhia tias pub koj coj pes tsawg leej nrog koj xwb. Koj yuav tau xyuas kom muaj neeg nrog saib xyuas koj tej me nyuam thiab tsam ho tsis tau zaum ua ke. Tsis tas li no los tej qhua koj coj nrog koj yeej muaj cai yees tau duab rau lub caij tseem ua lub koob tsheej no thiab.
Yog tias koj xav tau kev pab cuam ib yam dab tsi tsi ntseeg ces koj yuav tsum tau qhia rau lub tuam chav tswj pej xeem Department of Home Affairs uas yog lub tuam chav uas teev zem pej xeem, tias sib yuav, yug tshiab, tas sim neej thiab tsim cov ntaub ntawv cim thawj (Identity documents) nrog rau passports rau tej pej xeem siv paub rau lub caij koj yuav mus koom lub koob tsheej no los yog hua rau lub chaw qhia tej xov xwm txog cov kev ua pej xeem tus zauv xov tooj 131 880 tau.
Koj yuav tsum tau nqa daim ntawv nom tswv caw koj thiab nqa ib daim ntawm cim thawj dab tsi uas muaj koj daim duab qhia tias yog koj li daim ntawv tsav tsheb los yog passport nrog koj.
Koj hnav khaub ncaws li cas los tau tab sis lub tuam chav Department of Home Affairs yeej xav kom koj hnav du dai thiab mus txog li 30 ntiag tiv ua ntej yuav pib lub koob tsheej thiaj muaj caij txaus los teev zwm koj npe.
Prime Minister Malcolm Turnbull poses for a photo with new Australian citizens at an Australia Day Citizenship Ceremony in Canberra, Thursday, Jan. 26, 2017. Source: AAP
Hais txog tej kab ke kev li kev cai ntawm lub koob tsheej:
Tsuas siv sij hawm li 1-2 teev xwb ua lub koob tsheej no tiav lawm. Yuav xub pib muaj cov kev qhib thiab taw qhia txog lub koob tsheej no thiab muaj qhua tswj xeeb los hais lus ua ntej cov neeg yuav los hais lus cog lus lees tias yuav ua ib tug pej xeem zoo rau teb chaws Australia.
Ces mam li muaj ib tug neeg lis cov hauj lwm no hais koj koj nyeem los yog hais 2 sob lus cog lus tseg two versions of the Pledge, uas koj xaiv seb yuav cog lus rau tswv ntuj los tsis hais. Thiab hais raws li daim ntawv cog lus uas koj xaiv cov lus ntawd.
Damien Kilner uas yog ib tug neeg ua hauj lwm tswj tej dej num xyuas tej cuab yig thiab kev ua pej xeem (Family and Citizenship Programme) hais tias “Cov kev cog lus tseg no yeej yog ib feem ntawm cov txheej txheem zaum kawg qhia tau tias koj yeej kub siab thiab xav ras los lees ua ib tug pej xeem Australia tiag tiag lawm."
“Thiab nom tswv yeej tau hais kom tej neeg yuav tau los cog lus thiab lees tias yuav ua ib tug pej xeem zoo ua siab dawb dawb ncaj rau lub teb chaws Australia thiab los lees paub lub luag hauj lwm thiab tej txiaj ntsim yuav tau txais thaum tau ras los ua ib tug pej xeem Australia no lawm uas yuav kub siab los nrog txhim teb kho chaw ntawm lub teb chaws no."
Yog thaum koj tau cog lus tag lawm ces koj yog ib tug pej xeem Australia tiag lawm. Ces mam li nqua teb chaws Australia zaj nkauj haiv rau thaum xaus lub koob tsheej ua kev zoo siab tos txais thiab lees ua pej xeem Australia no lawm xwb.
Ces koj yuav tau txais ib daim ntawv ua pej xeem Australia, thiab xav kom koj ua tib zoo xyuas kom txhua yam xov xwm teev zwm rau hauv raug raws li qhov tseeb thiab muab khaw cia kom zoo chaw vim koj yuav tau siv daim ntawv no mus thov thiaj yuav ua tau Australia cov passport rau koj siv rau yav pem suab.
An Australian citizenship recipient holds his certificate during a citizenship ceremony on Australia Day. Source: AAP
Tom qab lub koom txoos no tiav lawm:
Ces mam li muaj caij los yees duab thiab noj khoom txom ncauj hauj dej ua kev lom zem me ntsis ntxiv. Muaj qee zaus ces koj kuj yuav tau tej yam khoom plig me me los ntawm cov neeg tswj lub koob tsheej no thiab piv txwv li tau tej xyoo ntoo uas yeej xeeb txawm muaj nyob rau lub teb chaws Australia no.
Yog li koj yuav muaj cib fim thiab yuav raug ntxiv npe mus xaiv nom kom koj muaj cai xaiv tsa nom tswv tau rau zaum yuav muaj txuas ntxiv no. Thiab txhua tus uas yog pej xeem Australia yuav tsum tau mus pov ntawv xaiv tsa nom tswv tsis pub yeb los yog txhob txwm lug hla tsis xaiv nom uas tej zaum koj kuj yuav raug nplua kom them nyiaj thiab yog tsis muaj laj thawj zoo txaus. Ces koj muaj cai teev zwm npe kiag ntawm lub koob tsheej no los yog nqa cov ntaub ntawv teev zwm npe pov ntawv xaiv tsa mus sau tom tsev mam li xa rau nom tswv tom qab los tau.
Thiab koj muaj cai mus thov tau Australia cov passport los siv lawm. Yog koj xav tau xov xwm kom ntxaws ntxiv ces nyem qhov no here.
Mark Alcorn of Ireland celebrates receiving his Australian citizenship at a citizenship ceremony on Australia Day in Brisbane Source: AAP
Useful information
Citizenship Information Line: 131 880 Between 8.30am and 4.30pm Monday to Friday
