Cov neeg paub thiab txawj ua hauj lwm nyob txawv teb chaws uas yog tias kam mus nyob tej zos yaj sab thiab cheeb tsam ze nroog loj ces tsoom hwv Australia yuav kub siab los nrog xyuas kom lawv tau visa sai tuaj ua hauj lwm hauv teb chaws Australia no raws li tsoom hwv tau qhia txog nws cov nyiaj $19.4 roob (million) coj los pab cov hauj lwm no rau hnub zwj Kuab (Friday) tim 8.2.2019 no.
Australia tus pwm tsav lis laj fai tswj cov kev tsiv teb tsaws chaw (Immigration Minister) David Coleman tau qhia txog cov visa no rau hnub Friday no rau lub caij uas Australia tej nom tswv xeev tau sab laj ntawm tuam ceeb Canberra tham txog Australia tej pej xeem coob tuaj thiab cov teeb meem tsheb daig tom tej kev ntawd.
Australia cov nom tswv ntawm lub tuam chav hauj lwm Department of Home Affairs yuav siv cov nyiaj no los lis tej hauj lwm no nrog tej nom tswv zos thiab cheeb tsam kom thov tau visa sai rau cov neeg tsiv teb tsaws chaw paub ua hauj lwm tuaj ua hauj lwm rau tej lagluam yaj sab thiab tej nom tswv zos thiab cheeb tsam no muaj cai ntiav tau tej neeg no ua tau hauj lwm rau lawv tib yam.
David Coleman uas yog Australia tus pwm tsav tswj cov kev tsiv teb tsaws chaw mam li pab tej lagluam nrhiav cov neeg txawv teb chaws uas yuav tuaj ua hauj lwm rau lawv ntawd.
Kim Coleman hais tias "Peb yuav xa ib cov neeg ua hauj lwm mus rau tej zos yaj sab mus tham txog cov hauj lwm no nrog tej tswv lagluam thiab mus nug seb ho muaj teeb meem dab tsi rau cov kev ntiav dag zog ntawm tej zejzog no."
Tab sis Australia tus thawj pwm tsav Scott Morrison tau hais tias tej neeg no yuav tsum tau nyob rau tej zos yaj sab ntawd yam tsawg li 5 lub xyoos tso mas mam li muaj cai thov tau ntaub ntawv nyob ruaj (permanent resident) hauv teb chaws Australia no.
Mr Morrison los kuj tau qhia tias yuav tos cov neeg txawv teb chaws kom tsawg tuaj nyob rau teb chaws Australia no lawm xwb vim muaj cov teeb meem tej kev tsheb daig coob heev.
Tab sis Joh Frydenberg ho tham txog Australia cov pej xeem coob tuaj txog 25 roob tus (25 million) tus ntawm tuam ceeb Canberra hnub zwj Kuab (Friday) no tias Australia yeej tsis tau los ua tib zoo npaj tej nom tswv yuav los lis tej dej num uas yuav tau tsim kev pab cuam thiab txhim kho tej hauv paus txhim kho (Infrastructure) li cas rau tej pej xeem siv kom txhog muaj cov teeb meem tsheb daig tom tej kev tsheb coob ntawd li cas li.
Mr. Frydenbert hais tias '' 2 feem 3 ntawm cov neeg tsiv teb tsaws chaw tuaj nyob teb chaws Australia tshiab no yeej nyob hauv peb tej nroog loj xws li Melbourne, Sydney thiab sab qab teb hnub tuaj ntawm xeev Queensland xwb. Ces thiaj li ua rau muaj teeb meem rau peb tej hauv paus txhim kho, tsis yog tej kev tsheb xwb tab sis cuam tshuam txog tej tsheb ntau yam thauj thiab xav neeg ncig mus los, tseem muaj teeb meem rau cov kev pab cuam tswj kev noj qab haus huv, kev kawm ntaub kawm ntawv thiab lwm cov kev pab cuam tseem ceeb uas pab rau Australia tej pej xeem thiab."
