Financial year tshiab no tsis yog tias yuav tau txheeb peb tej tw ntawv siv nyiaj (reciepts) xwb; tab sis xyoo 2025/26 no yuav muaj ntau yam pauv hloov tshiab thiab.
Txij tim 1 lub 7 hli ntuj xyoo 2025 no mus ces neeg Australia yuav tau siv cov sij hawm so paid parental leave ntau ntxiv tuaj, yuav tau tej nyiaj pab them yuav tej roj teeb (batteries) uas khaws tej hluav taws xob tau los ntawm tej phiaj ziab tshav ntau tuaj ntxiv thiab tej neeg ua hauj lwm rau ib co hauj lwm twg tsi ntsees tej zaum kuj yuav tau nyiaj bonus txog li ntawm $10,000 thiab.
Khwv tau nyiaj ntau tuaj ntxiv mam li tau them Medicare levey
Yeej muaj ib co xwm txheej uas neeg Australia yuav muaj peev xwm khwv tau nyiaj ntau tshaj li yuav dhau los rau financial year tshiab no.
Vim rau qhov tau nce tej nyiaj uas khwv tau ib xyoos ntawm ntau tuaj ntxiv lawm mas thiaj mam tau them cov Medicare levy.
Tej neeg Australia uaskhwv tau ib co nyiaj ntau uas nom tswv tau teev tseg twg thiab tsis yuav cov nyiaj private hospital cover txaus thiaj yog cov yuav tau them cov Medicare levey.
Ces txim tim 1 lub 7 hli ntuj no mus, ib tug neeg tsis tau yuav poj niam yuav txiv muaj peev xwm khwv tau nyiaj txog li ntawm $101,000 ib lub xyoos twg mas mam li tau them Medicare levey, uas tam sim no khwv tau txog $97,000 xwb twb tau them lawm.
Tej neeg uas muaj tub kawm tej nuj nqes HECS - HELP qev los kawm ntawv ces yuav muaj peev xwm khwv tau nyiaj kom ntau zog tuaj ntxiv tso mam li tau them tej nuj nqes no rov qab.
Xyoo financial year 2024-25 ces yog ib tug twg muaj tej nuj nqes no thiab khwv tau nyiaj txog $54,435 xwb ces yuav tau them cov nuj nqes HECS - HELP no lawm, tab sis financial year 2025-26 no ces khwv tau nyiaj ib xyoos twg txog $67,000 tso thiaj mam li tau them.
Tsis tas li ntawd los kuj yuav siv cov kev xam sib txawv rau cov kev them tej nuj nqes no rov qab thiab, li tsuas xam raws li tej nyiaj uas khwv tau ntau tshaj tej tau teev tseg xwb, tsis xam raws li tej khwv tau tag nrho ntawm ib lub xyoos lawm.
Australia tej neeg ua hauj lwm khwv tau nyiaj tsawg tshaj plaws ces yuav tau nyiaj hauj lwm ntau tuaj ntxiv txog li 3.5 feem pua txij hnub tim 1 lub 7 hli ntuj mus.
Thiaj yuav ua rau tej neeg ua hauj lwm no tau nyiaj hauj lwm tshiab ib teev twg txog $24.95 los sis yog tau $948 rau ib lub limtiam twg yog ua hauj lwm 38 teev ib limtiam twg. Lub koom haum Fair Work Commission tau qhia txog nws cov kev txiav txim siab no rau thaum ntxov lub hli no, ces thiaj yuav ua rau tej neeg Australia coob tshaj 2.6 million tus yuav tau nyiaj hauj lwm ntau tuaj ntxiv txim tim 1 lub 7 hli ntuj no mus.
Tsis tas li ntawd los kuj tseem yuav muaj ntau millions tus neeg Australia yuav tau nyiaj pab cuam ntawm Centrelink ntau tuaj ntxiv txog li 2.4 feem pua los pab lawv them ntau yam nqe siv ua lub neej thiab.
Yog tham rau tej cuab yig uas tau cov Family Tax Benefit (FTB) Part A ces yog muaj tej me nyuam hnoob nyoog qes dua 13 xyoos ces yuav tau nyiaj ntau tuaj ntxiv txog li $227.36 rau ob limtiam twg. Hos tej me nyuam hnoob nyoog 13 xyoos los yog siab tshaj ntawd lawm ces yuav tau nyiaj ntau tuaj ntxiv ua $295.82 rau ob limtiam twg.
Tsis tas li ntawd los kuj tseem yuav nce cov nyiaj FTB Part B ua $193.34, thiab tej cuab yig uas tseem muaj tej me nyuam hnoob nyoog yau li 5 xyoo los yog siab tshaj ntawd ces yuav tau nyiaj ntau tuaj ntxiv ua $134.96 rau ob limtiam twg thiab.
Thiab yeej tau nce tej nyiaj FTB no txhua lub xyoo txij li thaum tau tsim siv txij xyoo 2000 los thaum ob tug tsoom fwv Labor thiab tsoom fwv koom tswj tseem ua nom ntawd.
Tanya Plibersek uas yog tus nom tswj dej num pab cuam zej tsoom thiaj tau hais ib co ncauj lub txog tej kev them tej nyiaj no tias yog tej yam tseem ceeb los pab rau tej cuab yig tswj tej nqe siv los pab tu me nyuam thiab them raws li tej kab theem nyiaj poob nqe, uas yog ib txoj xub ke tsoom fwv ua tib zoo xyuas kom pab tau tej cuab yig.
Tau nyiaj superannuation ntau tuaj ntxiv
Cov nyiaj superannuation guarantee ces yog ib co nyiaj yam tsawg uas tej tswv lagluam yus ua hauj lwm rau yuav tsum tau txiav yus tej nyiaj yus khwv tau (uas them rau yus raws limtiam / ob limtiam / ib hlis twg) coj mus khaws cia rau yus phau super account thiab yuav tau cov nyiaj super no ntau tuaj ntxiv nce ntawm 11.5 feem pua mus ua 12 feem pua lawm.
Ces thiaj yuav siv tus feem pua tshiab rau txhua cov nyiaj hli thiab tej nyiaj hauj lwm uas them rau hnub tim 1 lub 7 hli ntuj los yog them tom qab hnub no, txawm tias yog tej hauj lwm uas tau ua ua ntej hnub no lawm.
Nrog rau cov kev nce tej nyiaj superannuation (Super) no ces tsoom fwv teb chaws kuj yuav pib them nyiaj super rau tej leej niam leej txo thov so mus yug thiab tu me nyuam uas yug tau tshiab (Paid Parental Leave Scheme) ua thawj zaug thiab.
Ces thiaj yuav them cov parental leave superannuation contribution no rau tej niam txiv uas tau tej nyiaj ntawm tsoom fwv txij hnub tim 1 lub 7 hli ntuj mus los yog tau tom qab hnub no.
Kho cov Paid parental leave
Txij hnub tim 1 lub 7 hli ntuj mus ces Australia tej cuab yig yuav tau txais txiaj ntsim zoo dua rau cov paid parental leave scheme uas yuav tau siv cov leave no ntau tuaj ntxiv ntawm 20 limtiam ras mus ua 22 limtiam lawm.
Tej no yog ib feem ntawm tsoom fwv tebchaws lub tswv yim los kho kom siv tau cov leave no nthuav dav tuaj ntxiv txog 26 limtiam (6 hli) txog rau lub 7 hli ntuj xyoo 2026. Ces thaum siv tau txwm txog 6 hli lawm ces tej cuab yig yuav tau nyiaj txog li ntawm $24,000 los pab lawv tom qab yug tau tus me nyuam lawm los yog coj ib tug me nyuam saws los tu ua yus tus me nyuam.
Tsab cai no raug tsim coj los pab kom tej niam txiv muaj sij hawm ntau tuaj ntxiv ntawm tsev nrog lawv tus me nyuam yug tau tshiab thiab xyuas kom muaj peev xwm siv tau cov sij hawm thov so no tau yooj yim tshaj qub ntxiv. Tej niam txiv muaj peev xwm sib faib siv rau cov sij hawm txawv los yog siv rau tib lub caij, thiab muaj peev xwm siv cov sij hawm so (paid parental leave) no rau lub sij hawm 2 xyoos, kom ib tug leej niam leej txi twg thiaj tau rov qab mus ua hauj lwm thiab ib nkawm niam txiv twg thiaj muaj peev xwm sib pab tu saib xyuas tus me nyuam yug tau tshiab ntawd.
Yuav tau them tej nqe roj teeb (Battery) khaws tej hluav taws xob ntawm tej phiaj ziab tshab pheej yig zog
Tsoom fwv teb chaws muaj hom phiaj yuav los nrog xyuas kom tej neeg sawv daws tsis txhob pheej tos siv tej hluav taws xob li ib txwm tsim tau coj los siv xwb, ces nws thiaj pub tej neeg uas nruab tej phiaj ziab tshav tsim hluav taws xob saum ruv tsev muaj peev xwm thov tau tej nqe yuav roj teeb uas nruab ntawm tsev los khaws tej hluav taws xob no txog li 30 feem pua.
Ces cov kev nqe peev tej nyiaj no thiaj yog tej nyiaj uas ib tsev neeg twg rho lawv nyiaj ntiag tug me yuav tej roj teeb mas thiaj tau, uas pab nom Labor kwv yees tias yuav pab kom tej cuab yig txuag tau nyiaj rau tej nqe them hluav taws xob ib xyoos twg txij li ntawm $1,100 thiab $2,300.
Pab $10k ua paj tshab txhawb siab rau tej lagluam qhia tej neeg xyaum ua hauj lwm tshiab
Cov nyiaj pab no yog ib co program yuav pab rau tej neeg muaj cai kawm ua tau cov hauj lwm apprentices rau tej lagluam ua vaj tse uas nom tswv yuav them tej nyiaj no rau lawv kawm lawv cov apprenticeship thiab yuav pib siv txij hnub tim 1 lub 7 hli ntuj mus.
Cov nyiaj no raug tsim coj los txhawb nqa kom tej neeg coob ntxiv tuaj mus ua cov hauj lwm tsim vaj tse, uas yog ib co Aprentice Program tseem ceeb tsim coj los siv tom qab tau muaj cov kev los txheeb txog Australia cov Strategic Review of the Australian Apprenticeship Incentive System, uas txheeb tau tias tej nqe siv ua lub neej tau ua rau tej neeg tsis xav mus kawm apprentice.
Ces tej neeg mus kawm apprentices thiab yuav tau nyiaj $ 2,000 rau lub sij hawm 6, 12, 24, thiab 36 hli, thaum lawv kawm tiav lawv cov apprenticeship lawm.
Cov kev pauv hloov rau tej neeg tsiv teb tsaws chaw uas muaj txuj ci paub ua hauj lwm
Tsoom fwv yeej tau muaj cov kev pauv hloov no coj los pab rau Australia cov skilled visa program coj los daws cov teeb meem kom tsis txhob muaj tej neeg ua hauj lwm raug tej tswv lagluam yuam siv dag zog yam tsis raug kev raug cai thiab pab kom nrhiav tau tej neeg ua hauj lwm.
Ces thiaj yuav siv ib co Core Skills Occupation List tshiab coj los hloov tej list qub li Skilled Occupation List uas siv tam sim no, kom thiaj muaj peev xwm nrhiav tau tej neeg muaj txuj ci paub ua hauj lwm uas muaj tsis txaus siv tam sim no tiag.
Tej tswv laglum thiaj yuav tau ua raws tej ntsib cai nruj tshaj qub ntxiv, li yuav tau them tej nyiaj hauj lwm raws li tej kiab khw lagluam them thiab yuav tsum tau coj tej hauj lwm ntawd mus haub tau yaum ntawm teb chaws no ua ntej tso.
Lub tuam chav Department of Home Affairs los kuj tau qhia tias yuav nce tej nyiaj hauj lwm rau tej neeg uas thov cov skilled visas tuaj ua hauj lwm ntau tuaj ntxiv txog li ntawm 4.6 feem pua thiab.
Tab sis tseem tsis tau piv siv cov kev pauv hloov nce nyiaj hauj lwm ntau tuaj ntxiv no rau tej neeg uas thov tau tej visa tam sim no siv yog tias lawv thov lawv cov visa ua hauj lwm ua ntej hnub tim 1 lub 7 hli ntuj xyoo 2025 no.
Tau nce tej nqe
Kuj tsis yog tib co xov zoo nkaus xwb thiab yog tham txog tej nyiaj txiaj yuav siv rau yav pem suab.
Lub koom haum Canstar uas yog ib lub koom haum coj tej tuam txhab siv nyiaj txiaj ntau yam los sib piv seb lub twg siv tau zoo thiab pheej yig tshaj ceeb toom tias yuav nce tej nqe hluav taws xob kim tuaj ntxiv rau ntawm tej xeem li NSW, Victoria, south-east Queensland, South Australia thiab ACT.
Sally Tindall uas yog tus neeg tawm tswv yim rau lub koom haum Canstar tau hais tias tej nqe hluav taws xob uas them tam sim no nyuav nce kim tuaj ntxiv tshaj 9 feem pua rau hnub tim 1 lub 7 hli ntuj (2025) no mus rau qee cov electricity plans uas cuab yig siv lawm thiab.
Ms Tindall tau hais tias "Tej nqe hluav taws xob uas nce kim tuaj ntxiv no yuav yog ib co xwm txheej nyuaj heev rau ntau cov cuab yig,''
"Thiab tsoom fwv cov kev pab them nqe hluav taws xob (Electricity Bill Rebate) txuas ntxiv no yuav pab daws tau tej nqe hluav taws xob uas kim tuaj ntxiv no mus txog rau thaum xaus lub xyoo no; txawm li cas los tej cuab yig uas muaj neeg coob, hais tsi ntsees rau ntawm NSW uas nce yuav nce nqe hluav taws xob kim tshaj plaws ntawd ces tej nyiaj pab them tej nqe hluav taws xob me ntsis no yeej pab tsis tau dab tsi ntau thiab.''
Canstar los kuj kwv yees tias tej nqe xav ntawv los kuj yuav kim tuaj ntxiv thiab.
Tej nqe xa koom mus txawv teb chaws, tej nqe xav ntawv txawv teb chaws, thiab cov ID products ntawm lub chaw xa ntawv Australia Post los kuj yuav nce kim tuaj ntxiv ib co products thiab tej zaum kuj yuav tsis tau ib co services twg siv txuas ntxiv lawm thiab.
Siv tej cai tswj cov kev siv kev tsheb nruj tuaj ntxiv
NSW yuav rau txim hnyav tshaj qub ntxiv rau tej neeg tsav tsheb uas siv lawv tej xov tooj rau lub caij tseem tsav tsheb.
Txij hnub tim 1 lub 7 hli ntuj mus ces tej neeg uas raug txhom tau tias tseem siv xov tooj rau lub caij thaum tseem tsav tsheb txawm tias tau nres ntawm teeb liab los yuav raug nplua nyiaj txog li $1,209 thiab yuav poob 5 demerit points.
Ntawm xeev Victoria ces tej cai tswj cov kev siv kev tsheb yeej hais kom tej neeg yuav tsum tsav tsheb qeeb txog li 40 km/hr xwb yog thaum muaj tej xwm txheej kub ntaiv (emergency responders) li tej tsheb cab truck, muaj ib co kev pab cuam tej tsheb tuag tom kev, los yog muaj tej xwm txheej dab tsi uas muaj tej neeg pab cov xwm txheej ti tes ti taw yuav tau mus pab ntawd.
Tej neeg Queensland ces yuav tau them tej nqe teev zwm tsheb kom raug cai ntau tuaj ntxiv txog li 3.4 feem pua thiab yuav mag nplua nyiaj ntau tshaj qub tuaj ntxiv yog hla teeb liab.
Tsis tas li ntawd los kuj tseem yuav siv cov koob thaij duab AI uas muaj peev xwm txhom tias seb tej neeg tsav tsheb twg siv xov tooj raug coj los siv tam li yog tsoom fwv ib co tswv yim coj los tawm tsam nrog cov kev pheej kov xov tooj uas ua rau tej neeg tsis kub siab tsav tsheb.
