Xyoo 2026 no ces Australia yuav muaj ib co kev pauv hloov tseem ceeb — tsis yog tej tswv nyiaj npaj yuav ua ntau yam tshiab rau yus lub neej, cov kev mus koom gyms los yog cov kev xav kawm ib hom lus tshiab xwb.
Zaum no ces muaj cov kev pauv hloov loj tshaj tej neeg ntiag tug tej hom phiaj lawm, ces thiaj yuav cuam tshuam txog tej cuab yig tej nyiaj siv, tej chaw ua hauj lwm thiab lub teb chaws no tej haus paus txhim kho.
Tsis hais cov kev txo se rau tje neeg, cov kev uas ib txhia yuav tau nyiaj superannuation, txog rau tej nyiaj yuav pab rau lub chaw tswj thiab tiv thaiv kab mob (Centre for Disease Control) yog tej uas yuav muaj kev pauv hloov uas tej zaum ib txhia yeej tsis tshua kub siab txog pes tsawg.
Ntxiv no yog tej uas yuav muaj kev pauv hloov ntawm Australia xyoo 2026 no.
Cov kev txo se xyoo 2026
Yog tias koj tsuas khwv tau nyiaj hauj lwm ib xyoos twg tau ntau dua $18,200 xwb ces tej zaum koj yuav tau nyiaj me ntsis ntxiv xyoo 2026 no. Txim tim 1 lub 7 hli ntuj ces yuav txo tej se rau tej nyiaj uas tej neeg ntiag tug khwv tau ntawv kom tsawg zog ntawm 16 feem pua mus ua 15 feem pua. Uas tsoom fwv hais tias yuav pab kom neeg Australia tau nyiaj ib xyoos twg ntxiv txog li $268 thiab yuav nce ua $536 txij xyoo 2027 mus.
Kev pab rau tej lagluam me
Lub 4 hlis ntuj, ces tsoom fwv yeej tau qhia tias yuav txo se $20,000 kiag tam sim ntawd rau tej lagluam uas siv tej nyiaj no los ua lawv cov lagluam los yog yuav twj yuav tshuab los pab ua lawv tej lagluam, thiab yuav txo tej se no 12 hlis (1 xyoos) ntxiv txog ntua hnub tim 30 lub 6 hli ntuj xyoo 2026 coj los pab tej lagluam me. Thiab tsev kis xeev siab yeej tau pom zoo tsim tau tsab cai no siv lub 11 hlis tsaib no los lawm.
Tej tswv yim no yuav tso cai rau tej lagluam me uas muaj cai claim muaj peev xwm txiav kiag tej nyiaj no tawm tam li yog ib feem ntawm lawv tej peev txheej (asset) ntawm lub xyoo uas yeej xub tau siv.
Raws li tsoom fwv hais ces yuav muaj tej lagluam me txog li ntawd 4 million cov uas khwv tau nyiaj tsawg dua $10 million yuav tau txais tej txiaj ntsim los ntawm cov kev pab no.
Lwm cov kev pauv hloov ntawm ib co holiday homes tsi ntsees twg ces tej zaum yuav raug Australian Taxation Office (ATO) xam tias yog cov 'leisure facilities' txij lub 7 hli ntuj xyoo 2026 mus, txhais tias tej tswv tsev yuav tsis muaj peev xwm claim tej nyiaj kho tsev tsuas yog tias ntshe lub tsev ntawd raug ntiav coj los khwv nyiaj nkaus xwb.
Ua ke no los txij xyoo tim ntej no mus ces ATO cov general interest charge (GIC) uas yog ib co nqe tsub txhab ntxiv rau tej nuj nqes se uas tsis tau them rov qab ib hnub twg ntawd yuav tsis raug txo ntxiv lawm.
Anita Challen uas yog tus neeg ua hauj lwm pab ATO tus coj tau hais tias yuav ua rau tej neeg uas tseem tsis tau them tej nuj nqe se rov qab ntawd yuav yuav tiv nuj nqes se ntau tuaj ntxiv.
Challen tau hais ib co ncauj lub tias "Txawm tias tseem txog rau lub caij yuav xa se rov qab tom ntej no mas tej neeg them se thiaj yuav ntsib cov kev pauv hloov no los tam sim no ATO yeej tsub paj 11.17 feem pua rau ib hnub twg rau tej nuj nqes se uas tseem tsis tau them rov qab, yog li thiaj yog tej yam tseem ceeb uas yuav tau kub siab them."
Ntau millions tus neeg 'yuav tau txiaj ntsim' los ntawm cov kev pauv hloov rau tej nyiaj superannuation
Misha Schubert uas yog tus CEO ntawm Super Members Council hais tias xyoo 2026 yog xyoo uas yuav muaj "ntau roob (millions) tus neeg Australia yuav tau txais txiaj ntsim los ntawm qee cov kev pauv hloov" rau tej cai superannuation.
Thawj yam ces txij lub 7 hli ntuj mus, yuav coj tsab cai payday super laws los siv, uas yuav ua rau tej neeg ua hauj lwm yuav tau nyiaj superannuation kiag rau hnub uas tej tswv lagluam them nyiaj hauj lwm rau tej neeg ua hauj lwm ntawd.
Raws li tsab cai uas muaj siv tam sim no, ces tsuas hais kom tej tswv lagluam them nyiaj superannuation ib xyoo twg yam tsawg li 4 zaug rau tej neeg ua hauj lwm, tsis hais them kiag ua ntej yog them rau lub caij sij hawm yuav xaus rau cov hnub them nyiaj superannation uas yuav xaus rau 3 lub hli.
Schubert tau qhia rau SBS News tias "Cov payday super yuav yog ib cov kev pauv hloov loj tshaj plaws rau tej nyiaj super xyoo 2026 no. Ces hnub tim 1 lub 7 hli ntuj (2026) no thiaj yog hnub yuav coj tsab cai no los siv lawm."
Tej nyiaj super them rau tej niam txiv uas siv cov parental leave
Txij lub 7 hli ntuj no mus ces tej niam txiv uas thov cov paid parental leave yuav tau nyiaj superannuation.
ATO yuav them tej nyiaj no ncaj qha rau tus neeg yus phau super fund tom qab xaus financial year piv txij lub 7 hli ntuj xyoo 2026 mus.
Tsoom fwv los kuj tau qhia tias yuav tsub se 30 feem pua rau tej super account uas muaj nyiaj super txij $3 million txog $10 million uas khwv tau nyiaj. Thiab yuav tsub 40 feem pua se rau tej super account uas muaj nyiaj ntau tshaj $40 million.
Yuav tau tej tshuaj pheej yig dua
Pib txij ib tag hmo uas dhau rau xyoo tshiab 2026 lawm, ces tej neeg mob tuas tau them tej tshuaj uas raug teev zwm nrog cov kev pab yuav tshuaj Pharmaceutical Benefits Scheme (PBS) pheej yig zog uas txog ntawm $31.60 mus them $25 lawm xwb.
Tej neeg so tsis ua hauj lwm lawm (Pensioners) thiab tej neeg tau cov concession card siv ces yeej tseem tsuas tau them $7.70 lub qub txuas ntxiv rau lawv tej tshuaj kws tshuaj sau rau lawv noj mus txog ntua yam tsawg li xyoo 2030.
Nod yog pab nom Labor (Tsoom fwv Albanese) cov kev tau cog lus rau lub caij tseem sib tw nrhiav suab xaiv nom lub 5 hlis ntuj xyoo 2025 dhau los uas yuav pab neeg Australia txuag tau nyiaj txog $200 million ib xyoos twg rau nws cov kev them nqe tshuaj raws tej nqe tshiab uas tau teev tseg.
Tau siv cov kev zov me nyuam 3 hnub ib limtiam twg
Yog tias koj tsev neeg muaj cai tau siv cov kev pab them nqe zov me nyuam Child Care Subsidy (CCS) ces txij hnub tim 5 lub 1 hlis ntuj mus koj yuav tau siv 3 hnub zov me nyuam ruaj uas tsoom fwv pab them rau ib limtiam twg.
Tej kev hloov no thiaj yuav tsis siv cov activity test (kawm ntawv, ua hauj lwm pes tsawg teev, kawm ntawv) coj los pab rau tej cuab yig uas khwv tau nyiaj ib xyoos twg txog $530,000. Tab sis tej cuab yig uas khwv tau nyiaj ntau tshaj $533,280 ces yuav tsis muaj cai tau siv cov kev pab no lawm.
Cov kev pauv hloov rau tej nyiaj pab tej neeg txom nyem
Tej neeg Australia uas tau cov nyiaj pab cuam Youth Allowance, Austudy, ABSTUDY, Youth Disability Support Pension, thiab Carer Allowance yuav tau nyiaj pab cuam ntau ntxiv raws li cov kev hloov rau tej nyiaj social security payments tshiab.
Tej nyiaj Youth Allowance ntau tshaj plaws uas them rau tib tug neeg Australia uas tsis muaj me nyuam yuav tau ntau ntxiv tuaj txog $684.20 (nce ntawm $663) rau xyoo 2026 no.
Tsis tas li ntawd los tej nyiaj uas uas yuav them pab rau tej tub kawm los yuav pub khwv tau ntau zog ntxiv, thiab yuav nce tib yam rau cov parental income test threshold rau tej nyiaj Youth Allowance thiab ABSTUDY.
Hos cov nyiaj Carer Allowance (pab tu saib xyuas ib tug neeg twg) ces muaj tej neeg txog li ntawm 680,000 tus yuav tau $2.9 ntau ntxiv tuaj uas yuav tau ob limtiam twg txog li $162.20.
Raws li Tanya Plibersek uas yog tus nom Social Services Minister hais ces "yuav muaj tej neeg Australia ntau tshaj 1 million tus uas yuav tau kawm ntawv los yog yuav tau tu saib xyuas lwm tus yog cov yuav tau nyiaj ntau zog ntxiv."
Yuav thov tsis tau tej nyiaj pab them nqe siv hluav taws xob lawm
Tsis yog txhua cov kev hloov xyoo 2026 yuav pab neeg Australia txuag nyiaj.
Treasurer Jim Chalmers tau qhia tias yuav tsis pab them nqe hluav taws xob ntxiv rau xyoo 2026 lawm, uas tau pab tej cuab yig txuag tau tej nqe no txog li $300 rau cov nyiaj puag xyoo 2024 thiab pab tej cuag yig txuag tsis tau them tej nqe no $150 rau 6 lub hli kawg ntawm xyoo 2025.
Sally Tindall uas yog tus coj tswj cov data insights ntawm lub koom haum Canstar uas sib piv cov kev siv nyiaj txiaj ceeb toom rau neeg Australia tias tej zaum tej nqe hluav taws xob xyoo tom ntej no yuav ua rau ''yuav tau them kim'' rau lub caij uas tsoom fwv tsis pab them lawm.
"Thaum uas tej neeg tej ntawv them tej nqe energy (hluav taws xob thiab gas) 3 lub hlis (txij lub 1 hlis ntuj txog lub 3 hlis ntuj) tej zaum txog rau thaum ntxov lub 4 hlis ntuj (2026) raug xa tuaj rau yus, ces tej zaum yuav ua rau lawv ceeb."
Tinall tau hais tias ntshe tej cuab yig yuav tau them nqe hluav taws xob kim rau financial year tshiab pib txij lub 7 hli ntuj 2026 no mus.
Tau siv hluav taws xob dawb 3 teev
Xyoo 2026 ces tej zaum koj kuj yuav tau siv hluav taws xob dawb thiab.
Txij lub 7 hli ntuj mus ces tej cuab yig ntawm NSW, Southeast Queensland, thiab South Australia yuav tau siv cov
Solar Sharer scheme, uas yuav cia tej neeg siv tau siv hluav taws xob dawb 3 teev ib hnub twg.
Tindall tau hais tias "Ntawd yog tej yam uas sawv daws xav paub thiab seb tej kiab khw lagluam ho yuav ua li cas rau cov solar share offer no."
That will be an interesting one to watch and see how the market reacts to this solar share offer," Tindall said.
Thaum uas Chris Bowen uas yog tus nom Energy Minister tau qhia rau lub 11 hlis ntuj (2025) ces nws tau hais tias: "Tej neeg uas muaj peev xwm siv tau hluav taws xob rau lub caij uas tsis tau them yuav tau txiaj ntsim, tsis hais lawv yog cov neeg uas muaj cov phiaj ziab tshav tsim hluav taws xob siv los tsis muaj li, los yog lawv yuav tsev los ntiav tsev nyob li. Yog tej neeg coob npaum li cas los siv ces yuav ua rau cov system no tau txais txiaj ntsim ntau npaum li ntawd xwb, vim tej neeg tau them nqe siv hluav taws xob tsawg dua."
Australia lub chaw tswj thiab tiv thaiv kawb mob (Centre for Disease Control)
Txij lub 1 hlis ntuj xyoo 2026 mus ces Australia yuav muaj ib lub chaw tswj thiab tiv thaiv kab mob (Centre for Disease Control - CDC) siv, uas muaj hom phiaj los daws, los tiv thaiv tej xwm txheej ti tes ti taw uas yuav muaj teeb meem cuam tshuam rau zej tsoom cov kev noj qab haus huv.
CDC yog tus yuav los txheeb thiab soj tej dej qias seb puas muaj kab mob thiab yog tus yuav sib txuas lus nrog tej chaw tswj kab mob ntawm tej zos cheeb tsam tuaj ntug nroog thiab tej koom haum tswj kab mob ntawm tej zejzog ntawm teb chaws no.
Ces tus nom tswj dej num noj qab haus huv thiaj yuav teeb tsa ib tug coj los tswj lub chaw no thiab qib siv txij tim 1 lub 1 hlis ntuj xyoo 2026 lawm.
Associate professor Paul Griffin ntawm University of Queensland lub tuam chav Medical School tau qhia thaum ntxiv rau SBS News txog cov kev teeb tsa lub chaw CDC tias yog pab Australia coj los tswj tej kab mob sib kis.
Prof Griffin tau hais tias "Tam sim no ces peb poob rau tej xwm txheej phom sij uas tsis muaj peev xwm ua tau dab tsi, tsis hais seb peb yuav tawm tsam nrog tej kab mob uas hawv yuav tsim kev phom sij rau peb li cas thiab cov kev xyuas kom muaj zej tsoom hno tshuaj vaccine coob yog ib co teeb meem loj heev li."
"Peb thiaj yuav tau kub siab tshaj no ntxiv los xyuas tej uas peb tau tab tom li, tab sis peb yuav tsum tau npaj kom txhij ua ntej tsam ho rov qab muaj ib co kab mob tshiab uas yuav tsim tau kev phom sij rau peb thiab."
Ib nqe lus nug tshiab ntawm cov lus nug txheeb pej xeem
Lub 8 hli ntuj xyoo 2026 no ces yog lub caij uas yuav rov qab txheeb Australia tej pej xeem dua ib zaug ntxiv tom qab tau txheeb 5 xyoos dhau los, tab sis zaum no ces yuav muaj qee cov kev pauv hloov rau tej lus nug uas yuav siv coj los nug sawv daws lawm.
Lub 2 hlis ntuj ces Australian Bureau of Statistics (ABS) yeej tau qhia tias cov kev txheeb pej xeem xyoo 2026 no yuav kho ib co lus nug tshiab cuam tshuam txog sex, household, thiab family relationships, uas tau los txheeb los lus ''sex recorded at birth'' dua uas txawv ntawm nqe lus nug txog cov gender uas nws nug nws cais ua ib nqe lus nug ntawd.
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page.
