Tej nqe ua lub neej ntawm Australia kim tuaj lawm. Tab sis vim li cas txhua yam thiaj yuav kim ua luaj li?

Tau muaj kev ceeb toom rau tej neeg Australia tias ntshe lawv yuav tau siv nyiaj ntau los yuav tej khoom siv txhua hnub rau lub caij tej nqe khoom kim heev no. Tab sis yog vim li thiaj tab tom muaj tej xwm txheej no tshwm sim lawm - thiab peb puas muaj peev xwm yuav zam dhau tej teeb meem no?

Source: SBS

Tej nqe siv pab ua lub neej yeej kim ua ntuv zus tuaj ntawm Australia thiab thoob ntiaj teb no.

Tej nqe roj noj, roj sam tsheb, khoom noj khoom haus, nqe yuaj cij dav hlau (flight tickets) ces yeej sib txawv ntawm tej xeev los yog ib lub teb chaws twg - ces thiaj tau ua rau muaj teeb meem ua rau neeg Australia txom nyem nyiaj txiaj siv tshaj qub txij li thaum tau muaj tus kab mob COVID-19 tau sib kis thoob ntuj txij thaum ntxov xyoo 2020 los.

Lub caij uas lub teb chaws no pib rov qab ntxeem dhau ntawm ntau yam teeb meem kub ntxhov tsis hais hav zoov kub hnyiab, kab mob COVID-19, ntuj qhuav teb nkig thiab dej nyab - ces kuj muaj ib cov lus nug tseem ceeb txog txoj kev muaj peev xwm ua tau lub zoo neej ntawm Australia.

Thiab lo lus nug tseem ceeb tshaj plaws yog lo lus nug tias: Vim li cas txhua tsav yam thiaj li yuav kim ua luaj li?

Puas muaj ib lo lus teb yooj yim teb rau nqe lus nug no?

Lo lus teb luv luv ces twb vim yog nyiaj poob nqe (inflation), tab sis kuj tsis yog tsis yog tej yam yuav teb tau yooj yooj yim kiag li ntawd thiab.

Raws li Consumer Price Index (CPI), los yog Australia cov kab theem nyiaj poob nqe ces yeej tau nce tuaj txog li 3.5% rau lub sij hawm 12 hlis los txog rau lub 12 hlis ntuj xyoo 2021 no lawm.

Shane Oliver uas yog tus chief economist rau AMP apital tau hais tias cov kab theem nyiaj poob nqe yog tej yam ua rau Australia ntxeem dhau ntawm cov kev txwv kab mob COVID-19.

“[Lub caij tseem muaj kab mob sib kis thoob ntuj] ces peb yeej tsis muaj peev xwm siv nyiaj siv ntau yam services, yog li thiaj ua rau peb tsis muaj peev xwm siv tau tag nrho peb tej nyiaj los yuav khoom  uas tsim los yog coj los muag rau lub caij no,'' raws li Mr Oliver tau qhia rau SBS News.

Txij thaum Russia tau nam nias Ukraine ces Mr Oliver tau hais tias ''tau ua rau muaj teeb meem ntau tuaj ntxiv lawm."

Alex Ballantyne uas yog ib tug neeg tsim nuj ntawm lub chaw teeb txheeb Grattan Institute cov economic policy program tau hais tias vim tau muaj lwm cov xwm txheej cuam tshuam rau tej lagluam thiab - ces thiaj ua rau tej nqe khoom kim tuaj lawm.

"Tej kev rau txim tsov rog rau Russia txhais tau tias ua rau muaj roj siv tsawg dua qhov tej neeg xav tau tam sim no lawm, ces thiaj ua rau nqe roj tab tom kim tuaj dua lawm," raw lis Mr Ballantyine tau hais.

"Hais tsi ntsees rau tej teb chaws vam meej rov qab muaj neeg mus koom ntiaj teb cov kev ntoj ncig lawm, thiab kuj muaj cov kev siv roj ntau heev, tab sis qhov tau tshwm sim yog tau muaj roj tsawg rau lub caij uas muaj neeg xav tau tej roj no los siv heev."

"Tej xwm txheej kab mob kis thoob ntuj, dej nyab, tsov rog - ua yeej yog tej yam uas tau muaj rau qee lub caij - yog li tag nrho tej no thiaj li muaj teeb meem rau cov kev tsim tau tej khoom siv...vim yeej muaj ntau yam tshwm sim rau tib lub caij no."

Tab sis Mr Ballantyne tau hais tias txhua tsav yam tsis hais tej khoom los yog tej services uas tej neeg Australians yeej yuav tas li yeej kim zog tuaj lawm thiab tus nqe yeej tau kim tuaj lawm.

"Peb yeej tau pom tej nqe khoom ntau yam uas tej cuab yig yuav tas li ntawd kim tuaj lawm...tab sis kuj tseem muaj qee yam uas tus nqe tsis tau kim tuaj thiab xws li txiav plaub hau, los yog mus noj hmo ntawm tej khw noj mo.''

Yog li ntawd ne, dab tsi thiaj kim heev tuaj lawm?

Tej khoom noj khoom haus

Tej nqe zaub mov thiab tej nqe khoom haus tsis yog cawv yog tej cuab yig ib cov kev siv nyiaj loj ua zum ob, dua ntawm tej nqe yuav tau siv hauv lub cuab yig rau xyoo 2015-16 raws li Australia Bureau of Statistics cov kev tshuaj ntsuam txog cov kev siv. 

Tej khoom kim tshaj plaws yog nqaij nyuj thiab nqaij yaj. Barry Irvin uas yog tus coj lub tuam txhab Bega Cheese tau ceeb toom tias tej nqe mis khov los ntshe yuav nce tib yam thiab.

Fruits in season for Autumn include apples, bananas, custard apples, limes, melons and strawberries - SBS Source: SBS

Thiab ntshe tej nqe khoom ntawm tej khw muag khoom noj khoom siv los ntshe yuav tsis tau nqe sai thiab.

Brad Banducci uas yog tus coj Woolworths Group los kuj tau ceeb toom rau tej neeg tshaj xov xwm tias tej zaum ntshe tej khoom muag hauv tej txee ntawm tej khw muag khoom yuav kim tuaj ntxiv txog li 3% rau xyoo tom ntej no.

SPC uas yog ib lub tuam txhab tsim zaub mov los kuj tau hais tias ntshe tej khoom noj ntim thawv hlau yuav kim tuaj ntxiv thiab vim rau qhov tej nqe tsim khoom kim tuaj ntau kawg nkaus li lawm. Yog li tej nqe hlau thiab nqe noob qoob wheat  kim tuaj ntxiv no yuav ua rau tej nqe spaghetti uas ntim hauv tej thawv hlau lawm.

Coffee

Tej zaum sai sai no ces ntshe ib txhia neeg Australia yuav tau them ib kho kasfes txog li $7 rau thaum xaus xyoo no lawm raws li David Parnham uas yog tus coj lus koom haum Café Owners and Baristas Association Of Australia, tau qhia.

Tej Cafés thoob teb chaws no los yeej tsis muaj peev xwm yuav ntxeem nrog tej nqe ua lagluam ntau yam thiab ntshe sai sai no ces ntshe yuav kom tej customers nrog them tej nqe no thiab.

Mr Parnham tau hais tias tos hos nce tej nqe no los vim yuav tau them tej nqe xa khoom vim tsis tshua muaj tej lagluam xa khoom uas xa hauv nkoj thiab tej huab cua phem ua rau tej neeg cog qoob loo nce nqe taum ntsuab thoob ntiaj teb no.

A regular cup of coffee at a local cafe could cost up to $7 by the end of the year, according to the Cafe Owners and Baristas Association Of Australia -SBS Source: SBS

Roj

Nqe roj tsheb los kuj kim tshaj $2 rau ib litre rau Australia nroog loj rau limtiam dhau los thiab.

Lub koom haum Australian Institute of Petroleum tau hais tias tus nqe roj nrab ntawm haiv neeg no rau txhua limtiam twg ces yeej tau nce tuaj ntxiv txog li 14.9 cents rau lub limtiam dhau los txog li 212.5 cents rau ib litre tom qab tau nces ntawm 210.4 cents txog 214 cents.

Tej kws paub zoo txog lagluam thiab kev khwv nyiaj (Economists) yeej tau kwv yees tseg tias ntshe tej nqe roj dub (roj tseem tsis tau lim) ntseem yuav nce thiab ntshe yuav kim tshaj $135 rau ib thawv twg diam.

Tej xwm txheej hais los no yog raug teeb meem ncaj qha los ntawm tej nqe roj uas kim tuaj, vim tau muaj cov kev rau txim lagluam ntawm ntau lub teb chaws rau Russia, uas yog ib lub teb chaws muag roj ntau tshaj plaws ntawm 3 lub teb chaws hauv ntiaj teb no.

A man fills up his car at a petrol station in Sydney, Australia as fuel hits record prices in many areas across the country - Xinhua News Agency -XinHua News Agency -GettyImages Source: Getty Images

Mr Ballantyne tau hais tias "Yeej tau muaj tej teeb meem feem ntau rau tej lagluam lagluam li no rau ntau lub teb chaws rau tib lub caij, ces thiaj li tau ua rau muaj teeb meem ntau yam, hais tsis ntsees tsis yog nyob rau hauv teb chaws Russia xwb tab sis yeej muaj rau ntiaj teb tib yam nkaus thiab."

Kuj tau muaj neeg tawm tswv yim tias tej zaum Josh Frydenberg uas yog tus nom tswj nyiaj txiaj rau tsoom fwv Australia kuj yuav txo cov nqe se sau rau tej roj tsheb txog li 44 cents rau ib litre twg thiab.

Tab sis Chris Richardson uas yog ib tug kws paub zoo txog lagluam thiab kev khwv nyiaj (economist) ntawm Deloitte Access Economics tau ceeb toom tias yog tseem muaj cov kev pab cuam rau tej roj li hais ntawd thiab ces haj yam yuav ua rau nyiaj poob nqe ntxiv thiab haj yam yuav ua rau tuam txhab nyiaj faj seeb haiv (Reserve Bank of Australia) yuav rub lub sij hawm nce kab theem paj kom sai tuaj ntxiv rau lub xyoo no thiab.

Nws tau hais tias kuj yuav yog tej yam nyuaj uas yuav tshem cov kev pab cuam no yog thaum tsim tau coj los siv lawm. 

Mr Richardson tau hais tias "Tej tswv yim pab cuam no mas coj los siv tau sai tab sis yuav tso tseg tau qeeb heev."

Lwm cov txhuam thawj uas ua rau tej nqe roj kim ces yog cov kab theem pauv nyiaj, nqe xa nkaj thauj khoom, nqe yuav nyiaj tuav pov hwm (insurance costs), nqe them chaws nres nkoj thiab nqe khaws tej khoom thaum xa mus txog chaw.

Annual percentage change in fuel prices over the years and the major events causing volatility - SBS/ABS Source: SBS/ABS

Pej kum haiv cov kev ntoj ncig

Tej nqe roj uas nce siab tuaj no yeej dhia tsis dhau ntawm qhov yuav ua rau muaj teeb meem rau lwm yam khoom los yog lwm yam services, thiab cov kev ntoj ncig kuj yog ib feem ntawm tej hais no.

Vim tej nqe roj tab tom kim tuaj lawm, ces thiaj tau ua rau tej tuam txhab dav hlau muaj nuj nqes ntau yam ces thiaj ua rau pej kum haiv tej nqe caij dav hlau kim tuaj tib yam thiab.

Mr Ballantyne tau hais tias "Tej fij dav hlau los yeej tau siv roj thiab tej zaum tej nqe roj los kuj kim tuaj lawm thiab yog tias tej nqe roj no kim tuaj lawm."

Raws li tej xov xwm tau los ntawm lub tuam txhab ntoj ncig Kayak lub vas sab tau qhia, ces tej rooj dav hlau tus nqe nrab (economy seats) yeej kim tshaj tej nqe ntawm tus zauv nrab tshaj 50% ntawm tej nqe rooj ua ntej yuav muaj kab mob kis thoob ntuj txij li hnub tim 1 lub 2 hlis ntuj mus txog hnub tim 13 lub 2 hlis ntuj.

The effects of sky-high fuel prices will be seen in international travel - SBS Source: SBS

Tej nqe khoom kim no puas yuav rov qab nqes?

Marcus Carmont uas yog tus coj lub koom haum TMX Global uas yog cov tuam txhab sab laj txog cov kev xa khoom muag tau hais tias ntshe yeej yuav tseem muaj tej nqe ua lub neej kim li no txuas ntxiv rau yav tom ntej vim tej tuam txhab xav khoom los yeej tau them tej nqe xa khoom, tej nqe ntiav nkoj thauj khoom thiab nqe ntiav dag zog kim tuaj ntxiv ua ntuv zus thiab.

Mr Carmont tau hais tias “Yeej yuav tau xam ntau yam nrog thiab, hais tsis ntsees txog cov kev ntiav dag zog los yog tej nqe yuav tau them rau lub caij uas tej nqe poob nqe txuas ntxiv no."

Nws tau hais tias yog tias ho txo tus nqe roj no lawm, ces kuj yuav ua rau tus nqe roj pheej yig zog, ces tej zaum kuj yuav pab daws tau tej teeb meem uas neeg Australia tab tom ntsib no thiab.

Mr Oliver ntawm lub koom haum AMP Capital tau hais tias tej nqe ua lub neej uas tab tom muaj teeb meem rau tej neeg Australia ntawd ces kuj nyob rau ntawm seb ho muaj cov tsov rog sab hnub tuj ntawm Europe zoo li cas - tab sis yeej tsis yog tim tib co xwm txheej no nkaus xwb thiab.

Nws tau hais tias "Cia siab tias yuav muaj cov kev pom zoo tsim kev thaj yeeb kom sai thiab xaus kob tsov rog no, ces yuav tshem tau tej ua rau muaj tej teeb meem no, tab sis peb yeej tseem yuav ntsib teeb meem nyuaj rau cov kev xa tej khoom no."

"Yeej tseem yuav muaj teeb meem rau cov kev xa khoom txuas ntxiv thiab tej zaum yuav yog ib yam tseem ceeb tshaj plaws uas ua rau tej nyiaj poob nqe ntau tuaj ntxiv."

Hos lub caij no los Mr Ballantyne yeej tau hais tias ntshe tseem yuav ntau hli los yog ntau xyoo ntxiv no mas thiaj li yuav paub tias muaj teeb meem li cas tiag rau neeg Australia.

Nws kuj cia siab tias yuav muaj peev xwm daws tau ntau yam teeb meem muaj rau tej nqe ua lub neej kom sai tsis yog yuav daws tau qeeb.

Mr Ballantyen tau hais tias "Tag nrho peb sawv daws yeej cia siab tias yuav muaj tej teeb meem no ib ntus xwb, vim rau qhov yuav ua rau muaj tej teeb meem no luv luv xwb thiab yuav pab kom tau txais kev yooj yim me ntsi rau tej cuab yig."

Tsoom fwv tab tom ua dab tsi lawm?

Thawj pwm tsav Scott Morrison stau hais tias "yeej paub zoo txog" tej teeb meem uas tau muaj rau neeg Australia rau lub caij uas yuav tau them tej nqe ua lub neej txhua hnub ua kim tuaj ntxiv no.

"Peb yeej tau ua tib zoo sab laj txog tej tswv yim yuav coj los nrog xyuas kom peb thiaj muaj peev xwm tswj tau tej nyiaj puag xyoo zoo - uas pab tej neeg uas xav tau kev pab cuam kiag tam sim no, thiab ua tib zoo xyuas kom peb ua tau raws li tej tswv yim tswj lagluam kom lagluam ruaj khov txuas ntxiv thiab," raws li Mr Morrison tau qhia rau tej neeg tshaj xov xwm rau hnub Monday.

Mr Frydenberg los kuj tau qhia rau lub koom haum Australian Chamber of Commerce and Industry lub rooj sab laj rau hnub Friday tias yeej muaj ib co tswv yim coj los xyuas tej no rau hnub tim 29/03/2022 uas ns qhia txog tsoom fwv cov nyiaj puag xyoo rau neeg Australia kom pab daws tau tej chaw leg no rau neeg Australia thiab.

Nws tau hais tias "Yeej yuav muaj ib cov tswv yim coj los pab kom tej cuab yig tswj tau tej nqe ua lub neej no tsi ntsees raws li qhov tsim nyog ua thiab."

Thiab Mr Morrison los yeej tsis muaj peev xwm ua tau dab tsi ntau los hloov tej nqe xa khoom, tab sis Mr Ballantyne tau hais tias tej nom tsim cai  yuav tau ''los ua cov kev txiav txim siab nyuaj heev no" kom thiaj xaus tau tej teeb meem nyiaj txiaj uas yuav muaj tshwm sim tau.

Xav kom khwv tau nyiaj hauj lwm ntau ntxiv

Nws tau hais tias tej kws paub zoo txog kev khwv nyiaj yeej txheeb xyuas tias seb tej neeg Australia no ho puas khwv tau nyiaj hauj lwm ntau ntxiv kom thiaj li tau siv coj los them tej nqe ua lub neej kim tuaj uas tab tom muaj rau lawv no.

Nws tau hais tias "Qhov peb xav pom ces yog cov kev nce nyiaj hauj lwm mas thiaj yuav raws cuag tej xwm txheej no, tsis li ntawd ces yuav ua rau tej neeg sawv daws tsis muaj peev xwm ua tau lub zoo neej raws li qhov tsim nyog."

Nws tau hais tias tsoom fwv tej cai yuav tsum tsim kom pab tau tej neeg Australia uas raug teeb meem loj tshaj plaws los ntawm tej nqe ua lub neej no.

"Yuav tau los pab tej neeg uas tsis muaj peev xwm pab tau lawv tus kheej, los sis tej neeg uas yuav tau siv nyiaj ntau tuaj ntxiv los pab lawv lub neej, los yog tej neeg txom nyem nyiaj txiaj siv txhua hnub ntawd. Ua tib zoo xyuas kom pab tau tej neeg no."

"Yuav tau nrog xyuas kom seb ho puas muaj tsoom fwv ib cov kev pab cuam twg rau tej neeg ntawd, tsis yog pheej yuav siv tej cai uas yuav ua rau muaj teeb meem rau sawv daws li peb paub uas yog cov kev tsub se roj ntawd."

"Yog li ntawd tej cai thiaj yog tej muaj lub luag hauj lwm tseem ceeb los pab tau peb kom ntxeem dhau tej xwm txheej no, thiab kuv xav tias yog ib cov kev tsub nias tsoom fwv thiab tuam txhab nyiaj faj seeb haiv ntau kawg nkaus tam sim no."

With AAP.