Australia lub chaw kwv yees thiab tshuaj ntsuam huab cua The Beureau of Meteorology tau kwv yees tseg thiab tau ceeb toom tej zaum yuamuaj huab cua kub sov heev rau lub xeev Western Australia thiab Australia cov xeev sab qab teb rau lub limpiam tom ntej no yog li tej zaum thiaj yuav ua rau muaj huab cua kub sov tshaj 45 degree Celsius, los yog tej zaum yuav muaj tej huab cua kub sov tshaj tej ib txwm kub sov txog li 12-16 Degree Celsius los kuj tau. Vim li no ces tej zaum thiaj yuav ua rau huab cua kub sov heev thiab kub tshaj li txhua xyoo dhau los los kuj tau.
Xyoo 1960 lub ib hlis ntuj ntawm Cooper Pedy sab qaum teb ntawm nroog Adelaide ntawm xeev South Australia uas khawb cov zeb nuj opal ntawd twb kub sov txog 50.7 degree Celsius diam. Ntawm Mardie ntawm Western Australia los kuj kub txog 50 degree Celsius thiab. Xyoo 2013 los Australia yeej muaj huab cua kub sov txog li 40.3 degree Celsius lawm thiab.
Ces tej zaum thiaj yuav ua rau Western Australia kub sov tshaj 40 degree Celsius thiab ua rau qee thaj chaw ntawm South Australia yuav kub sov tshaj 50 degree celsius thiab ua rau sab qaum teb xeev Victoria mus rau xeev New South Wales kub sov txog li 40-45 degree celsius los tau.
Tsis tas li no yuav ua rau muaj teeb meem cuam tshuam txog rau tej tsiaj txhu thiab tej tsiaj nruab nrag tib yam thiab tseem yuav cuam tshuam txog tib neeg txoj kev noj qab haus huv rau tej laus neeg los yog tej me nyuam yaus thiab me nyuam me uas thev thiab tiv tsis taus cov kev kub sov no tau thiab qhov tseem ceeb ces yuav ua rau muaj hav zoov kub hnyiab loj tuaj ntxiv uas tej zaum yuav muaj kev phom sij loj heev ua rau tej vaj tse, liaj teb thiab hav zoov kub hnyiab tau ntxiv los yog ua rau tej tseem kub tam sim no kub loj tuaj ntxiv los kuj tau.
