Huab tais Maha Vajiralongkorn tau hu teb chaws Thaib tias yog ''lub teb chaws cov nyom" uas yog ib cov lus tawm tswv yim rau hnub Sunday dhau los no yam tsis tau pom muaj dua los, uas tus huab tais uas tsis muaj leej twg ntsib thiab cuag tau no kuj tau qhia tias nws yeej muaj txoj kev "hlub tshua" rau txhua tub neeg Thaib tom qab tau muaj kev tawm tsam kom yuav tsum tau kho tej cai cuam tshuam txog Thaib tsev neeg huab tais los tau ntau hlis.
Tus huab tais hnoob nyoog 68 xyoo yeej yog ib tug muaj fwj chim tshaj plaws ntawm teb chaws Thaib thiab yeej tsis tshua hais lus tawm tswv yim rau tej chaw tshaj xov xwm vim yeej muaj cai los tswj kom yuav tsum ua raws kev raws cai lis tsev neeg huab tais ib txwm ua.
Cov kev txwv tsis pub tham los yog tawm tswv yim dab tsi txog tsev neeg huab tais Thaib thiaj tau txwv tej neeg Thaib tsis pub nrog huab tais tham los yog nug ib yam dab tsi txog tsev neeg huab tais vim muaj ib tsab cai nruj thiab cuam tshuam txog ntau yam heev uas yuav rau txim hnyav rau tej neeg ua rau huab tais poob ntsej muag.
Tab sis tsev neeg huab tais uas yav dhau los yeej tsis muaj leej twg yuav hais yuv tib tau ib yam dab tsi hlo li kuj ntsib teeb meem tsub nias yam tsis tau pom muaj dua los ntawm cov neeg rwg npoj tawm tsam uas nyiam txoj kev tswj hwm democracy, uas ib txhia coj ntawm tej neeg tawm tsam no yeej xav kom los kho tej cai cuam tshuam txog Thaib tsev neeg huab tais los yog muab tej cai no tso tseg tsis txhob siv ntxiv lawm.
Thai King King Maha Vajiralongkorn and Thai Queen Suthida greet royalists during a public appearance in Bangkok, Thailand, 1 November 2020. Source: AAP
Hnub Sunday dhau los ces kuj tau muaj ntau txheeb tus neeg uas nyiam huab tais Thaib kuj tau hnav tsho daj - uas yog ib tso sawv cev tias lawv fim thiab hawm tsev neeg huab tais- tau nqa huab tais Vajiralongkorn thiab nws tus niam huab tais Suthida daim duab nrog lawv mus tos nkawv ze ntawm vaj looj huab tais.
Nkawv kuj tau hla tej neeg rau sab xis sab laug mus fim tej neeg uas txhawb nqa tsev neeg huab tais, thiab ib tug neeg tshaj xov xwm rau Askiv lub chaw nthuav xov xwm tshooj 4 kuj tau cheem nws kom nres thiab nug nws txog tej neeg tawm tsam cov kev thov kom hloov kho tej cai cuam tshuam txog tsev neeg huab tais thaib.
Ces huab tais Thaib teb tias "peb yeej hlub tej neeg tag nrho tib yam," nws tau qhia li no ntau zaus rau tus neeg tshaj xov xwm ntawd thiab daim video clip no raug coj mus tso rau hauv Askiv lub chaw nthuab xov xwm Chennel 4's phau Twitter account.
Thaum nws raug nug tias puas yuav zam txim rau tej neeg tawm tsam, ces nws tau teb tias: " Teb chaws Thaib yeej yog ib lub teb chaws uas muaj kev zam txim rau tej neeg."
Lub caij uas huab tais Vajiralongkorn tau mus hla tej neeg coob heev uas yog cov neeg nyiam huab tais ces lawv kuj tau qw ib tsaug ib tsaug tias, "Peb yuav ua lub neej siab dawb siab ncaj, tab txawm peb tas sim neej los yuav tsis ntxeev siab rau huab tais" thiab qw ib tsaug ib tsaug tias kom huab tais "muaj txoj siab nyob ntev txhiab niaj tim puas xyoo!"
Tus huab tais uas muaj txiaj nplua nuj heev no kuj tau txais kev txhawb nqa los ntawm lub teb chaws no tej leem (tub rog) thiab cov tuam los pav ntau xeem uas yog cov muaj fwj chim cuam tshuam txog txhua tsav yam ntawm teb chaws Thaib.
Nws yeej tau mus nyob teb chaws Germany ntev heev, tab sis tau ntau limtiam tsis ntev los no nws kuj tau rov qab mus rau teb chaws Thaib rau hnub yug thawj hauj sam thiab ua koom txoos nco txog hnub nws txiv tau tas sim neej.
Txawm li cas los yeej muaj cov kev tawm tsam los ntev uas feem ntau yog tej hluas tau ua rau muaj ntau txheeb tus neeg mus tawm tsam ntawm tuam ceeb Bangkok uas tsheb daig coob heev los qhia txog lawv cov kev tsis pom zoo cuam tshuam nrog huab tais Thaib cov kev rov qab mus xyuas teb chaws Thaib zaum no thiab.
Txawm tias tias tsis muaj tej coj los tswj cov kev tawm tsam no, los lawv yeej tau sib koom siab los nqua hu kom yuav tsum muab Thaib tus thawj pwm tsav Prayut Chan-O-Cha, uas yog ib tug hau rog dhau los uas tau ras los ua ib tug coj tom qab tau los txeeb pej xeem nom rau xyoo 2014 ntawd rho tawm txhob pub ua nom.
Cov kev xav tau uas cov nyom
Tej neeg tawm tsam cov kev nqua hu kom muaj cov kev pauv hloov rau tsev neeg huab tais Thaib tau ua rau muaj kev tsis txaus siab los ntawm Thaib cov neeg tsis nyiam kev pauv hloov, ces thiaj tau txhawb nqa tej neeg uas nyiam huab tais Thaib kom sawv los tawm tsam.
Bin Bunleurit uas yog Thaib ib tug neeg ua yeeb yam dhau los uas tsis pom zoo nrog Thaib tej tub kawm cov kev nqua hu tau qhia tias "Peb tuaj tawm tsam no no thiab tuaj qhia txog peb txoj kev siab dawb siab ncaj rau huab tais."
Tsis tas li no los tej tub kawm kuj tau nqua hu kom yuav tsum qhia qhov tseeb txog vaj looj huab tais tej nyiaj txiaj uas nws siv - uas tus huab tais nplua nuj no tau los ua tus tswj rau xyoo 2018 - thiab tau nqua hu kom tsev neeg huab tais ''tsis txhob raus tes'' rau tej laj fai kum xeeb.
Bin tau qhia rau tej neeg tshaj xov xwm sab nraum vaj looj huab tais tias "Tsis yog ib cov kev thov kho , tab sis yog cov kev xav lauj thau tsev neeg huab tais xwb."
Ces cov kev muaj tej neeg nyiam huab tais coob zujzus tuaj thiab tau muaj cov kev tawm tswv yim nruj tsiv hauv online tsis pom zoo nrog tej neeg tawm tsam uas nyiam cov kev tswj hwm democracy thiaj ua rau tej neeg soj ntsuam xyuas tej xwm txheej no txhawj xeeb tias tsam tej neeg tsim kev kub ntxhov rau tom tej kev.
Teb chaws Thaib los yeej yog ib lub teb chaws uas tej tub rog yeej tau siv lub fwj chim los tawm tsam nrog tej neeg tawm tsam uas nyiam txoj kev tswj hwm democrcy thiab tau ua rau tau muaj tej xwm txheej nqaij ntuag ntshav nrog dhau los, thiab tej tub rog los yeej qhia meej tias nws yog tus yuav los pov puag tsev neeg huab tais.
A pro-democracy protester seen making the three finger salute during an anti-government demonstration in the Thai capital. Source: AAP
Ib cov piv txwv ntawd ces yog cov xwm txheej cuam tshuaj txog ib co tug tub kawm raug cov tub rog uas nyiam huab tais Thaib heev los yog tej tub rog uas nyiam huab tais Thaib heev tua, nkaug thiab tua tej neeg tawm tsam tsis pom zoo nrog Thaib ib tug hau rog dhau los uas yog tus coj nruj tsiv heev rau xyoo 1976 ntawd.
Txawm li cas los cov kev tawm tsam tsoom fwv dhau los no kuj tseem tau txais kev thaj yeeb li qub.
Tab sis yeej muaj ib txhia tub kawm thiab ib cov neeg tawm tsam raug txhom thiab raug rau txim - ua muaj ib txhia neeg raug txhom no kuj raug txim loj vim npaj los ntxeev tsoom fwv.
Nyob rau 2 hnub dhau los ntawd, ces kuj tau muaj ib cov coj tub kawm tseem ceeb kuj raug muab tso lawm thiab tom qab lawv tau them nyiaj xiab txim, tab sis lawv kuj tseem rov qab raug txhom dua ntxiv vim ho rov qab raug liam lwm cov txim tias tau hais lus phem thiab thuam lwm tus dua lawm thiab.
Ces thiaj tau muaj cov kev sib tawm tsam nrog tej tub ceev xwm soj xwm qab rooj thiaj ua rau lawv raug mob thiab raug coj mus kho mob rau ntawm tsev kho mob lawm.
Hmo Sunday dhau los ntawd ib tug neeg tseem ceeb ntawm 3 tug neeg Thaib uas tawm tsam tsoom fwv Thaib thiab huab tais Thaib uas yog Parit Chiwarak los yog "Penguin" yeej tseem tau cog lus hauv Facebook tias lawv yeej tseem yuav tawm tsam txuas ntxiv kom ua tau raws li lawv tej hom phiaj.
Nws tau sau rau hauv ib qhov Facebook post tias "yog lawv tsis thim ces pub yeej yuav tsis thim thiab."
Mloog tau SBSHmong rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm SBS Hmong Facebook thiab subscribe los sis yog download thiab mloog tau ntau cov podcasts (xov xwm ua suab) ntawm google podcasts, spotify, thiab apple podcasts los yog download SBS Radio App kom koj mloog tau SBS Hmong.
Share
