Tom qab tau peb xyoos uas tau tso cai rau tej neeg ntawm teb chaws Thaib muaj cai siv tau maj (Marijuana) raug cai, ces nom tswv Thaib tab tom rov qab tswj tej maj no nruj tuaj ntxiv li tau txwv tsis pub muag tej maj yog tias tsis tau ntaub ntawv yuav.
Thaib tau ras los ua thawj lub teb chaws ntawm Asia uas tau los tsis rau txim txhaum rau cov kev siv maj xyoo 2022, coj los ua cov kev txhawb nqa Thaib tej lagluam ntoj ncig thiab tej lagluam cog qoob loo ces thiaj tau ua rau muaj tej khw muag maj ntau txheeb lub tau los ua luam.
Tab sis lub teb chaws no kuj ntsib teeb meem vim tau muaj tej lus iab liam ntau yam tias cov kev tsis ua tib zoo los tswj cov kev siv maj tau ua rau muaj tej me nyuam yaus siv tej yaj yeeb no thiab tau ua rau muaj neeg quav.
Somsak Thepsutin uas yog tus nom tswj dej num noj qab haus huv tau kos xyeem mem tes rau ib tsab cai uas txwv tsis pub tej khw muag maj rau tej neeg yuav uas tsis tau ntawv yuav siv. Tsis tas li ntawd los kuj tau rov qab muag tej maj no teev tias tej paj maj yog ib co tshuaj ntsuab uas raug nom tswv tswj tsis pub siv ua dog ua dig lawm.
Yav dhau los ces Thaib pab nom Pheu Thai Party yeej tau cog lus tias yuav rov qab los muag cov tshuaj maj no ua ib co yaj yeeb txhaum cai thiab yog tsis tau ntawv raug cai siv, tab sis kuj muaj pab nom Bhumjaithai uas yog ib pab nom ntawm nws tus tsoom fwv koom tswj dhau los tawm tsam tsis pom zoo, thiab tso cai rau tej neeg siv tau yam tsis raug txim. Pab nom Bhumjaithai cov kev tsis kam koom uas tus tsoom fwv koom tswj limtiam dhau los tom qab tau muaj neeg muab cov lus uas Thaib tus thawj pwm tsav Patongtarn Shinawatra nrog Cambodia tus coj Hun Sen tham hauv xov tooj ua paim quav.
Lub hlis dhau los ces tej nom tswv thiaj tau qhia tias muaj ntau cov plaub ntug cuam tshuam nrog tej neeg ntoj ncig nyiag ua cov lagluam maj txhaum cai ntau tuaj ntxiv rau ntau hli tsis ntev los no.
Phanurat Lukboon uas yog tus coj tswj lub kooom haum Office of the Narcotics Control Board tau hais tias raws li nws lub koom haum ib co kev teeb txheeb tshawb tau tsaib no ces pom tias muaj tej neeg quav maj ntau tuaj ntxiv coob kawg nkaus tom qab uas tau tso cai rau tej neeg siv yam tsis txhaum cai.
Jirayu Houngsab uas yog tsoom fwv Thaib ib tug kis thiaj tau hais tias lub tuam chav tswj dej num noj qab haus huv tau tswj cov kev muag maj nruj heev vim ''tau muaj ntau lub khw tau qhib muag maj haus ua kev lom zem thiab muag siv ua tshuaj, ces thiaj ua rau tej me nyuam yaus thiab tej neeg sawv daws muaj peev xwm yuav tau yooj yim, uas yog tej yam cov nyom nrog tsoom fwv tej hom phiaj tawm tsam nrog yaj yeeb txhaum cai.''
Tau muaj ib co koom haum uas txhawb nqa cov kev siv maj tau hais tias yeej yog cuam tshuam txog tej laj fai kum xeeb thiaj ua rau rov qab hloov tej cai no.
Pawg neeg no tau hais tias lawv yuav mus rwg npoj ntawm lub tuam chav tswj dej num noj qab haus huv lub hlis tom ntej no los tawm tsam tsis pom zoo nrog cov kev pauv hloov tshiab no thiab uas yuav rau txim rau tej neeg siv thiab tej neeg muag tej maj no.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
