Tsoom fwv tau tso tseg tsis ua raws li ntau cov kev pauv hloov txog cov yuav tsub se rau cov nyiaj khwv tau uas tau ntau tuaj ntxiv tab sis tseem tsis tau muag thiab kho cov tax concessions rau tej neeg muaj nyiaj superannuation ntau tom qab tau muaj ntau yam kev txhawm xeeb ua ntuv zus ntawm tej lagluam thiab tej economists.
Hnub zwj Hli (Monday) thaum uas tus nom tswj nyiaj txiaj Jim Chalmers tau nrog tej neeg nthuav xov xwm tham ntawd ces nws kuj tau qhia txog 6 cov kev pauv hloov rau tej nyiaj superannuation uas tsoom fwv pawg nom tseem ceeb tau xub kos xyeem mem tes pom zoo ntau teev thaum ntxov.
Tom qab tau muaj cov kev txheeb tej superannuation lawm, ces tsoom fwv koj muaj cov kev zam zum ob rau tej nyiaj superannuation, li tsuas tsub se 40 feem pua rau tej nyiaj super tshaj AUD$10 million xwb.
Thiaj tau muaj cov kev pauv hloov no rau lub caij uas yuav teev tias puab tej neeg muaj nyiaj super npaum li cas nrog cov kev yuav ua raws li lub tswv yim thaum xub uas yuav tsub se 30 feem pua rau tej neeg muaj nyiaj super tshaj AUD$ 3 million.
Ob cov kev tsub se rau tej nyiaj super no ces yuav xam raws cov kab theem nyiaj poob nqe coj los daws tej kev txhawj xeeb ntawm tej neeg Australia coob tuaj ntxiv uas tej zaum yuav ua rau lawv muaj tej nyiaj super ntau tuaj ntxiv ntau tshaj qhov tau teev tseg vim cov kev pub tej neeg no khwv tau nyiaj hauj lwm ntau tuaj ntxiv.
Thiaj muaj tej kev pauv hloov ntau yam suav cov kev tsis tsub se rau tej nyiaj khwv tau ntau tuaj ntxiv tab sis tseem tsis tau muag lawv tej asset (taxing on unrealised capital gains) ua Chalmers tau hais tias ''yog ib co tseem ceeb" uas ua rau muaj nee tib ntau heev, thiab cia siab tias cov kev tso tseg tsis tsub tej se no ''yuav tsis muaj chaw yeb tab sis yuav tau txhawb'' cov kev hloov tshiab no.
Tej neeg Australia uas khwv tau nyiaj tsawg los kuj yuav pom ib co kev pauv hloov rau lawv tej super tax offset, uas nce ntawm $500 mus ua $810 rau lub caij tsoom fwv xyuas kom siv tau cov eligibility criteria kom ntuav dav tshaj qub ntxiv ntawm $37,000 cut-off mus ua $45,000.
Chalmers tau hais tias tsoom fwv yeej tau ua tib zoo txheeb txog tej lus tawm tswv yim ntawm tej kws paub tej lagluam suav tej lus tawm tswv yim tham txog lagluam lub 8 hli ntuj (Economic roundtable in August) nrog.
Nws tau qhia rau tej neeg nthuav xov xwm ntawm Canberra hnub zwj Hli (Monday) tias "Peb lub hom phiaj ces yog ua kom tau cov kev pauv hloov no, thiab siv tau cov kev sau se uas ncaj ncees rau sawv daws tsis hais tej neeg muaj nyiaj ntau mus rau tej muaj nyiaj tsawg."
"Thiab yuav pab kom tau txiaj ntsim zoo rau tej neeg khwv tau nyiaj tsawg tshaj plaws thiab yog ib cov kev hloov uas siv tau zoo rau tej neeg muaj nyiaj super ntau tshaj plaws thiab. Ces thiaj yog tej yam zoo raws li peb xav."
Chalmers tau qhia txog qhov tseem ceeb tias "Tej neeg khwv tau nyiaj tsawg yuav tau txais txiaj ntsim 14 npaug los ntawm cov kev kho tej super no dua qhov yuav muaj teeb meem rau lawv los ntawm tej kev hloov tej se uas tsim tau zoo dua coj los zam cov kev tsub se uas siv tsi ntsees no."
Dab tsi yog 6 cov kev pauv hloov rau tej superannuation?
- Txim tim 1 July 2027 mus ces tej neeg Australia uas khwv tau nyiaj txij li AUD$28,000 thiab $45,000 yuav tau $810 offset rau lub caij thov se.
- Tej nyiaj superannuation uas muaj tshaj $10 million yuav tau them se 40 feem pua, nrog rau cov muaj nyiaj super tshaj $3 million ces yuav tau them se txog li 30 feem pua.
- Ob co nyiaj super uas muaj $3 million thiab $10 million no yuav raug xam taws li cov nyiaj poob nqe rau lub caij uas tseem tso cai rau tej neeg ua hauj lwm over time coj los daws cov xwm txheej uas khwv tau nyiaj ntau yuav tau them se ntau ib xyoos twg (bracket creep).
- Cov kev hloov tshiab no yuav tsis siv rau tej nyiaj khwv tau ntau tuaj ntxiv uas tseem tsis tau muag tej asset.
- Tej kev hloov no yuav raug muab ncua ib xyoos txog rau lub 7 hli ntuj xyoo 2026 kom muaj caij sab laj, tsuas tsis ua tib yam li no rau tej neeg khwv tau nyiaj tsawg cov tax offset xwb.
- Txuas sij hawm kom zam tej kws txiav txim plaub ntug teb chaws thiab kws txiav txim plaub ntug xeev.
Greens liam Labor tias raug 'tsub nias'
Chalmers tau hais tias nws yeej tau muaj ib co kev sib sib tham nrog Larissa Waters uas yog Greens tus coj txog tej kev pauv hloov no tom qab uas tsoom fwv pawg nom tseem ceeb tau sab laj thiab cia siab tias ''yuav tham tau lus tseem ceeb'' nrog pab nom no.
Sarah Hanson-Young uas yog ib tug nom kis xeev siab ntawm pab nom Greens tau hais tias Chalmers raug yuam kom ''coj ib nyuag ntaug zog'' rau nws cov kev kho se vim ''raug tsub nias'' ntawm tej lagluam loj thiab tej neeg nplua nuj tshaj plaws, tab sis nws pab nom yeej zoo siab rau tej kev txo se rau tej neeg ua hauj lwm khwv tau nyiaj tsawg.
Nick McKim uas yog ib tug nom kis xeev siab (Senator) ntawm pab nom Greens tau hais tias tsoom fwv tsis muaj peev xwm tsub se rau tej neeg nplua nuj. Source: AAP / Mick Tsikas
"Labor tau tso tseg tsis tsub se rau tej nyiaj khwv tau ntau tuaj ntxiv uas tseem tsis tau muag lawv tej assets thiab tsuas xam tej nyiaj super AUD$3 million no raws cov nyiaj poob nqe xwb, uas yog ib co khoom plig rau tej neeg uas nplua nuj heev uas ua rau yuav tau siv tej nyiaj puag xyoo ntau billion dollars.
"Nod ces yog cov kev qhau hau rau tej neeg nplua nuj tshaj plaws ntawm lub teb chaws no, thiab yog cov kev xuas ncuav pias rau txhuas tus neeg them se phlu.''
Ua ke no los Ted O'Brien uas yog tus nom tswj nyiaj txiaj rau lwm pab nom teb chaws tau hais tias Labor cov kev hloov nws cov kev tsub se rau tej nyiaj super no ''yog ib cov kev muaj yeej rau txhua tus neeg Australia uas ua hauj lwm txhua hnub."
"Pab nom koom tswj yeej nyeem tej xov xwm kom ntxaws ua ntej yuav xaus ib co lus dab tsi, uas yeej ib txwm yog tej txheej txheem uas peb ua,"
"Peb yeej tau tsis pom zoo txhua theem. Thiab kuv xav hais hnub no tias tus tsoom fwv Labor uas xav tsub se heev no tej tswv yim no yog ib co kev muaj yeej rau pab nom koom tswj."
