Raws li tau muaj ib cov kev teeb txheeb tshiab qhia ces tej ntawv los qhia rau tej khoom noj uas tsis qhia meej tseeb thiab tsis siv ua ntuv zus tab tom ua rau tej cuab yig nkim zaub mov ntau heev, thiab ua rau ib yig twg poob nyiaj txog xam raws tus zauv nrab txog li $2,5000 ib xyoos twg los ntawm cov kev muab tej zaub mov pov tseg.
Cov kev teeb txheeb ntawm tsev kawm qib siab RMIT University thiab lub koom haum End Food Waste Australia pom tias Australia tau muab tej zaub mov pov tseg ib xyoos twg txog li 7.6 million tonnes, uas tej zaub mov no feem ntau yeej tseem zoo noj.
Tej kws teeb txheeb thiaj nqua hu kom yuav tau kho haiv neeg no tej ntawv lo rau tej khoom noj, thiab qhia kom meej kiag tias hnub twg ib yam khoom twg thiaj tsis zoo noj lawm, thiab sau tej ntawv kom loj zog, thiab siv tej cim yooj yim pab kom tej neeg yuav khoom noj nkag siab tias khaws tau tej khoom noj cia ntev npaum li cas thiab tsim nyog yuav khaws cia li cas.
Professor Lukas Parker ntawm RMIT hais tias cov kev teeb txheeb no hais tias vim cov kev tsim tej ntawv los rau tej khoom noj no tsis tshua zoo thiab tsis ua tib zoo xyuas kom siv tau xwm yeem yog ib co txuam thawj tseem ceeb ua rau nkim zaub mov pov tseg.
Nws tau hais tias ''Peb tseem tab tom ntsib tej nuj nqe siv ua neej ntau yam thiab tej neeg los yeej xav ua tib zoo xyuas kom muaj peev xwm nrhiav tau zaub mov rau lawv tsev neeg noj,''
''Tab sis tej ntawv los rau tej khoom noj no kuj ua rau muaj teeb meem rau lawv vim lawv tsis muaj peev xwm yuav txiav txim siab tias yuav ua li cas. Ces cov kev nkim no thiaj yog tej yam kev puas tsuaj loj — thiab ua rau ib yig twg nkim tej khoom noj txog li 2kg ib limtiam twg pov tseg. Tsis yog tias ua rau tej neeg poob nyiaj xwb, tab sis tseem ua rau muaj teeb meem rau peb tej neeg cog qoob loo thiab muaj teeb meem rau peb tej ib puag ncig thiab.''
Cov kev teeb txheeb no thiaj hais tias cov kev kho me ntsis tias seb tsim nyog qhia tej xov xwm lo rau tej khoom noj no li cas, li qhia kom meej kiag tias ''zoo noj ua ntej hnub twg'' thiab ''noj tau/siv tau'' txog hnub zwj thaj (dates) twg kiag, kuj yuav yog tej yam uas pab tau tej neeg yuav khoom noj txiav txim siab tias seb yam zaub mob ntawd puas tseem zoo noj.
Vim li cas tej ntawv lo rau tej khoom noj tam sim no thiaj siv tsis tau hauj lwm
Qhov teeb meem uas tej kws teeb txheeb tshawb tau ces yog muaj ob yam: thawj yam ces ua rau neeg Australia yoob txog qhov sib txawv ntawm lo lus ''use by'' thiab ''best before'' dates, thiab lawv cov kev tsis muaj peev xwm yuav nrhiav tau los yog nyeem tau cov hnub zwj thaj (dates) ntawm daim ntawv los qhia rau yam khoom noj ntawd thiab nyob qhov twg.
Parker tau hais tias "Tej neeg feem coob yeej totaub tias lo lus 'use by' txhais tias tej zaum yam zaub mob ntawd yuav tsis tau txais kev nyab xeeb lawm yog yus noj,''
''Tab sis lo lus 'best before' mas haj yam yog lo cov tshaj ntxiv thiab. Thiaj ua rau tej neeg coob heev tau muab ib yam zaub mov twg pov tseg vim rau qhov twb dhau hnub uas qhia tias noj tau lawm, txawm tias yam khoom ntawd tseem yog ib yam zoo noj.''
Cov kev teeb txheeb no kuj tseem qhia txog cov kev meem txom heev rau cov kev nrhiav seb hnub twg yog hnub uas yam khoom noj ntawd tsis zoo noj ntawm daim ntawv lo qhia rau pob khoom noj ntawd, thiab tej zauv qhia los kuj yog ib co ntawv thiab cov zauv uas sau me heev (tsis tshua pom tseeb/nyeem tsis tshua tawm), yog tham txog cov hnub zwj thaj (dates) uas sau/ntau rau ntwm tej ntug fwj.
Parker tau hais tias "Pheej yuav tau ua tib zoo nrhiav mas thiaj nrhiav tau thiab thiaj totaub txog cov hnub zwj thaj qhia tias pob khoom ntawd tsis zoo noj uas sau rau ntawm daim ntawv lo rau tej khoom ntawd, ces tej xwm txheej no thiaj haj yam ua rau nyuaj tshaj qub ntxiv rau tej neeg yuav paub tau tias yog li cas tiag.''
Txawm tau muaj tej neeg yuav khoom cov kev txhawb nqa kom yuav tsum tau los tej ntawv kom tseeb tshaj qub ntxiv rau tej khoom noj, los tej kws teeb txheeb yeej tseem tau txheeb tau tias tej tuam txhab lagluam tsim khoom noj yeej tseem ua xyem xyav tsis xav hloov dab tsi li thiab.
Nyob rau ib co workshops uas tau ua ntawd ces pom tias tej neeg tsim zaub mov thiab tej khw muag tej khoom noj no yeej tau qhia txog lawv cov kev txhawj xeeb tias yuav muaj ntau yam nqe, thiab yuav tau ua raws li nom tswv hais kom ua thiab yuav tau ua raws tej cai teev tseg.
Tristan Butt uas yog tus coj lub koom haum xaus Australia cov kev nkim zaug mov (End Food Waste Australia) tau hais tias tsuas yog txhua tog ntawm cov lagluam supply chain los koom tes ua ke xwb mas thiaj yuav muaj peev xwm kho tau tej ntawv lo rau cov khoom noj uas pab kom txo tau cov kev nkim tej khoom no xwb.
Butt tau hais tias ''Cov kev sau/ntaus hnub zwj thaj kom pom tseeb tseeb kiag thiab ua li no ua ntuv zus xwb thiaj li yuav yog ib lub tswv yim uas txuag tau nyiaj thiab yog tej xub ke yuav siv tau nthuav dav coj los pab ko tej cuab yig tsis txhob nkim zaub mov pov tseg, tab sis yuav tsis muaj tej xwm txheej no tshwm sim yog tias tej lgluam tsim thiab xa zaub mob no tsis koom tes ua ke.''
''Tib cov kev hloov no xwb tej zaum kuj yuav muaj peev xwm tiv thaiv kom tsis txhob nkim 1 million tonnes zaub mov pov tseg mus txog xyoo 2030.''
''Teb chaws Askiv tej lagluam uas muag khoom thiab services twb yeej tau qhia lawm tias muaj peev xwm ua tau cov kev pauv hloov no yam tsis muaj teeb meem dab tsi rau cov kev nyab xeeb rau tej zaub mov noj. Thiaj txog caij lawm uas peb yuav tau ua tib yam li lawv tau ua thiab.''
Tej lagluam xav tau txais kev taw qhia, thiab tsoom fwv hais tias tseem yuav muaj cov kev pauv hloov tshiab
Tej workshops yeej tau qhia lawm tias tej tuam txhab tsim zaub mov thiab tej chaw muag khoom/services yeej ua xyem xyav tsis xav los ua tej hauj lwm no kheej, vim ntshai tsam yog yus xub pib hloov ces yuav ua rau yus plam txiaj ntsim nyiaj txiaj los yog ua rau yus tsis muaj peev xwm sib tw lagluam.
Parker tau hais tias ''Vim zoo li sawv daws pheej tseem tos seb puas muaj ib tug twg xub pib ua ntej tso,''
"Tsoom fwv los yeej xav kom tej lagluam nqes tes los hloov, thiab tej lagluam losyeej xav tau txais kev taw qhia kom meej tseeb los ntawm tsoom fwv thiab.''
Txawm tias tseem muaj tej xwm txheej khuam ntab khuam ntuv li no, los Parker yeej hais tias sawv daws yeej txhawb nqa kom yuav tsum tau los nrog xyuas tej ntawv los qhia rau tej khoom no kom pom tseeb tshaj qub ntxiv thiab.
The next phase of the National Date Labelling and Storage Advice Project will bring together government and industry partners to test and co-design clearer labelling.
Tej ntawv los rau tej khoom tsim nyog yuav qhia meej
Tej kws teeb txheeb hais tias cov kev ua tib zoo los tsim kom tau tej ntawv los rau tej khoom kom pom tseeb dua yog tej yam tseem ceeb tshaj cov kev los qhia tib zaug rau tej neeg kom paub txog tej no.
Parker tau hais tias ''Tej ntawv zoo uas coj los lo qhia rau tej khoom ntawd tsim nyog yog tej qhia meej kiag lawm uas tsis tas yuav tshab txais dab tsi ntxiv lawm,''
''Cov kev qhia tej neeg yeej yog tej yam zoo los mas, tab sis tej neeg yuav tsum nco tau mas thiaj yuav siv tau hauj lwm xwb. Yog li thiaj xav kom tsim tej ntawv no kom tej neeg pom tau yooj yim yog thaum lawv nthos ib yam khoom dab tsi coj los saib.''
Ces cov project no thiaj yog ib co twj coj los sim tej neeg cov qhov muag tias seb tej neeg yuav khoom siv ho xav li cas yog thaum nyeem tej ntawv los rau tej khoom noj ntawd.
Parker tau hais tias "Tsis yog phej ua kom tej neeg mloog tias zoo li lawv yog tus txhaum. Tab sis tsuas yog ib lub tswv yim coj los pab lawv kom lawv ntseeg siab rau cov kev txiav txim siab thiab pheej tsis txhob muab tej zaub mov tseem zoo noj pov tseg hauv tej thoob rau khoom seem txeej xwb.''
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
