Cov kev hloov yuav tej khoom muaj brands zoo los yuav cov home brand tej zaum kuj yuav pab tej neeg yuav khoom txuag tau ntau txheeb dollars ib xyoos twg raws li ib lub vas sab piv cov kev siv nyiaj txiaj hais.
Cov kev tshuaj ntsuam tshiab ntawm Compare the Market qhia tias neeg Australia siv nyiaj txog li ntawm $200 ib limtiam twg xam raws tus zauv nrab mus yuav khoom ntawm tej khw supermarket, tab sis tej zaum lawv kuj yuav muaj peev xwm txuag tau txog li ntawm $80 rau cov kev yuav khoom thiab.
Cov kev piv tej nqe khoom 20 yam ntawm ob lub khw supermarket loj ntawm tej khoom kim dua thiab pheej yig dua ces kuj txheeb tau tias tej zaum yuav pab txuag tau nyiaj txog li ntawm $4,212 ib xyoos twg.
Dab tsis yog tej nqe sib txawv txav loj tshaj plaws?
Lub koom haum Compare the Market kwv yees tias neeg Australia yeej siv nyiaj txog li ntawm $198.16 yuav khoom ib limtiam twg los sis siv nyiaj txog $858.69 ib lub hlis twg thiab siv nyiaj yuav khoom ib xyoos twg txog li $10,304.32.
Phillip Portman uas yog tus kis ntawm lub koom haum Compare the Market tau qhia rau SBS News tias tej zaum tej neeg kuj yuav muaj peev xwm txuag tau lawv tej nyiaj siv yuav khoom txog ib nrab yog lawv tig mus yuav cov khoom home brand siv, uas yog cov khoom pheej yig dua txog li 49 feem pua piv rau cov khoom brands uas nto npe thiab kim dua.
Nws tau hais tias "Tej khoom noj nto npe li tej mov mog, mis, qe thiab mis khov ces raug nyiaj txog li ntawm $164, tab sis yog yuav tej khoom no raws li cov home brand xwb ces tsuas tau them txog li ntawm $83 xwb. Ces thiaj txuag tau nyiaj ntau heev thiab tej zaum kuj yuav txuag tau ntau tshaj qhov peb xav lawm thiab."
Cov kev hloov yuav tej khoom brands kim tig mus yuav cov home brand uas pheej yig tej zaum yuav pab kom txuag tau nyiaj $23 rau cov hmoov tshuaj ntxhua khaub ncaws, los yog tsuas tau them $9.50 rau cov kasfes 200g, thiab tau them $7.20 rau cov tshuaj ua kua ntxhuav ib ce, tau them $6 rau cov tshuaj ua kua 500ml yaug qhov ncauj, thiab tsuas tau them $5 rau 750 ml rau tej multiple purpose cleaning spray xwb.
Lub koom haum Compare the Market cov kev teeb txheeb lub 8 hli ntuj tau txheeb tau tias tej zaum tej neeg muaj peev xwm txuag tau nyiaj txog li $4,212 ib xyoos twg yog lawv hloov ntawm cov kev yuav tej khoom brand kim mus yuav cov khoom home brand uas pheej yig dua ntawm tej supermarket. Source: SBS
Tib qho nyuaj ces tsuas yog tsis tshua muaj ntau yam rau yus xaiv yuav xwb. Browne tau hais tias cov kua txiv lws suav home brand ces tsuas muaj txiv lws suav nkaus xwb, hos cov brands kim ces tsuas muaj tej txuj lom li zaub txig theem, qej los yog lwm yam coj los tov xyaws kom qab dua xwb.
Tej zaum ces tus nqe sib txawv tsuas nyob rau ntawm seb lawv ho xyaw dab tsi ntxiv rau yam khoom ntawd los yog ho siv tau yam khoom ntawd yooj yim li cas xwb — piv txwv li tej txiv lws suav ntim thawv hlau uas muaj ib lub voj hlau qhib thiab cov uas tsis muaj lub voj hlau rub kom qhib tau.
Tej khoom twg yog cov pheej yig dua?
Portman tau hais tias muaj tej nqe sib txawv ntau tshaj plaws rau tej txhee khoom siv tu tus kheej.
Nws tau hais tias "Yog tias yus ua tib zoo xyuas kom yus yuav tau tej khoom siv ntau yam tsis hais tej tshuaj da dej thiab tej kua tshuaj yaug qhov ncauj, ces peb kuj pom tias yuav txuag tau nyiaj ntau tshaj plaws thiab. Tsis tas li ntawd los tej khoom siv coj los so, ntxuav thiab txhuam tu tsev los yog ib qho qhov twg kuj yog ib co khoom uas tej nqe kim dua thiab sib txawv heev,"
"Tej ntaub ntxuav tais, tau ntau so, tej tshuaj/twj so pem teb, yog tej uas yuav pab yus txuag tau nyiaj ntau heev yog tias yuav kam hloov mus siv tej pheej yig dua."
Tej khoom uas txuag tau nyiaj tsawg tshaj plaws ces yog cov khoom noj home brand ntau yam.
Tej zaum yus tsuas txaug tau txog li 30 cents rau tej taum tsau khov, txuag tau tej mis muag (butter) thiab txuag tau 75 cents rau tej mis qaub (yoghurt).
Vim li cas tej khoom home brand thiaj pheej yig dua?
Sarah Megginson uas yog tus kis tswj tej media ntawm lub vas sab Finder uas piv cov kev siv nyiaj txiaj, yeej xub tau qhia rau SBS News tias muaj ntau yam laj thawj tias vim li cas tej khoom home brand thiaj pheej yig dua cov brands khoom uas tej neeg nyiam siv dua.
Tej zaum kuj vim yog tsis tau them tej nqe qhwv thiab ntim, muaj tej kev cuam tshuam nrog tej supply chain tsawg dua, thiab tej zaum kuj muaj tej khoom ntawd tsawg dua, los sis tej nqe qauv tsim tej khoom ntawd pheej yig dua. Tab sis qhov tseem ceeb tshaj plaws ces yog tsis tau siv nyiaj ntau los haub tau yaum khoom ntawd kom tau kiab khw lagluam kom tau muag.
Nws tau hais tias "Tej brands khoom sawv daws nyiam siv thiab paub zoo yeej tau siv nyiaj ntau heev los tsim cov brands ntawd, siv nyiaj ntau los haub tau yaum tej khoom ntawd rau ntiaj teb, tsis tas li ntawd los lawv tseem yuav tau them nyiaj me ntsi rau lub khw Woolworths thiab kom tau 'txee muag' lawv tej khoom ruaj uas nyob siab thiab ncaj kiag rau theem yus qhov muag pom, los yog tso lawv tej khoom muag rau ntawm qhov kawg ntawm ib kab txee muag khoom twg,"
"Tej khoom home brand ces yeej tsis siv nyiaj nqes peev rau tej li hais no ntau — thiab tej khoom no yeej raug tso rau hauv qab txee kawg nkaus xwb, uas yeej tsis tso xyaw nrog tej khoom brands kim li."
Yog xam rau tej khw supermarkets lawm ces tej khoom home brand yog ib co khoom pheej yig rau tej neeg yuav khoom siv xaiv yuav, tsis tas li ntawd los kuj yog tej khoom pab kom tej khw khwv tau nyiaj tsam ntau ntxiv thiab.
Browne tau hais tias ''Tej supermarkets yeej nyiam cov khoom home brands heev vim rau qhov yog tej khoom lawv tsim rau lawv tej khw coj los muag,"
"Peb yeej tau pom tias tau muaj kev pauv hloov tseem ceeb rau tej khw supermarkets ntawm teb chaws Australia no. 10 los yog 12 xyoos dhau los, ces yeej muaj ntau cov khoom brand name dua. Tam sim no ces peb tau pom tias tau muaj kev pauv hloov ntau heev li tau pom tej supermarket tej brand khoom ntau zuj zus tuaj ntxiv lawm, kom lawv khwv tau nyiaj ntau tuaj ntxiv."
Lwm cov xub ke pab txuag nyiaj
Portman tau hais tias yeej muaj lwm yam xub ke ntau yam pab txuag kom tsis txhob siv nyiaj ntau yuav khoom noj yog tias yus npaj ua ntej yuav mus yuav tej khoom ntawd.
Nws tau hais tias "Kom npaj siv tej khoom txo nqe pheej yig zog coj los ua tej pluas hno noj. Ua tej zaum yuav tau mus yuav tej khoom noj ntawm ntau lub khw tsis yog pheej yuav tej khoom ntawm tib lub khw nkaus xwb,"
"Peb yeej ib txwm txhawb nqa kom tej neeg sawv daws siv ntau txoj xub ke yuav khoom kom thiaj pab lawv txuag tau nyiaj."
Nws thiaj xav kom yus txheeb tej nqe ntawm ib yam khoom twg dhau los thiab txheeb kiag tus nqe muag kiag ib yam khoom ntawd seb muag tus nqe li cas tiag.
"Tej kev ua li ntawd yuav pab kom yus totaub zoo dua tias seb puas yuav tsawg tsawg xwb, los sis puas yuav kom ntau ntau kiag kom thiaj txuag tau nyiaj dua."
— Alexandra Koster koom nthuav zaj xov xwm no.
