This article is more than 3 years old
Explainer
Tsab cai Religious Discrimination Bill yog dab tsi thiab tej zaum yuav muaj tau teeb meem dab tsi rau Ausralia?
Tsoom fwv npaj tias yuav rov qab los thov tsim tsab cai religious discrimination hauv tsev tsoom fwv ua ntej yuav xaus rau lub xyoo no, tab sis kuj tseem muaj 2 tog neeg uas pom zoo thiab tsis pom zoo nrog tsab cai no muaj kev sib teev theev muaj ceem kawg nkaus li thiab.
Published
By Caroline Riches
Presented by Vixay Vue
Source: SBS News
Image: Protestors during a rally to protest against the Religious Discrimination Bill at Sydney Town Hall in 2019. (AAP)
Rov qab muaj cov kev sib cav txog “txoj kev ywj pheej rau kev coj ntseeg” muaj ceem heev li, rau lub caij uas Michaelia Cash uas yog tus kws lij choj teb chaws tseem yuav coj tsab cai Religious Discrimination bill coj los sab laj hauv tsev tsoom hwv rau thaum yuav xaus xyoo no.
Ntau cov tsev teev ntuj - kuj xav kom tsim tau tsab cai los los ua ib tsab cai siv ua ntej yuav muaj cov kev xaiv tsa tsoom fwv teb chaws tshiab thiab - vim lawv ntseeg tias yuav tau txais kev pov puag rau cov neeg ntseeg kom lawv thiaj ua tau lub neej ywj pheej rau lub caij uas tseem muaj teeb meem rau txoj kev 'ywj pheej no."
Tab sis tej neeg uas tsis pom zoo nrog tsab cai no hais tias tsuas pab kom tej neeg ntseeg tau txoj cai thiab xub kub siab txog tej kev ntseeg tej cai xwb tab sis yuav ua rau muaj teeb meem rau tej neeg LGBTQI, tej poj niam, tej neeg ntseeg zejzog pawg tsawg thiab tej neeg puas cev.
Yog li hos muaj tej lus tseem ceeb dab tsi cuam tshuam txog cov kev tsim tsab cai Religious Discrimination Bill no, thiab yog vim li cas thiaj xam tias tseem ceeb es thiaj ua rau muaj cov kev sib cav pom zoo thiab tsis pom zoo los txhawb nqa rau cov kev xav thov tsim tsab cai no?
Vim li cas thiaj muaj tsab cai no tshwm sim?
Thaum uas tej neeg Australia tau tawm suab pom zoo los tso cai rau cov neeg same-sex sib yuav tau ua txij nkawm xyoo 2017 ntawd, ces kuj tau ua rau tej coj ntawm cov kev coj ntseeg, tej nom tswv, tej neeg tawm tsam uas pov puag thiab txhawb nqa cov neeg same-sex cov kev ua txij nkawm txhawj tias yog ib cov kev cov nyom nrog rau lawv cov kev ntseeg. Kuj muaj ib txhia txhawj tias tsam tej koom haum li tsev teev ntuj, teej kawm thiab tej chaw ua hauj lwm ho yuav siv tsab cai tshiab no siv tsab cai no los tsav lawv tej fwj chim, los yog xav tias ntshai tsam ua rau lawv tsis muaj peev xwm koom tau lawv cov kev ntseeg thiab tsis muaj peev xwm tawm tau tswv yim txog lawv cov kev ntseeg yam ywj pheej.
Tej kev sib cav no thiaj li tau ua rau Malcolm Turnbull uas yog Australia tus qub thawj pwm tsav dhau los tau hais kom Philip Ruddock uas yog ib tug nom ua hauj lwm rau tus tsoom fwv Howard los ntev mus txheeb xyuas 'cov kev ywj pheej' ntawm tej kev ntseeg ntawm teg chaws Australia no.
Ces thiaj li tau coj tsab ntawv cej luam txog cov kev txheeb xyuas txog cov kev ywj pheej rau cov kev coj ntseeg (Report of the Religious Freedom Review) rau lub 12 hlis ntuj xyoo 2018, rau lub caij uas Scott Morrison ua thawj pwm tsav - uas nws tus kheej los yeej yog ib tug neeg uas los pov puag tej kev ntseeg txoj kev 'ywj pheej' thiab. Ces tsab ntawv cej luam no thiaj txheeb tau tias Australia tej cai tsim nyog yuav pov puag thiab txhawb nqa kom muaj 'kev ywj pheej' rau cov kev ntseeg zoo tshaj qub ntxiv.
Tsoom fwv teb chaws thiaj tau tsim ib tsab cai los tswj cov kev "ywj pheej" rau tej kev ntseeg, cov cai li Religious Discrimination Bill, Religious Discrimination (Consequential Amendments) Bill, thiab Human Rights Legislation Amendment (Freedom of Religion) Bill.
Tsoom fwv los kuj tau los sab laj nrog zej tsoom sawv daws 2 zaug txog cov kev xav thov tsim tsab cai no, uas Michaelia Cash uas yog tus kws lij choj teb chaws tam sim no kuj tau rov qab los txheeb ua zaum 3 dua kom zej tsoom thiaj tsis txhob tawm tsam tsis pom zoo thiab kom thiaj tsis txhob muaj cov kev tsis pom zoo hauv pab nom koom tswj.
Thiab kuj yuav coj tsab cai no mus sab laj hauv pab nom koom tswj ua ntej yuav coj mus sab laj hauv tsev tsoom fwv txuas ntxiv.
Tab sis kuj muaj xov xwm qhia tias nom tswv tau los tshem qee yam hauv tsab cai no rau lub sij hawm 1 limtiam ua ntej yuav coj mus sab laj rau lub caij uas tsev tsoom fwv rov qab pib ua hauj lwm dua, coj los ua ib co kev tiv thaiv kom tsis txhob muaj kev sib cov nyom thiab tsis pom zoo nrog qee yam ntawm tsab cai no.
Attorney-General Michaelia Cash is now consulting on a third iteration of the draft legislation of the Religious Discrimination Bill. Source: AAP
Tsab cai no muaj lub ntsiab lus dab tsi rau rau tej neeg Australia?
Tsab cai Religious Discrimination Bill yeej muaj lub hom phiaj yuav los txwv tsis pub faib cais ib tug twg rau ntawm zej tsoom tej chaw tsis hais tej chaw ua hauj lwm, tej teej kawm, clubs thiab tej chaw kho mob uas cuam tshuam txog ib tug neeg twg cov kev ntseeg, los yog tej hauj lwm lawv ua, suav tej neeg uas ntseeg los sis tsis muaj kev ntseeg nrog tib si thiab.
Nyob rau cov kev txheeb pej xeem xyoo 2016 yeej txheeb tau tias muaj tej neeg Australia txog li 61% los sis yog 14 million tus neeg yog cov uas coj ib yam kev ntseeg dab tsi uas tau nqes ntawm 68% rau xyoo 2011 lawm.
Thiab muaj tej neeg Australia txog li 86% ntawm cov neeg uas ntseeg ib hom kev ntseeg twg ntawd ces yeej yog cov neeg Christians, hos muaj cov neeg Muslims yog cov pawg ntseeg coob ua zum 2, dua ntawd ces yog cov neeg ntseeg hauj sam (Buddhists) thiab cov neeg ntseeg kev cai Hinduism.
Nqe cai teev txog "Israel Folau”
SBS News yeej nkag siab tias tsoom fwv tau tshem qee yam tseem ceeb uas lawv hu ua “Folau Clause” uas yog ib nqe uas yuav pab kom tej neeg muaj cai ntau tuaj ntxiv tawm tswv yim txog ib yam dab tsi raws li lawv cov kev ntseeg tau.
Tos ho muaj nqe cai no los twb vim yog Israel Folau uas yog ib tug neeg ncaws pob Rugby raug muab rho tawm tsis pub sib tw rau xyoo 2019 vim nws tau sau ib cov ntawv hauv nws phau instagram account thuam 'tej neeg qaug cawv' thiab 'cov neeg homosexual', thiab tau ceeb toom rau tej neeg no tias 'lawv yuav poob rau dab teb'.
Ces thiaj cia siab tias tsab cai no yuav pov puag tej neeg ntiag tug kom tsis txhob raug muab rho tawm hauj lwm yog tias lawv tawm tswv yim cuam tshuam txog ib yam dab tsi raws lawv cov kev ntseeg.
Tab sis tsab cai uas raug txheeb dua tshiab no tseem muaj ib nqe yuav ua tib zoo xyuas kom yog ib cov kev ua txhaum cai yog tias tseem muaj ib lub koom haum twg rau txim rau ib tug neeg uas tej zaum tawm tswv yim ua rau lwm tus tu siab thiab.
Qhov no txhais tau tias tej zaum tsab cai no yuav ua rau ib tug tswv lagluam twg twg muaj peev xwm xaus daim ntawv contract ntiav ib tug neeg ua hauj lwm twg tau thiab tab sis tsab cai no kuj yuav tiv thaiv kom tus neeg uas raug rho tawm ntawd muaj cai mus ua tau hauj lwm rau tus tswv lagluam tshiab thiab.
Tej neeg kho mob cov yam ntxwv coj
Tsoom fwv yeej tau tshem qee yam ntawm tsab cai uas xav thov tsim tshiab no uas tej zaum yuav tso cai rau tej neeg kho mob tsis kam kho ib tug neeg twg yog tias 'cov nyom nrog lawv cov kev xav' lawm.
Ces thiaj li tau muaj cov kev txiav txim siab no tom qab tej neeg kho mob tau yws tias tsab cai no yuav ua rau muaj teeb meem rau cov kev rho me nyuam tawm, tej xub ke pab kom txhob muaj me nyuam los yog lwm cov kev kho mob.
Thaum xub mas tsab cai no yeej tau teev tias tej kws kho mob, nurses, midwives thiab tej kws tshuaj yeej muaj cai tsis kam kho ib cov neeg mob twg raws lawv cov kev ntseeg thiab muaj peev xwm tawm tau tswv yim cuam tshuam txog lawv cov kev ntseeg uas tej zaum yuav yog ib cov kev faib cais lwm tus tau.
Kuj tseem muaj ib cov kev txhawj xeeb ntxiv tias tej zaum tsab cai no yuav ua rau muaj teeb meem rau tej poj niam hluas ntawm tej zos me uas tsuas muaj ib tug kws tshuaj los yog ib tug kws kho mob xwb, ces tej neeg no yuav yuam kom lawv mus kho mob rau lwm qhov chaw.
Qhov no txhais tau tias tej zaum tej neeg kho mob kuj yuav muaj peev xwm tsis kam siv cov hormone los kho tej neeg uas hloov cev los yog yuav tsis kam siv cov stem cell research los kho tej neeg puas cev thiab.
Tsab cai no yuav pab tej koom haum coj ntseeg dua lwm cov neeg
Tsab cai uas xav thov tsim no yeej muaj ib nqe teev tias tej koom haum coj ntseeg muaj cai yuav xaiv ntiav ib tug neeg ua hauj lwm ntiag tug twg raws nws cov kev ntseeg thiab.
Qhov no txhais tau tias tej zaum tej chaw ua hauj lwm yuav muaj peev xwm ntiav tej neeg ua hauj lwm uas xav kom ''muaj cov kev ntseeg'' li tej hauj lwm uas lawv yuav ua ntawd thiab. Ces ntshe tej tsev kawm ntawv ntiav thiaj xav tias tej xib fwb uas yuav ntiav qhia ntawv ntawd los yuav tsum muaj cov kev ntseeg ntiag tug tib yam li tej teej kawm ntawd ntseeg thiab.
Tab sis tib lub caij no los tsab cai no kuj txhais tau tias tej neeg ua hauj lwm uas muaj cov kev ntseeg txawv tej tswv lagluam tsuas tau txais kev pov puag tsawg xwb.
Ces tej zaum tej tsev kho mob uas coj ntseeg ib yam kev ntseeg twg, tej tsev laus, los yog tej chaw ntiav nyob ntawd kuj tsuas ntiav ib cov neeg uas ntseeg ib cov kev ntseeg twg xwb ''kom thiaj li tswj thiab ua tau raws li tej kev ntseeg uas lawv ntseeg ntawd."
Tab sis qhov tseem ceeb tshaj ntawd ces cov kev ntseeg no tsis tas yuav yog ib cov kev ntseeg uas lwm tus lees paub thiab los kuj tau, qhov no txhais tau tias tej zaum tsab cai no kuj yuav muaj cov kev pov puag rau tej neeg uas coj nruj tsiv uas txawv tej kev ntseeg li ib txwm ntseeg thiab los kuj tau.
Tswv lagluam tej cai tswj
Yeej nkag siab tias tsab cai uas raug kho dua tshiab no yeej tau ua tib zoo xyuas kom pov puag tau 'cov kev ntseeg' uas tej zaum yuav yuam tsoom fwv teb chaws los sis tej nom tswv xeev tej cai uas txwv tsis pub faib cais lwm tus thiab.
Qhov no txhais tau tias tej neeg Australia uas ua hauj lwm ntawm tej chaw ua hauj lwm kuj yuav tsis tau txais kev pov puag los ntawm tej cai txwv tsis pub faib cais uas muaj siv tam sim no thiab piv txwv li tsis pub ib tug coj twg los yog ib tug neeg koom ua hauj lwm ua ke twg hais tej lus tawm tswv yim raws li lawv cov kev ntseeg uas tej zaum yuav ua rau lwm tus tu siab los yog tsis paub txog los yog tsis nkag siab txog uas yuav tsim tau kev puas tsuaj rau lwm tus tau thiab.
Tsis hais ib lub koom haum twg li yog tias khwv tau nyiaj yam tsawg li $50 million lawm ces ces yuav tsum tau kub siab heev txog nws tej neeg ua hauj lwm cov kev ntseeg, thiab yuav tsis muaj cai siv ib cov cai twg los txwv tsis pub nws tej neeg hais lus tawm tswv yim raws li lawv cov kev ntseeg, tsuas yog tias ntshe ho yog tej yam tseem ceeb rau cov lagluam ntawd xwb.
“Yog tias muaj ib lub tuam txhab lagluam loj twg ho siv ib cov cai los yuam kom tej neeg hnav khaub ncaw ua hauj lwm ib hom twg tsi ntseeg los yog yuav tsum coj cov yam ntxwv li cas los yog coj cej pwm li cas, thiab tej cai no yuav ua rau muaj cov kev txwv los yog yuav tiv thaiv kom ib tug neeg ua hauj lwm twg tsis muaj peev xwm tawm tau tswv yim raws li lawv cov kev ntseeg, ces lub lagluam ntawd yuav tsum qhia kom tau tias tos ho ua li ntawd los vim nws tsis xav kom muaj teeb meem txom nyem nyiaj txiaj rau nws tej lagluam," raws li tsab cai no hais.
Txhais tau tias yuav ua rau tej tswv lagluam ntiag tug thiab tej koom haum ua hauj lwm tsis muaj peev xwm yuav siv tau ib co cai twg los tswj lawv tej koom haum los yog pab kom tej neeg muaj feem koom thiab lawv tej koom haum yog ib co chaw uas tau txais kev nyab xeeb rau sawv daws.
Teeb tsa lub koom haum los tswj kev ywj pheej rau cov kev coj ntseeg
Tsab cai no yuav tsim ib lub chaw ua hauj lwm tshiab ntawm lub koom haum pov puag leej tib neeg txoj cai (Australian Human Rights Commission) los pov puag cov neeg ntseeg txoj kev ywj pheej.
Raws li tsab cai uas xav thov tsim coj los siv no ces, lub koom haum no yuav ua tus nrog xyuas kom muaj cov kev totaub thiab muaj cov kev pov puag cov kev ywj pheej rau cov kev ntseeg ntawm teb chaws Australia tej zejzog thoob plaws, yuav los ua cov txhawb nqa thiab nrog xyuas txog tej teeb meem uas cuam tshuam txog cov kev ywj pheej rau cov kev ntseeg, txhawb nqa kom muaj txoj kev nkag siab thiab ua yoog raws li tsab cai Religious Discriminiation Act.
The Religious Discrimination Bill allows religious bodies to “give preference to adherents of their religion”. Source: Moment RF
Tej neeg txhawb nqa tsab cai no xav li cas?
Tau muaj ib tug kis ntawm tus kws lij choj teb chaws tau qhia ib cov ncauj lug rau SBS News txog tsab cai no tias ''tsuas yog ua tib zoo xyuas kom tej neeg ntiag tug tsis txhob raug lwm tus faib cai vim lawv ua ib yam dab tsi los yog lawv muaj cov kev ntseeg raws li hom kev ntseeg uas lawv ntseeg xwb."
Lub koom haum Australian Christian Lobby tau qhia txog nws ib co ncauj lug tias “Tej cai tswj kom tau txais kev ywj pheej rau cov kev ntseeg yog tej yam tseem ceeb - vim yuav pab kom koj los yog tag nrho txhua tus neeg Australia muaj peev xwm ua tau lub neej nrog zej tsoom raws li qhov uas ua tau."
“Ua ke no los tej zaum kuj yuav ua rau yus raug rau txim tau los ntawm yus tej lus tawm tswv yim cuam tshuam txog yus cov kev ntseeg thiab. Tej zaum yus kuj yuav raug nom tswv ntsuam xyuas los sis yog raug coj mus hais plaub cuam tshuam txog yus cov kev ntseeg, yus tsev neeg, cov kev rho me nyuam, cov kev txij nkawm, sexuality, gender los yog lwm yam thiab. Uas tej hais no ces ua rau yus mloog tau tias tsis yog ib lub teb chaws ywj pheej lawm uas yus tau txais kev tso cai los muaj cov kev xav, cov kev hais lus, thiab cov kev ua tau raws li qhov yus nseeg ntawd."
Denis Dragovic uas yog ib tug neeg nto npe rau fab kev teeb txheeb ntawm lub tsev kawm qhib siab University of Melbourne thiab kuj yog ib tug kws paub zoo txog kev ntseeg thiab zejzog hais tias tos ho muaj cov kev cov nyom nrog tsab cai no los vim yog tau muaj cov kev pauv hloov thim tawm ntawm cov kev ntseeg tej kab lis kev cai Christian uas ib txwm ntseeg ntawd sai heev, uas nws piv tias ''yog ib cov neeg muaj fwj ci uas tau muaj cov kev hloov tsis ntseeg tag nrho lwm cov kev ntseeg, tab sis tib lub caij no los kuj tsis xav kom muaj neeg tib thiab hais qhov tsis zoo txog yus tej kev ntseeg thiab."
Nws tau qhia rau SBS News tias “Tab sis ntshe lig dhau lawm, vim tej neeg uas coj tej kev ntseeg ntawd los yeej sawv tawm tsam thiab hais tias lawv txoj cai los yeej tseem ceeb tib yam thiab. Tab sis ntshe cov kev tsis sib haum xeeb no yeej yuav tsis tau ntaug vim yeej tseem muaj tej neeg tsiv teb tsaws chaw uas coj ib yam kev ntseeg twg coob zuj zus sawv los tawm tsam thiab."
"Txawm li cas los tsab cai no kuj yog ib kauj ruam tseem ceeb thiab."
Dr Dragovic hais tias cov kev cam hwm txoj cai coj ntseeg ntaws tsis yog yuav tso cai rau tej neeg ua tau lawv cov kev coj ntseeg ntawm ntiag tug xwb, tab sis yog cov kev tso cai rau lawv ua tau lawv cov kev coj ntseeg ntawm zej tsoom li sawv daws yeej paub tias lawv coj thiab ua li cas ntawm tej koom haum coj ntseeg lawm."
Nws hais tias qhov no txhais tau tias seb tej neeg mob puas ho puas muaj peev xwm ua tau lawv cov kev coj ntseeg ntawm tsev kho mob thiab tej teej kawm uas qhia thiab coj ib cov kev coj ntseeg twg ''ho puas yuav siv lub tswv yim no los cais ib tug twg thaum ntiav tej xib fwb los yog lwm tus neeg ua hauj lwm raws lawv cov kev ntseeg, los yog xyuas tej neeg no cov sexual orientation, gender identigy."
Tab sis thaum nug txog tias tsab cai no puas xyog xub kub siab txog tej neeg cov kev coj ntseeg ua ntej es ho yuav muaj tau teeb meem rau lwm cov neeg uas pab tsis tau lawv tus kheej puas yog no ces, Dr Dragovic yog tham txog tej cai pov puag leej tib neeg txoj cai lawm ces ''yeej tseem muaj cov kev tsis sib haum xeeb ntawm ntau pawg neeg uas xav pov puag lawv txoj cai thiab."
Txawm li cas los nws hais tias “Tsis tsim nyog peb lees tej lus cav tias tsis tsim nyog pov puag pej kum haiv txoj cai uas pov leej tib neeg txoj cai vim tsuas muaj teeb meem rau ib txhia neeg ntiag tug tsawg tsawg xwb."
Dr Dragovic tsis lees tias paub txog cov lus tawm tswv yim tias tsab cai no yog tej yam tsis zoo rau cov neeg pawg tsawg ntawm Australia thiab.
“Yeej tseem muaj qee cov piv txwv uas muaj ntau zuj zus tuaj rau tej neeg coj ntseeg uas suav cov neeg coj ntseeg pawg tsawg nrog thiab, yeej raug faib cais, raug tsub nias thiab raug yuam vim lawv coj lawv cov kev ntseeg. Tsis tsim nyog lub teb chaws vam meej li Australia no yuav lees txais tej no."
“Rau qhov yeej muaj tej neeg pawg tsawg coob heev uas yog cov neeg coj ntseeg ntawd yeej txhawb nqa kom tau txais kev pov puag rau lawv cov kev ntseeg thiab. Yog li ntawd thiaj yog tej yam xav yuam kev lawm tias tsab cai pov puag tej kev ntseeg no yog ib cov kev yuam tej neeg pawg tsawg, vim rau qhov tsis yog li ntawd."
Tej neeg uas tsis pom zoo nrog tsab cai no xav li cas?
Rodney Croome uas yog ib tug neeg tawm tsav pov puag thiab txhawb nqa tej neeg LGBTQI txoj cai thiab yog tus kis rau lub koom haum Just.Equal Australia hais tias, tsab cai no yeej tsis muaj cov kev pov puag tej cai nthuav dav rau sawv daws tab sis tsuas pov puag thiab pub ib co cai rau ib pawg neeg twg tsi ntsees xwb.
Nws tau qhia rau SBS News ces nws hais tias “Tsab cai no tsuas yog los tiv thaiv kom tsis txhob muaj cov kev faib cais rau cov kev ntseeg xwb, tsuas yog li ntawd xwb. Tab sis qhov tsab cai no ua ces tseem tso cai rau muaj cov kev siv tej kev ntseeg no los faib cais thiab."
“Tsab cai no hais tias tsuas xyuas kom tau txais kev ywj pheej rau cov kev ntseeg xwb, tab sis qhov tseeg tiag tsis yog li hais ntawd, vim tseem ua rau tsis tau txais kev ncaj ncees rau ib txhia muaj kev cov kev tsis nyiam lwm tus los yog ua rau lwm tus plam txiaj ntsim xwb."
Ces thiaj li yog ib cov kev tawm tswv yim ntawm Australia tej pej xeem, thiab lub koom haum change.org thiaj tau muaj ib cov kev kos npe tawm tsam tsis pom zoo hu ua: "Stop the Religious Discrimination Bill: the Coalition's "Handmaid's Tale" uas muaj neeg mus kos xyeem mem tes yuav laug txog li 155,000 tus mem tes diam.
Cov ncauj lug ntawm tsab ntawv uas kos tej xyeem mem tes no hais tias “Tus tsoom fwv Morrison government tau tsim ib tsab cai religious discrimination bill uas yuav tso cai rau muaj cov kev faib cais peb ib co neeg uas pab tsis tau lawv tus kheej tshaj plaws li: tej poj niam, tej niam tsev uas tab lub cuab yig, tej neeg LGBTQI, tej neeg puas cev thiab tej neeg pawg tsawg uas coj ntseeg ntau yam kev ntseeg xwb tab sis lam ua txoj tias los pov puag 'txoj kev ywj pheej' rau tej kev coj ntseeg xwb."
Mr Croome pom zoo tias tej neeg pawg tsawg, tej poj niam, thiab cov neeg LGBTIQI yog cov uas yuav raug cov neeg Australia uas coj ntseeg tsim teeb meem rau vim lawv 'tau ib txoj cai tseem ceeb los hais tau tej lus phem thiab faib cais lwm tus."
“Under those provisions, anyone who could fall foul of any religious belief, whether that's a person with a disability who is ‘demonically possessed’ or a young woman who isn’t 'chaste' or someone who wants to transition who’s 'satanic'. They all suffer," he said.
LGBTQI+ rights advocate Rodney Croome. Source: Supplied
Lub koom haum Australian Medical Association, uas yog tus tau los xa ib co lus tawm tswv yim rau cov kev txheeb xyuas tsab cai no ua zum ob tau hais ib co ncauj lub rau xyoo 2020 tias yeej muaj ntau nqe ntawm tsab cai no ''zoo li yuav ua rau tej neeg pob tau txais kev pov puag tsawg thiab yog ib cov lus tsis cam hwm tej neeg mob txoj cai kom muaj cai kho mob, tsis tas li no los tseem tau ua rau muaj teeb meem rau ib txhia kws kho mob txoj cai thiab vim tsab cai no yuav ua rau tej tswv lagluam faib cais tej neeg no raws li lawv cov kev ntseeg thiab".
Lub koom haum Diversity Council Australia (DCA) los yeej tau qhia txog nws tej kev txhawj xeeb thiab tias ntshe tej zaum kuj yuav ua rau muaj teeb meem nyuaj rau tej chaw ua hauj lwm cov kev xav txhawb nqa tej kab lis kev cai kom muaj kev koom npoj thiab.
Nws tau hais ib co ncauj lug tias “Ntshe tej zaum tej lagluam yuav raug plaub ntug yog tias lawv xav los txhawb nqs kom lawv tej chaw ua hauj lwm muaj neeg ntau yam los ua hauj lwm ua ke thiab siv tej cai txhawb nqa kom sawv daws muaj feem koom, thiab yuav yog tej yam nyuaj los pov puag tej neeg ua hauj lwm kom tsis txhob raug lwm tus thab zes los sis yog tsis txhob raug lwm tus faib cais".
“Peb yeej kub siab hlo los nrog xyuas thiab txhawb nqa kom peb tej tub koom siab tsim kom tau tej chaw ua hauj lwm uas tau txais lub meej mom sib txig thiab tau txais kev cam hwm tib yam rau lwm tus neeg tej cim thawj thiab."
"Tsab cai uas raug rov qab coj los txheeb xyuas dua tshiab no ces yeej tau teev pej kum haiv tej cai uas pov puag leej tig neeg tej cai coj los siv nrog rau Australia tej cai thiab tab sis kuj haj yam yog ib tsab cai uas yuav ua rau muaj cov kev faib cai tej neeg LGBTQI nthuav dav tuaj ntxiv thiab."
Nyob rau tej lus tawm tswv yim uas nws tau xa rau nom tswv rau lub 10 hli ntuj xyoo 2019 ntawd, ces lub koom haum Australian Discrimination Law Experts Group yeej tau piav tias tsab cai no yog ib tsab cai ''tseem tsis tau zoo txaus''.
"Vim nws pub txoj cai rau ib cov neeg twg thiab xub kub siab txog cov kev ntseeg dua cov kev pov puag lwm pawg neeg lawm, tsis tas li no los tsab cai no tseem yuav yuam tej cai muaj siv tam sim no coj los pov puag tej poj niam, tej neeg LGBTIQI thiab lwm cov neeg uas yuav raug tau teeb meem thiab."
Mr Croome hais tias tsab cai no yuav ua rau ''muaj teeb meem puas tsuaj loj'' rau Australia cov neeg zejzog LGBTIQ+.
“Tej neeg zejzog LGBTIQ+ thiab peb tej phooj ywg yeej kub siab ua hauj lwm los tau ntau caum xyoo los txhawb nqa kom Australia yog ib lub teb chaws uas pub lwm tus muaj feem koom ntau tshaj qub ntxiv thiab kom tau txais txoj kev ncaj ncees tshaj qub tuaj ntxiv. Thiaj yog tej yam tsis ncaj uas tsoom fwv teb chaws cia li muab tej hauj lwm no laim pov tseg, uas yog tej yam uas tsab cai no yuav ua ntag - uas nws yuav ua rau muaj feem koom ntawm tej chaw ua hauj lwm tsawg, yuav ua rau siv tau cov kev kho mob nyuaj tshaj qub ntxiv thiab yuav ua rau yuam tej cai thiab ua rau muaj teeb meem rau tej cai uas peb kub siab tiag tiag los tsim tau lawm."
“Rau qhov tsab cai Religious Discrimination Bill no yeej hais tias peb yuav hloov tag nrho txhua tsav yam uas nej xav tias nej tau txais kev pov puag ntawd lawm, los yog hloov tag nrho cov kev muaj feem koom lawm. Peb thiaj li yuav tsis tso cai rau nej ua tau lub neej muaj kev vam kev cia siab tias yuav tau txais vaj huam sib luag. Ntawd yog tej lus uas tsab cai Religious Dicrimination Bill no qhia rau peb."
Tom Stayner yog ib tug koom sau tsab ntawv cej luam no
Tej neeg Australia uas yog cov neeg LGBTIQ+ yog xav nrhiav kev pab cuam los daws kev nyuaj siab ces kom nej hu tau rau lub koom haum QLife raws tus xov tooj 1800 184 527 los yog mus xyuas lub vas sab qlife.org.au. ReachOut.com los kuj yeej muaj ntau yam kev pab cuam rau nej thiab.
Share
Listen to our podcasts
Independent news and stories connecting you to life in Australia and Hmong-speaking Australians.
Ease into the English language and Australian culture. We make learning English convenient, fun and practical.
Get the latest with our exclusive in-language podcasts on your favourite podcast apps.
Watch on SBS
SBS World News
Take a global view with Australia's most comprehensive world news service
