Raws li hau xeev Victoria Daniel Andrews tau qhia rau hnub Sunday tim 18.10.2020 txog cov kev pauv hloov rau cov kev tso kev yooj yim rau nom tswv cov kev txwv tej neeg rau lub caij muaj kab mob coronavirus ntawm xeev Victoria no li MP Rose Spencer tau teev rau hauv nws phau Facebook account ces muaj cov kev pauv hloov raws li hauv qab no:
Nroog Melbourne:
- Tseem kom tej neeg siv ntaub npog qhov ncauj li qub thiab tseem kom tej neeg yuav tau xyuas kom tau txais kev nyab xeeb li siv ntaub npog qhov ncauj, nyob kom nrug ntawm lwm tus (1.5 metres), yog koj tsis xis nyob ces mus sim thiab nyob twj ywm hauv tsev.
- Pub tej neeg Victorian ntawm nroog Melbourne mus exercise thiab tsham kiab tsham khw nrug deb ntawm lawv tej vaj tau deb txog 25 kilometres. Tseem tso cai rau tej neeg mus exercise, mus ntsib lwm tus neeg los yog mus tsham khw rau lub sij hawm 2 teev xwb.
- Tso cai rau tej neeg kho mob uas tab tom ua hauj lwm tam sim no muaj peev xwm ua tau tej hauj lwm tu lwm tus tim ntsej tim muag nrog lwm tus txuas ntxiv tau.
- Txij hnub tim 28 October 2020 mus ces yuav tso cai rau tej lagluam txib tej neeg ua hauj lwm qhib lawv tej khw thaum ntxiv tau kom lawv muaj peev xwm qhib tau lawv tej khw rau zej tsoom.
- Tso cai rau 2 tug neeg muaj hnoob nyoog nrog rau lawv 2 tug me nyuam mus cuav zos xyuas tau ib tsev neeg twg tau ib hnub ib zaug tau.
- Mam li los xyuas tej tswv yim cuam tshuam txog tej vaj tse thiab cov kev sib tw nraum zoov txuas ntxiv.
- Pub tej neeg mus koom siv cov tshav sib tw nraum zoov li tennis court, golf courses thiab skateparks thiab qhib tau tej chaw no.
- Pub qhib cov chaw txiav plaub hau tab sis yuav tsum ua raws li tej cai tswj kom tej neeg tau txais kev noj qab nyob zoo.
- Pub neeg txog li 10 leej ntawm 2 tse neeg sib sau ua ke tau nraum zoov ntawm zej tsoom tej chaw mus ua exercise los yog koom noj mov picnic ntawm park tau.
- Yuav tso cai rau ntau txheeb tus neeg Victorians rov qab mus ua tau hauj lwm yog tias tej neeg ntawd yuav tsum tau tawm ntawm tsev mus ua hauj lwm rau lwm qhov chaw li cov tradies, mus kho tej chaw nraum zoov ib qho qhov twg los yog mus kho ib yam dab tsi, tej chaw tu, ntxuav thiab txiav plaub tsiaj uas mus provide services ntawm chaw rau tej neeg los yog tej neeg yees duab nraum zoov ces mus ua tau hauj lawm. Tab sis hau xeev Daniel Andrews hais tias tsuas pub tej neeg muaj ntaub ntawv tso cai tawm mus ua tau hauj lwm sab nraud mus tau xwb, cov tseem ua tau hauv tsev ces kom ua hauv tsev txuas ntxiv.
- Tso cai rau 10 tus neeg mus koom sib tw sib khom nqe yuav tsev nrog rau tej neeg ua hauj lwm muag tsev tau.
- Txij tim 1 November 2020 mus ces yuav siv cov kev txwv theem 3 uas yog tso cai rau tej khw muag khoom me thiab tej lagluam tos txais qhua qhib tau thiab tej zaum kum yuav tshem cov kev txwv kom tej neeg nyob ntawm tsev los siv cov kev txwv uas yuav tau kub siab kom tau txais kev nyab xeeb thiab yuav tsis txwv thiab tsis hais kom tej neeg nyob tsev lawm.
Tej zos cheeb tsam tuaj ntug nroog thiab tej zos yaj sab:
- Txij ib tag hmo hnub Sunday tim 18.10.2020 no mus yuav tso cai qhib tau tej chaw khaws ntawv thiab saib ntawv thiab qhib cov chaw khaws khoom rau me nyuam yaus ua si ntawm xeev Victoria tau thiab pub 20 tus neeg mus siv tau tej chaw hais no sab hauv tej chaw ntawd tau.
- Pub 20 tus neeg mus koom kev teev hawm tau nraum zoov thiab mam li pub neeg txog 50 leej mus koom tau kev ntseeg txij hnub tim 1 November 2020 mus.
- Txij ib tag hmo hnub Sunday tim 18.10.2020 no mus tej lagluam tos txais qhua ntawm tej zos tuaj ntug nroog thiab zos yaj sab muaj cai pub 40 mus txog 70 tus customers siv tau thiab nyob tau hauv lawv tej kiab khw.
Listen to SBS Hmong on Thursday at 6 pm AEST or Sunday 11 am AEST, follow us on SBS Hmong Facebook, listen and subscribe to podcasts from google podcasts, Spotify, and Apple podcasts or download SBS Radio App to listen to SBS Hmong radio Program.
Share
