Cov kev sim tej dej tsis huv ntawm xeev South Australia kuj txheeb tau ib co pov thawj tias muaj kab mob coronavirus paug tsuas rau lub xeev no 2 lub chaw lim cov dej tsis huv rau lub caij 12 hnub no uas lub xeev no tau muaj thawj tus neeg kis tau tus kab mob coronavirus.
Tau muaj ib tug poj niam neeg Victorian hnoob nyoog 20s (20 tawm xyoo) uas xav hla kom dhau nroog Adelaide lub tshav dav hlau mus rau Alice Springs yam tsis muaj ntau ntawv tso cai raug sim tau tias kis tau tus mob no thaum nws raug coj mus cais rau ntawm ib lub tsev tos qhua yav lig rau hnub zwj Kuab (Friday) tim 4 lub 9 hlis ntuj 2020 dhau los no.
Nws kuj tau caij fij dav hlau Jetstar ntawm Melbourne rau hnub Thursday nrog nws 4 tug thaj kub thaj tim (Cousins) mus rau Adelaide.
"Peb yeej tsis xav li tias tus neeg no yuav tuaj rau lub xeev South Australia li," raws li Nicola Spurrier uas yog tus coj tswj zejtsoom cov kev noj qab haus huv tau qhia rau tej neeg tshaj xov xwm rau hnub zwj Cag (Saturday) dhau los.
"Tiag mas, yuav tsum tau ua raws li tej txheej txheem peb tau npaj tseg, xws li nws yuav tsum teem ib fij dav hlau thiab muab nws xav rov qab rau xeev Victoria, tab sis tseem muaj 4 tug hluas nrog nws thiab ces peb thiaj li coj nws mus cais rau ntawm ib lub tsev kho mob tos qhua lawm."
Tus poj niam no yeej tsis muaj cov yam ntxwv qhia tias nws kis tau tus kab mob no li thiab thaum peb tau mus sim nws ntxiv seb nws puas yog nws twb kis tau tus mob no dhau los ces professor Spurrier hais tias nws yeej tsis tau mus nyob ze nrog leej twg dhau los li.
Nyob rau tib lub caij no los kuj sim tau hais tias lub chaw lim cov dej tsis huv ntawm Bolivar kuj muaj kab mob coronavirus thiab, lub zos no yeej muaj tej vaj tse txog li ntawm 700,000 lub suav nroog Adelaide CBD nrog tib si uas yeej tau muaj ib cov neeg kis tau tus mob no raug cais rau ntawm tej tsev tos qhua.
Hos kuj txheeb tau ntxiv tias tseem muaj lub chaw lim dej tsis huv (Sewage treatment plant) zum 2 ntawm lub zos Angaston ntawm lub tiaj nrag Borossa Valley uas muaj tej vaj tse txog li ntawm 2,000 lub los kuj muaj tus kab mob coronavirus no thiab.
Prof Spurrier thiaj tau hais tias txawm txheeb tau tias muaj tus kab mob no ntawm tej chaw lim dej tsis huv no los yeej qhia tsis tau tias tau muaj tus kab mob no sib kis ntawm tej zejzog li cas thiab lawv tseem yuav los sim tej dej tsis huv no txuas ntxiv rau ntau hnub ntxiv tom ntej no seb ho zoo li cas ntxiv.
"Peb tsis muaj peev xwm yuav txheeb tau tias tus kab mob ntawd ho los qhov twg los thiab qhia kom tau qhov tseeb kiag tias tej neeg ntawm tej chaw no kis tus kab mob COVID-19 no," raws li Professor Spurrier tau qhia.
"Txawm li cas los yeej txhais tsis tau tias muaj neeg sib kis tus kab mob no tab sis peb kuj yuav tsis muaj peev xwm qhia kiag tau meej tseeb li ntawd thiab."
Vim tus kab mob no yeej tau nyob xyaw tej quav los ntev lawm tom qab ib tug neeg twg kis tau tus kab mob no raws li nws tau qhia. Txawm li cas los xeev South Australia kuj tsis muaj neeg mob tus mob no rau hnub Wednesday dhay los lawm.
Xav taw qhia kom neeg uas tsis xis nyob los yog mob lawm yuav tsum hu rau tus xov tooj Healthdirect tus xov tooj 1800 022 222 uas yeej muaj cov kev pab cuam 24 teev pab rau lawv los yog hu rau lawv tus kws kho mob tau, los sis yog hu rau emergency tus xob tooj 000 yog muaj tej xwm txheej kub ntxhov phom sij uas tsim nyog tau txais kev pab cuam los yog pab cawm siav sai.
Txhua tus neeg ntawm teb chaws Australia yuav tsum nyob kom nrug ntawm lwm tus neeg li 1.5 metres. Txheeb ntawm lub xeev koj nyob seb ho pub tej neeg sib sau ua ke tau li cas. Yog tias koj muaj cov yam ntxwv mob li khaub thuas lawm, ces nyog twj ywm ntawm tsev, hu rau koj tus kws kho mob los yog lub chaw Coronavirus Health Information Hotline tus xov tooj 1800 020 080 seb yuav npaj mus sim li cas. Thiab yog koj xav mloog, nyeem los yog saib tej xov xwm txog tus kab mob COVID-19 ua 63 hom lus ces mus txheeb tau ntxiv ntawm
