UN tau nqhua ua kom tej tsoom hwv hauv ntiaj teb no thiab tej tuam txhab tsim cov twj mloog ntawm pob ntseg, xov tooj ntawm tes, thiab cov twj kw suab yuav tsum tau kho kom cov suab tsis txhob nrov heev kom tej hluas tsis txhob muaj teeb meem rau lawv lub pob ntseg kom txhob lag ntseg.
UN qhia tias ntiaj teb cov hluas tshaj 1 tav (billion) tus uas muaj hnoob nyoog txij 15 xyoo txog 32 xyoos ntawm cov teb chaws txom nyem thiab cov teb chaws tab tom txhim kho yuav raug cov teeb meem pob ntseg tsis hnov lus yog pheej mloog tej khwb pob ntseg (ear phone), mobile phone (xov tooj ntawm tes) los yog audio devices (Ipod) ntawd ntau ces yuav ua rau pob ntseg pheej hnov nrov zib (buzzing sound-tinnitus) xwb ces yuav ua rau lawv lag ntseg tau.
Yog li UN thiab Australia lub koom haum Deafness Foundation thiaj xav thov nqua hu kom tej tuam txhab lagluam tsim tej twj no kub siab los tsim kiag kom cov khom no txhob nrov nrov heev mas thiaj yuav pab tau. Yog tias lawv tseem ua li qub no thiab qhia tias kom txhob tso nrov nrog mloog ces yeej muaj ib txhia yuav tso kom nrhov mloog tsuas yog tias ntshe lawv ho mloog tsis tau nrov xwb. Vim yog tej nom tsim cai, tej nom tswv xeev thiab nom tswv teb chaws txoj hauj lwm yuav tau nrog xyuas hauv teb chaws Australia kom tau txais kev nyab xeeb rau zej tsoom thiab cov teb chaws Europe yeej tau los xyuas tej hauj lwm no lawm.
Ntiaj teb lub koom haum tswj kev noj qab haus huv (World Health Organisation-WHO) tau kwv yees tias cov teeb meem lag ntseg no twb ua rau ntiaj teb poob nyiaj ze txog li USD 1 billion rau ib lub xyoos twg lawm.
