Donald Trump tau hais tias cov kev teeb txheeb txog cov tshuaj kho kab mob malaria hu ua hydroxychloroquine yog ib cov tshuaj siv kho tsis tau tus mob COVID-19 no tsuas yog ib cov ncauj lug siv coj los tawm tsam nws xwb.
"Yog tias koj saib tib tsab ntawv teeb txheeb uas yog cov kev teeb txheeb tsis zoo coj los qhia au tej neeg xwb...vim yog cov kev teeb txheeb qub qub uas siv tsis tau lawm xwb. Tsuas yog cov kev teeb txheeb coj los tawm tsam ua yeeb ncuab nrog Trump xwb.''
Tab sis Mr Trump yeej tsis muaj pov thawj tim khawv coj los qhia dab tsi li, tsis tas li no los nws tseem tau qhia rau tej neeg tshaj xov xwm ntxiv tias, lub caij nws tseem mus Meskas lub tsev dawb ces nws yeej xav tias ''cov tshuaj hydroxychloroquine yuav pab kom yus tau txais kev nyab xeeb ntxiv."
"Mam li cia tej neeg sawv daws ua cov txiav txim siab seb lawv yuav ua li cas xwb."
NYEEM NTXIV
America lub koom haum tswj tej zaub mov thiab tshuaj (The US Food and Drug Administration-FDA) yeej tau ceeb toom tias tej zaum yuav muaj tau teeb meem cuam tshuam loj yog tseem siv cov tshuaj no coj los kho tej neeg uas kis tau tus mob COVID-19 lawm.
America tus lwm thawj tsav meem Mike Pence tus neeg tshaj xov xwm los kuj kis tau tus kab mob coronavirus lawm, yeej tau qhia rau Fox News tias nws yeej tsis noj cov tshuaj hais no (hydroxychloroquine).
"Kuv yeej tsis noj tej tshuaj no, tab sis kuv kuj tsis xav li cas rau lwm tus neeg American uas tau ua raws li lawv tej kws kho mob tau taw qhia rau lawv thiab," raws li Mr Pence cov lus nraug tej neeg tshaj xov xwm nug thiab coj los sau ua cov sob lus.
Nws tau hais tias Meskas lub koom haum FDA yeej tau pom zoo rau tej neeg siv tau cov tshuaj uas tej kws kho mob tso cai rau lawv yuav tau coj los siv thiab.
"Tab sis Mr Pence hasi tias, kuv tus kws kho mob yeej tsis hais kom kuv noj tej tshuaj no ces kuv thiaj yuav tau sab laj nrog kuv tus kws kho mob ua ntej tso. Thiab yeej tsim nyog txhua tus neeg American yuav tsum tau ua li no thiab tso."
Ntau limtiam dhau los, Mr Trump yeej tau txhawb nqa tias tej zaum tus tshuaj hydroxychloroquine no kuj yuav muaj peev xwm siv coj los kho tau tus mob no thiab raws li tau muaj ib cov kev cej luam qhia txog cov kev sim coj cov tshuaj no los kho tus mob no, tab sis kuj tau muaj ib cov kev teeb txheeb tom qab txuas ntxiv tau qhia tias cov tshuaj no pab tsis tau dab tsi.
Sean Conley uas yog tus khw kho mob ntawm tsev dawb tau hais rau ib cov lus luv luv tau sau tseg tias nws thiab president yeej tau sib tham txog tej pov thawj tim khawv tias puas tsim nyog los tsis tsim nyog noj tej tshuaj no thiab tau pom zoo tias ''tej zaum yuav tau txais txiaj ntsim ntau dua tej teeb meem phom sij uas tus tshuaj no yuav tsim tau."
