Txij hnub tim 1 lub 1 hlis ntuj xyoo 2026 mus ces tsoom fwv xeev Victoria yuav cia tej neeg hnoob nyoog qes dua 18 xyoo tau siv cov public transport dawb coj los pab daws tej nuj nqes siv ua lub neej.
Thiaj yuav tsim ib cov Myki Card rau tej hluas siv (Youth Version), kom lawv muaj peev xwm cai tau bus, tram, train dawb thoob plaws lub xeev no 7 hnub ib xyoos twg yam tsis txwv tias yog lub caij twg li. Thiab yuav muaj peev xwm siv tau tej card no txog rau thaum tej neeg no muaj hnoob nyoog 18 xyoo mam li siv tsis tau lawm.
Gabrielle Williams uas yog Victoria tus nom tswj cov hauj lwm Transport tau qhia tias tsab cai no yuav pab tej hluas yuav laug txog li 1 million tus thiab lawv tej cuab yig txuag tau nyiaj ntau txheeb dollars. Tej tub kawm cov nqe them siv public transport ntawm Victoria tam sim no ib xyoos ces yuav tau them txog tshaj li $700 raws li Victorian Public Transport hais. Thiab yuav siv nyiaj tshaj li $300 million rau lub caij 4 xyoos ntxiv no.
Jacinta Allen uas yog tus hau xeev Victoria hais tias ''vim tej cuab yig txom nyem ces thiaj yuav tau pab lawv,''
Thiab tseem npaj tias xyoo tshiab no (2026) tseem yuav xyuas seb puas pub kom zej tsoom tau siv cov free public transport kom nthuav dav tuaj ntxiv thoob plaws lub xeev no rau cov hnub so rau tej laus neeg hnoob nyoog tshaj 60 xyoo uas tsis ua hauj lwm lawm siv thiab.
Tam sim no ces tej senior card holders tsuas muaj peev xwm siv tau cov free public transport rau cov hnub so ntawm ob thaj chaw li nroog Melbourne thiab tej chaw toj siab li Morwell mus rau Traralgon los yog Macedon mus rau Woodend xwb.
Thiaj muaj neeg nug hau xeev Allen tias pas yog txhob txwm qog raws xeev Queensland kom yeej cov kev xav tsa xwb.
Ms Allen thiaj teb tias ''Nyob ntawm yus xaiv xwb. Vim thaum tej neeg ua hauj lwm khwv tau nyiaj hli thiab tej cuab yig xav tau txais kev pab ces tsim nyog yuav tau pab lawv.''
Txawm li cas los lwm pab nom teb chaws ntawm xeev Victoria hais tias tej nqe siv public transport dawb no yeej pab daws tsis tau tej nqe siv ua lub neej thiab tej kev tsub se rau tej vaj tse tsis ntev los no li cov emergency services levy uas tsev tsoom fwv tsim tau cai siv limtiam dhau los no haj yam yuav ua rau muaj chaw leg ntxiv rau tej cuab yig.
Txawm li cas los hau xeev Allen tau qhia tias nws yeej tau teev tej nyiaj $5 billion ua cov hauj lwm kho tej public transport hauv nws tej nyiaj puag xyoo xeev, thiab yuav siv $4 billion los pib kho lub Shunshine Station kom ras los ua lub chaw sib txuas nrog lwm cov kev tsheb ciav hlau rau yam pem suab suav txoj kab tsheb ciav hlau txuas rau tshav dav hlau Melbourne Airpot, yuav siv nyiaj tshaj $700 million los khawb lub qhov kev tsheb ciav hlau Metro Tunnel Project (Melbourne Metro Rail) thiab yuav siv nyiaj tshaj $98 million los pab kom siv tau 7 txoj kab tsheb ciav hlau no kom siv tau ntau tuaj ntxiv.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
