Ntsiab lus:
- Fair Work Commission tau nce tej nyiaj khwv tau yam tsawg ib teev twg txog $26 lawm.
- Lub koom haum no tau hais tias muaj ntau yam cuam tshuam suav tej tsov rog ntawm Middle East nrog ua rau nws txiav txim siab nce tej nyiaj hauj lwm no.
Muaj tej neeg Australia yuav laug txog li peb million tus yuav tau tej nyiaj hauj lwm uas khwv tau yam tsawg ib teev twg ntau tuaj ntxiv txog li 4.75 feem pua txij tim 1 lub 7 hli ntuj no mus, uas yog tej yam uas tsoom fwv hais tias ''yog ib co kev nce nyiaj hauj lwm uas txaus siv ua lub neej tiag tiag'' tab sis kum ceeb toom tias ntshe tej tswv lagluam ''yuav ntsib teeb meem'' ua tsis tau lagluam thiab.
Tab sis raws li Australian Bureau of Statistics hais ces cov kev nce nyiaj no tseem qes dua tej uas tej unions thov kom nce txog li 6%.
Ces thiaj yuav ua rau 100,000 tus neeg ua hauj lwm khwv tau nyiaj tsawg tshaj plaws uas tau cov modern awards wages ntawd thiaj yuav tau nyiaj hauj lwm ntau tuaj ntxiv txog li $1004.90 ib limtiam twg los yog yuav tau nyiaj hauj lwm ib teev twg txog li $26.44. Thiab yuav pib tau tej nyiaj hauj lwm no txij hnub tim 1 lub 7 hli ntuj xyoo 2026 no mus.
Fair Work Commission (FWC) thiaj hais tias cov kev txiav txim siab nce nyiaj hauj lwm xyoo no mas ''yeej nyuaj heev'' vim muaj ntau yam cuam tshuam suav tej tsov rog ntawm cheeb tsam Middle East nrog, tej nyiaj poob nqe uas siab tshaj qhov tau kwv yees tseg thiab.
Tej lus nug txog cov kev nce nyiaj hauj lwm tiag
Adam Hatcher uas yog tus coj lub koom haum FWC tau hais tias cov kev txiav txim siab xyoo no yog ib co kev nce nyiaj hauj lwm kom txaus siv tiag tiag thiab ''yog cov kev daws cov kev sib tu ncua rau tej nyiaj khwv tau kom yuav laug duav txaus siv them tej nqe ua lub neej ntau yam'', tab sis tej xwm txheej nyiaj poob nqe no kuj tau rov qab ua rau nce tej nyiaj hauj lwm dua.
Reserv Bank of Australia tau hais tias hais tias tam sim no mas yuav tau nce nyiaj hauj lwm tshaj 5% mas thiaj yuav duav.
Hatcher tau hais tias ''Peb xav tias tej nyiaj nce rau tej neeg ua hauj lwm no tseem tsis tau yog ib co txaus siv tiag.''
Lub koom haum Australian Council of Trade Unions (ACTU) tau cav tias tej nyiaj nce rau tej neeg ua hauj lwm no yuav pab kom lawv tau nyiaj siv them tej nqe ua lub neej ntau yam, thiab kom tau tej nyiaj tsim nyog khwv tau ntau tuaj ntxiv thiab npaj lawv tus kheej yog tias ntiaj teb tej lagluam no phem tshaj qub ntxiv.
Sally McManus uas yog ACTU tus coj tau hais tias yog tej neeg ua hauj lwm khwv tsis tau nyiaj hauj lwm ntau tuaj ntxiv ces kuj yuav ua rau muaj teeb meem rau tej lagluam thiab.
McManus hais tias ''Yog lawv khwv tsis tau nyiaj ntau ntxiv ces yuav yuav txuag nyiaj siv ... lawv yuav yuav zaub mov tsawg, thiab lawv yuav ncua tsis mus ntsib kws kho mob.''
Tab sis tej tswv lagluam hais tias tej koom haum unions cov kev thov kom nce nyiaj hauj lwm 6% mas yog tej ''tsis txaus ntseeg lawm'' thiab nws tsuas xav kom nce 3.9% xwb, vim txhawj xeeb tsis paub tias xyov tej lagluam yuav ntsib tej xwm txheej zoo li cas ntxiv.
Innes Willox uas yog tus coj lub koom haum Australian Industry Group (AIG) tau hais tias:
"Vim rau qhov peb tab tom ntsib tej xwm txheej ntau yam xwm txheej tej zaum yuav ua rau lagluam tsis zoo, ces yog tseem nce ntau ntxiv ces yuav raug kev puas tsuaj loj rau tej lagluam thiab tej neeg ua hauj lwm thiab,''
"Tej lagluam los yeej tsis muaj peev xwm pheej yuav them ntau yam nqe tsis paub tag — li them nyiaj hauj lwm.''
Thiab lub koom haum Australian Chamber of Commerce and Industry (ACCI) los kuj tau hais tais cov kev nce nyiaj hauj lwm 4.75 per cent mas ''yog tej yam nyuaj heev'' rau haiv neeg no tej lagluam me, uas yuav ua rau lawv yuav tsub tej nqe ntau yam rau tej neeg yuav khoom siv, los sis yuav tau ris tej nqe kheej.
ACCI policy chief David Alexander uas yog ACCI tus chief policy tau hais tias:
"Tej zaum kuj yuav ua rau qee cov lagluam ntsib teeb meem loj thiab ua tsis taus lagluam. Yuav ua rau ib txhia yuav txo lawv cov kev nqes peev lagluam. Ces thiaj tsis yog ib co xo zoo rau tej lagluam."
Nws kuj tau hais ntxiv tias cov kev nce nyiaj hauj lwm no yuav tsum tau xyuas tias seb ib co lagluam twg ua puas tau lagluam zoo.
Nws hais tias ''FWC cov kev txiav txim siab no tab tom rau muaj teeb meem rau cov kev ua tau lagluam zoo thiab tej nyiaj hauj lwm tiag."
Mloog tau xov xwm tshiab ntawm SBS Hmong, download SBS Adio app, caum SBS Hmong ntawm Facebook,mloog tau Youtube, Spotify, Podfollow, iHeart Radio, Google Podcast thiab Apple Podcast.
