Ntsiab lus tseem ceeb:
- Cov kev nruathiab teev zem yus tus tsiaj yeej yog tej uas tej tswv dev thiab miv yuav tau ua raws cai. Ces thiaj yuav tau ua ob yam haj lwm no vim rau qhov yeej muaj tej txhej txheem sib txawv tej tshiaj no.
- Npaj ib cov tswv yim tu kom ib tug tsiaj twg tau siv kev kho mob li mus ntsib kws kho tsiaj tas mus li, tu saib xyuas tej hniav, hno tshuaj vaccine, thiab kho tej mob uas mob ntev.
- Yuav tsum yog tag nrho txhua tus neeg ntawm ib tsev neeg twg lub luag hauj lwm muaj feem tu saib xyuas ib tug tsiaj twg.
Yeej muaj tej neeg Austalia coob heev nyiam tej tsiaj txhu, thiab txhua txhua ob yig ntawm peb yig neeg twg ces yeej yug ib tug tsiaj.
Peb xyoos dhau los ces, Vindhya Nivunhellage thiab nws tus partner James tau txiav txim siab yug ib tug dev.
Tam li yog tus tswv dev ces nws piav tias ''yeej ua rau yus muaj kev zoo siab heev'' rau tej yam me me ntau yam, li ''thaum yus sawv los ces yus pom yus tus dev ntsej muag cus plaws'' los yog ''pheej co twg rau yus tsis hais thaum li uas yus mus txog tsev.''
James thiab Vindhya uas yog neeg Melbourne hasi tias lawv tau txiav txim siab tu ib tug dev rau lub caij lawv muaj peev xwm tu thiab muaj chaw tu tau. Photo: Supplied
Tsis tas li ntawd los yus yuav tsum tau kub siab tiag tiag txog yus tus tsiaj thiab.
“Tsis tsim nyog yuav tej tsiaj coj los ua ib co khoom plig Christmas los yog ib co khoom plig rau ib tug twg lub hnub yug.
“Thiab tsim nyog yog tej yam uas tag nrho yus tsev neeg muaj feem, tias seb ib tug twg ho yuav ua dab tsi los pab tus tsiaj ntawd, thiab yuav tau kub siab txog tus tsiaj ntawd tas mus li.”
Ms Nivunhellage thiaj tau koom nrog nws tus partner los tu nkawv tus dev hu ua Algot.
“James thiab kuv wb tseem tsis tau muaj me nyuam, ces wb thiaj tu Algot tam li yog wb muaj ib tug me nyuam vim yuav tau npaj ntau yam heev.
“Piv txwv li thawj thawj ob peb xyoos thaum xub thawj ntawm Algot lub neej ntawd ces wb yuav tau coj nws mus ua si ntawm dev tej vaj tsiaj ib teev kom nws tau khiav rau thaum sawv ntxov los yog tau khiav rau thaum tsau ntuj.
“Tos wb tau ua li no los vim tias wb tsis muaj qab tsib taug dav."
Yog tias koj qhov chaw nyob tsis muaj chaw qab vag tsib taug, ces ua tib zoo xyuas kom yus tus dev tsis txhob nyob tib leeg ntev heev rau ib lub caij twg los yog tsis tau ua dab tsi li rau ib hnub twg. Credit: Fly View Productions/Getty Images
Tej cai tswj tej tsiaj
Ntawm Australia no ces yeej muaj tej cai los tswj tias puas tu tej dev thiab tej miv pes tsawg tus xwb.
Tara Wards uas yog tus kws lij choj ua hauj lwm yeem thaj uas tswj tej tsiaj ntawm lub koom haum Animal Defenders Office uas yog ib lub koom haum cai lij choj pab daws ntau yam teeb meem cuam tshuam txog tej tsiaj txhu.
Nws tshab txhais tias txawm tias tej cai ntawm tej nom tswv xeev thiab tej nom tswv zos sib txawv, los yeej muaj qee yam cai uas yeej teev tias tej tswv tsiaj tsis hais miv los yog dev yuav tau ua dab tsi thoob teb chaws.
Suav cov kev yuav tau nruab michrochip rau yus tus tsiaj nrog thiab.
“Yus yeej muaj peev xwm nruab microchip rau lwm yam tsiaj tau thiab. Tsuas nyob ntawm seb yus puas xav them me ntsis nyiaj xwb. Tab sis yog miv thiab dev lawm ces yuav tsum tau nruab rau.
Ms Ward tshab txhais tias “Tus kws kho tsiaj los yog tus neeg uas nruab tus microchip rau tus tsiaj ntawd yuav yog tus teev tej xov xwm rau tej database tias seb leej twg yog tus tswv tsiaj no thiab yog tus tsiaj ntawd ploj mus lawm ho yuav hu rau leej twg.''
Tsis tas li ntawd los tej tswv miv thiab dev yuav tsum tau teev zem lawv tej tsiaj nrog tej nom tswv zos thiab.
Microchipping involves “a tiny chip the size of a grain of rice inserted in the neck or shoulders area of the dog or cat”, explains Tara Ward from the Animal Defenders Office. Credit: FatCamera/Getty Images
“Tej no yog ob co txheej txheem sib txawv. Cov kev nruab microchip rau ib tug tsiaj twg ces yog cov kev txheeb yus tus miv los yog yus tus dev. Hos cov kev teev zwm yus tej tsiaj ces yog qhia tej xov xwm kom ntxaws txog yus tus dev los yog yus tus miv nrog rau nom tswv zos tej npe tsiaj.''
Thaum tham txog cov kev sam yus tej tsiaj ces tej xeev nyias yeej muaj nyias tej cai siv sib txawv.
“Piv txwv li thaum yus tus miv los yog tus dev raug teev zwm lawm, ces yuav tias yus tsis tau muab sam ces yuav tau them nqe kim zog, los yog yus yuav tau thov ntawv tso cai txhua xyoo mas thiaj muaj cai tu tau tus tsiaj ntawd thiab yus yuav tau them ib co nqe rau tej no.”
Thiaj xav kom txheeb tej cai uas yus tej nom tswv zos siv kom yus ua raws tej hauj lwm yus yuav tsum tau ua tam li yog ib tug tswv tsiaj.
Ms Ward hais tias “Tej nom tswv zos yog cov lis tej cai tswj tej dev thiab tej miv. Ces thiaj tsis xav kom yus yuam tej cai no ces vim yus tsis xav kom muaj plaub ntug cuam tshuam txog yus tej tsiaj,”
Cov kev teev zwm yus tej tsiaj yog ib txoj xub ke yooj yim tshaj plaws los teev tias yus yog tus tswv tsiaj raug kev raug cai yog tias yus tus tsiaj ntawd ho ploj lawm, los yog tsis nrog yus nyob lawm thiab yus xav tau rov qab. Credit: Kanawa_Studio/Getty Images
- New South Wales
- Australian Capital Territory
- Victoria
- South Australia
- Western Australia
- Tasmania
- Queensland
- Northern Territory
Cov kev tswj yus tus tsiaj: coj mus kawm thiab tu thiab saib xyuas
Thaum tham txog tej dev lawm ces cov kev coj mus kawm yog tej taw qhia rau koj seb koj puas yuav ua tus qhia koj kheej los yog ntiav ib tug paub qhia tsiaj los ua tus qhia.
Cov kev coj mus kawm tiab muaj tej neg paub qhia tsiaj ua cov qhia yuav tau txais txiaj ntsim ntau yam, vim yeej npaj tau cov sob kawm qhia zoo, thiab tsim ib co program tsi ntsees coj los hloov yus tus tsiaj tej cwj pwm thiab pab kom yus tus tsiaj tau mus koom thiab poo nrog lwm cov me nyuam tsiaj thaum tseem yau.
Nadia Peiris ces yog ib tug care manager ntawm lub koom haum saib xyuas tej tsiaj hu ua RSPCA Victoria uas yog lub koom haum pov puag kom tsis txhob ua phem rau tej tsiaj txhua qhia qee cov lus taw qhia tseem ceeb thaum yus xaiv ib tug kws qhia yus tus dev tias:
“Peb yeej ib txwm taw qhia kom ub ib yam dab tsi zoo, thiab muaj cov kev qhia zoo, thiab siv tej khoom ntxias kom tus tsiaj ntawd mloog thiab ua raws li qhov tsim nyog.
“Tab sis yuav tau ua tib zoo xyuas kom pib qhia kom ntxov npaum li ntxov tau, vim rau qhov yog yus muaj peev xwm qhia ntau npaum li cas rau thaum tej tsiaj no tseem yau ces yuav zoo npaum li ntawd. Thiaj xav kom yuav tau qhia ua ntuv zus.”
Tsis tas li ntawd los kuj yeej muaj ib co nroj tsuag xyoob ntoo kuj yog ib co taug rau tej tsiaj thiab yog tias lawv noj. Yog tias yus pom tias yus tus miv pheej noj thiab zom ib co nroj tsuag twg, ces xav kom yus nrhiav ib co nroj coj los cog rau lawv noj. Source: Moment RF / Isabel Pavia/Getty Images
Ntau yam uas tsim nyog yus paub txog yus tus tsiaj:
- Yuav tau xyuas kom yus tus tsiaj tsis txhob muaj cab thiab tsis txhob muaj mub muaj tuv tsis hais yus tus tsiaj ntawd tsis hais yuav cia tus tsiaj ntawd nyob hauv tsev los yog nyob nraum zoov li.
- Txawm tias tej dev ntawd qhov ntswg qhuav qhuav los txhais tsis tau tias lawv mob.
- Thiab miv thaum dhia rau ib qho chaw twg ces yeej tsis ib txwm xuas lawv txhais taw mus txheem.
- Miv yeej ib txwm nyooj tshee tshee thiab dev ces yeej ib txwm co lawv tus tw coj los qhia txog lawv cov kev xa, uas tej zaum kuj tsis yog qhia tias lawv zoo siab thiab.
Yus tej tsiaj tej zaub mov noj thiab lawv cov kev noj qab haus huv yog yus tej luag hauj lwm uas yuav tau tu thiab saib xyuas thiab yuav tau npaj nyiaj coj los siv rau ib hlis twg.
Dr Kate Golaszewski uas yog tus coj lub koom haum tsev kho mob tsiaj hu ua Lort Smith ntawm Campbellfield hais tias “Yog thaum tham txog zaub mov rau tej tsiaj noj lawm, ces qhov tseem ceeb tshaj plaws ces yog xyuas kom npaj tau tej zaub mov haum rau yus tus tsiaj noj thiab haum raws li lawv tej hnoob nyoog,”
Thiab kom nco tias dev thiab miv yeej swm tej zaub mov uas yus pub rau lawv noj.
Dr Golaszewski tshab txhais tias “Tej thaum ces tej neeg pheej hais tias 'Vuag, cas ho muaj lwm hom zaub mov pub tsiaj uas txo tus nqe muag pheej yig, ces kuv siv yuav coj los pub rau kuv tus tsiaj noj lim tiam no seb'. Tab sis yog yus hloov tej zaub mov rau yus tus tsiaj noj ces zoo li yeej tsis tshua haum lawv pes tsawg thiab yuav tau noj ib lub caij twg mas lawv tej plab hnyuv thiaj swm nrog yam zaub mov ntawd thiab,”
Nadia Peiris ntawm lub koom haum RSPCA hais tias kom tsis txhob xav tias cov kev tu yus tus tsiaj tej hniav tsis yog ib co tseem ceeb thaum tham txog cov kev noj qab haus huv rau yus tus tsiaj lawm. Credit: Capuski/Getty Images
Thiab tsis xav kom muab tej zaub mov neeg noj pub yus tej tsiaj, vim muaj tej thaum ces yeej ua rau muaj teeb meem tsis tau txais kev noj qab nyob zoo ntau yam rau lawv thiab.
“Piv txwv li chocolate, yog muab rau peb tej tsiaj noj ces thaum xub yuav ua rau lawv cus heev tab sis tom qab ntawd ces tej zaum kuj ua rau yus tus tsiaj ntawd nriaj ib ce thiab. Thiab yog poob rau tej xwm txheej phem tshaj plaws ces tej zaum kuj yuav ua rau yus tej dev cia li tsis hnov qab lawm.''
Dua ntawm cov kev yuav tau coj yus tej tsiaj coj mus ntsib kws kho tshiaj tas mus li lawm, ces yog tias yus tej tsiaj tseem ho muaj ntau yam mob li mob plawv los yog mob tawv nqaij thiab ces haj yam yuav tau mus ntsib kws tshiaj tsiaj ntau tshaj qub ntxiv thiab.
Dr Golaszewski hais tias txawm li cas los qhov kawg ces tej tsiaj los yeej zoo tib yam li tib neeg thiab uas yog tias yog muaj ib cov kev pauv hloov dab tsi ua yus tus tsiaj tej kev noj qab nyob zoo uas yus txhawj xeeb lawm ces tsim nyog yuav tau kub siab coj mus ntsib tej kws kho tsiaj kom sai thiab. Thiab yog tias yus ho pom tej yam dab tsi txawv txav li zoo li tus tsiaj ntawd ntsoos ntsoos, qaug zog los yog lwm yam dab tsi txawv lawm ces qhov zoo tshaj plaws xav kom coj mus ntsib kws kho tsiaj txheeb seb yog tim dab tsi.
Yog yus tsis paub tseeb tias tej nom tswv zos tej cai o yuav muaj teeb meem dab tsi rau yus tus tshiaj los yog muaj kev cuam tshuam plaub ntug txog yus tus tsiaj tawm li yog tus tswv tsiaj, ces koj muaj peev xwm sab lawm nrog lub koom haum Animal Defenders Office.
Thiab yog tias yus xav kom tau siv ib co kev kho mob los yog ib co kev tu saib xyuas yus tus tsiaj los yog ua ib siab tsis tu yus tus tsiaj ntxiv lawm, ces txheeb tej xov xwm ntau yam ntawm lub koom haum RSPCA lub vas sab (website) ntawm yus lub xeev seb ho muaj tej programs dab tsi pab.
Subscribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia kom koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
