Tsis hais koj yog cov neeg nyuam qhuav pib yees duab tshiab, los yog ib tug neeg tsim cov social media content, los yog ib tug neeg yees duab tam li yog koj txoj hauj lwm, yog tej yam tseem ceeb heev uas koj paub tias koj muaj peev xwm yees tau duab qhov twg thiab tsis pub koj yees duab qhov twg. Ntxiv no yog tej koj yuav tau ras txog ua ntej koj yuav yees kom tau ib daim duab zoo nkauj, thiab yees tau yam raug kev raug cai.
NTSIB LUS:
- Koj muaj peev xwm yees tej neeg ntawm zej tsoom tej chaw, tab sis tsis muaj cai coj mus siv ua lagluam yam tsis tau txais kev tso cai pom zoo ntawm tej neeg ntawd.
- Koj yuav tsum thov kev tso cai yees duab ntawm ib tug twg tej chaw, tsev suav cov kev yees duab ntawm ib thaj teb twg thiab.
- Txwv tsis pub yees duab ntawm tej yeej tub rog los yog chaw tub rog.
- Qhov zoo tshaj plaws ces ua raws li cov kev taw qhia ntawm ib daim phiaj twg los yog cov kev taw qhia ntawm tej neeg zejzog yog tham txog cov kev yees neeg txum tim tej chaw los yog zej tsoom tej chaw uas tsim coj los nco txog ib tug twg ib pab pawg neeg twg los yog ib co koom txoos tseem ceeb twg.
- Kuv puas muaj peev xwm yees ib tug twg duab ntawm zej tsoom ib qho chaw twg?
- Kuv puas muaj cai mus rau hauv ib tug neeg ua teb thaj teb mus yees duab?
- Puas muaj ib co chaw uas txwv tsis pub yees duab?
- Kuv puas muaj peev xwm siv tau ib lub drone yees duab ua kev lom zem ua si?
- Dab tsi yog ib co cwj pwm zoo ntawm tus neeg yees duab?
Kuv puas muaj peev xwm yees ib tug twg duab ntawm zej tsoom ib qho chaw twg?
Tsis hasi yuav yog koj tab tom yees duab ntawm kev, ntawm ib lub park los yog ntawm ib thaj ntug hav suab puam hiav txwv li, Pia Jessen uas yog tus coj lub koom haum Australian Photographic Society tshab txhais tias yog tej yam tseem ceeb uas yuav tau totaub tias thaum twg thiaj tsim nyog yees ib tug twg duab ntawm zej tsoom ib thaj chaw.
"Feem ntau ces, tej neeg yeej muaj peev xwm yees duab thiab yees tej yeeb yaj kiab ntawm zej tsoom tej chaw ntawm Australia no yam tsis tas thov kev tso cai ntawm ib tug twg li. Vim zej tsoom tsis muaj cai yuav tsis kam ib tug twg yees duab."
Nyog teb chaws Australia no ces yeej ib txwm tau txais kev tso cai rau cov kev yees tej neeg duab ntawm zej tsoom tej chaw. Txawm li cas los yog tias xav coj tej duab yees tau ntawd coj mus siv ua luam ces yuav tsum tau txais kev tso cai pom zoo tso, thiab cov kev yees tej neeg duab ntawm tej chaw tsis pub yees los yog yees coj los ua cov kev thab zes lwm tus no kuj yog ib co kev ua txhaum cai thiab.
Sharon Givoni uas yog ib tug kws lij choj paub txog cov kev lagluam thiab cov creative arts lhais tias tseem muaj ntau yam ntxiv thiab uas tsim nyog koj paub txog thiab.
"Yog tias koj yees ib tug twg duab raws ib kis twg uas thuam saib tsis taus, uas rau tus neeg ntawd chim tu siab los yog cuam tshuam rau ib yam tsis zoo ces tej zaum tej neeg ntawd kuj yuav coj kom mus hais plaub thiab,''
"Txhua qhov chaw uas thaum peb tawm ntawm peb tej taw rooj tsev lawm ces yeej muaj cai tswj. Piv txwv li tej zaum koj lub gym nws muaj nws tej cai tswj, koj tej pa da dej zos nws kuj muaj nws tej cai tswj. Yog li qhov zoo tshaj plaws thiaj xav taw qhia kom yuav tau txheeb ua ntej tso.''
Kuv puas muaj cai mus rau hauv ib tug neeg ua teb thaj teb mus yees duab?
Tej social media platforms ces yeej muaj tej duab yees tej tiaj nrag toj roob hauv pes zoo nkauj heev piv txwv li ib thaj teb uas tab tom muaj cov zaub canola los yog lwm cov qoob loo tab tom tawg paj paug.
Yog li ntawd txawm tias muaj tej duab zoo nkauj heev coj mus tso ntawm tej social media los tsis yog tias yuav tsis muaj teeb meem rau yus. Cov kev cia li nkag mus rau ib tug twg ib thaj teb/chaw yam tsis tau txais kev tso cai yog cov kev ua txhaum cai, thiab tsim kev puas tsuaj rau tej qoob loo uas yuav ua rau tej tswv teb poob nyiaj.
Justin Hobson yeej ua teb ntawm ib thaj chaw zoo nkauj heev ze ntawm Ballarat ntawm zos toj siab ntawm xeev Victoria.
Nws hais tias "Ntawm peb qhov chaw ntawd mas yog ib thaj chaw zoo nkauj heev. Thiab thaum tej zaub canola tawg paj ces yeej muaj neeg coob heev nyiam mus yees duab - tab sis tej zaum kuj yuav raug kev phom sij rau thaj teb ntawd tau."
Piv txwv li tej zaum tej neeg kuj yuav coj tej av, tej noob nyom los sis yog coj ib co kab mob mus kis rau tej qoob loo ntawm thaj teb ntawd tau thiab.
"Yog tias ib tug twg mus rau yus thaj teb mus yees duab, thiab yog muaj ib tug twg raug mob ne leej twg yuav pov plob? Thiab yog ho muaj neeg pov tej khoom seem txeej rau thaj teb ntawd los yog tsis kaw qhov rooj ne ho yuav muaj teeb meem dab tsi. Vim tej zaum thaj teb ntawd dav txog 500 acres diam."
Thaum kawg, ces yeej tsis txawv qhov tias kuv cia li taug kev mus rau koj tej qab vag tsib taug thiab cia lus mus saib koj tej vaj zaub ces yuav ua rau koj xav tias, 'Tus neeg ntawd (koj) tab tom ua dab tsi?' Vim rau qhov yeej muaj ntsis sib xws li ib thaj teb loj - uas koj cia li nyiag hla/nkag mus rau ib tug twg thaj teb yam tsis tau txais kev tso cai.Justin Hobson
Yog li ntawd cov lus taw qhia zoo tshaj plaws ces kom nyob sab nraum ntug laj kab no yees duab xwb thiab yuav tsim nyog thov kev tso cai ua ntej yuav nkag mus rau thaj teb ntawd. Tej swv teb feem coob yeej zoo siab heev yuav tso cai rau tej neeg uas hwm lawv.
Puas muaj ib co chaw uas txwv tsis pub yees duab?
Yeej muaj qee thaj chaw ces yeej tsis pub yees duab vim cuam tshuam txog tej kab lis kev cai, piv txwv li neeg txum tim tej chaw tseem ceeb thiab tej chaw uas tau txais kev pov puag.
Ms Givoni hais tias "Tej chaw no ces yog tej uas tej tswv neeg txum tim ib txwm tswj thiab tej zaum yuav tsis pub zej tsoom sawvdaws mus xyuas tau dawb, thiab tej zaum kuj yuav tsis tso cai rau yus yees duab kuj tsuas nyob ntawm seb ib thaj chaw twg tsi ntsees ho muaj tej cai dab tsi los tswj xwb.''
"Muaj qee cov chaw ces yuav tau thov kev tso cai hos lwm cov ces yeej txwv tu nrho (tuag nthi) tsis pub, thiab tej laj thawj tos ho ua li no rau qee cov chaw los tej zaum kuj cuam tshuam nrog tej kab lis kev cai, tej ntsuj tseem ceeb, thiab yeej muaj tej cai cuam tshuam thiab. Yog li ntawd cov lus taw qhia zoo tshaj plaws ces xav kom xub mus txheeb tias seb leej twg yog tus tswj thaj av ntawd thiab thov kev tso cai, tsis tas li ntawd los yog tias tsis paub tseeb ces qhov zoo tshaj plaws yuav tau nug tso."
Tej chaw teev hawm thiab tej pej thuam ces tej zaum kuj yuav tsis pub yus yees duab thiab. Tsis tas li ntawd los tseem yuav tau thov kev tso cai thiab yog tias yus mus yees duab ntawm ib lub chaw khawb peev txheej twg los sis yog tsoom fwv tej yeej tub rog, uas yus yuav tau ras txog cov kev nyab xeeb thiab kev ruaj ntseg.
Tej dej num tiv thaiv teb chaws ces yeej txawv lwm yam thiab yeej raug txwv. Cov kev yees duab ntawm tej chaw tsis tsim nyog yees tej zaum kuj yuav ua rau muaj tej teeb meem cuam tshuam txog haiv neeg txoj kev ruaj ntseg, txawm tias tej thaum yus nyob sab nraum ntug laj kab yees xwb.Sharon Givoni
Thiab txawm tej chaw zoo li tej kiab khw loj thiab tej vaj botanical gardens yeej qhib rau zej tsoom siv, los yuav tsum thov kev tso cai tso yog tias yus yog tus kws yees duab tam li yus txoj hauj lwm (professional photography).
Kuv puas muaj peev xwm siv tau ib lub drone yees duab ua kev lom zem ua si?
Drones yeej tau ras los ua ib co twj uas muaj neeg nyiam siv coj los yees duab ntau zujzus tuaj ntxiv lawm. Yog tias yus yuav siv ib lub drone coj mus yees duab ua luam ces yus yuav tsum tau coj mus teev zwm kom raug cai thiab thov ib daim ntawv tso cai siv ntawm lub koom haum Civil Aviation Safety Authority.
Txawm li cas los yog tias yus tsuas siv drone los ua kev lom zem, los tsuas yog tso ya ua si kom lom zem xwb, ces tsis tas mus ua ntaub ntawv thov kev tso cai dab tsi - txawm li cas los kuj yeej tseem muaj tej cai coj los tswj cov kev siv drone kom tau txais kev nyab xeeb thiab.
Ms Jessen hais tias "Qhov zoo tshaj plaws thiab tseem ceeb tshaj plaws ces xav kom mus ntsib thiab mus txheeb kiag kom yus swm nrog txhua yam cai xav kom yus ua ua ntej tso, uas yuav pab kom yus ruaj siab tias yuav tau txais kev nyab xeeb rau tej neeg thiab tej tsiaj txhu rau lub caij yus tseem tab tom siv lub drone ntawd."
Qee cov piv txwv teev txog tej cai tswj cov kev siv drone ces yeej tsis pub ib lub drone twg yas siab tshaj 120 metres tshoom ntawm npoo av mus rau saum ntuj, thiab yuav tsum tswj lub drone ntawd kom tsis txhob mus ze rau ntawm lwm cov neeg, thiab tsis pub ya lub drone ntawd uas yuav ua rau muaj teeb meem rau lwm cov neeg, tej vaj tse los yog ib lub dav hlau.
Thiab yeej muaj ntau cov kev txwv tsis pub tej drones ya ze tej hav zoov kub hnyiab, thiab tej tsiaj qub li cov ntses whales.
Dab tsi yog ib co cwj pwm zoo ntawm tus neeg yees duab?
Ms Jessens hais tias tsuas nyob ntawm seb yus ho xav mus yees duab dab tsi xwb, tab sis qhov tseem ceeb ces yuav tau ua raws li tej cai ntawm thaj chaw ntawd.
"Yog tias muaj ib daim phiaj qhia, ces xav kom ua raws li cov kev taw qhia uas tau sau qhia ntawd. Hos yog tsis muaj ces kom nco rau yus nruab siab tias yuav tsum hwm tej neeg thiab tej chaw ntawd."
Thiaj yog tej yam tseem ceeb heev uas yuav tsum xyuas kom yus tau txais kev nyab xeeb thaum taug kev rau ib qho chaw twg, tsis txhob tsim kev puas tsuaj rau tej chaw ntawd thiab hwm lwm tus tej chaw.
Ms Givoni hais tias txawm tias muaj peev xwm pom thaj chaw ntawd thiab muaj peev xwm mus tau rau thaj chaw ntawd los txhais tsis tau tias yus tau txais kev tso cai mus tau rau thaj chaw ntawd los sis yog seb puas tau txais kev nyab xeeb mus rau thaj chaw ntawd.
"Qhov zoo tshaj plaws ces xav kom xub xub nug ua ntej tso mam li yees duab tom qab."
Subcribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia koj koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
Mloog tau xov xwm tshiab ntawm SBS Hmong, download SBS Adio app, caum SBS Hmong ntawm Facebook, mloog tau Youtube, Spotify, Podfollow, iHeart Radio, Google Podcast thiab Apple Podcast.
