Raws li tau muaj ib cov kev tshuaj ntsuam tshiab los ntawm lub koom haum Association of Super Funds Australia (ASFA) ces kuj pom tau tias muaj tej neeg Australia 2.7 million tus uas tsis hais lus Askiv ua thawj hom lus yog cov neeg uas khaws tau nyiaj superannuation tsawg dua yog piv rau lwm cov pej xeem uas hais lus Askiv ua thawj hom lus.
Mary Delahunty uas yog tus coj lub koom haum ASFA tshab txhais tias 'vim tej neeg tsis hais lus Askiv ua thawj hom lus no pheej ua cov hauj lwm gig economy ntau xwb thiab yeej muaj ntau yam sib chab sib chaw nrog cov super.'
Kuj muaj xov xwm qhia tias tej txiv neej neeg Australia uas tsis hais lus Askiv ua thawj hom lus hnoob nyoog tshaj 55 xyoos tsuas khaws tau nyiaj super txog $315,000 rau lub caij lawv so tsis ua hauj lwm xwb yog piv rau tej nyiaj super theem nrab uas tej neeg Australia feem coob ua khaws tau txog li $420,000. Tsis tas li ntawd los yog tias tseem yog tej poj niam ntawm cov neeg uas tsis hais lus Askiv ua thawj hom lus uas muaj hnoob nyoog tib yam li tej txiv neej thiab ces haj yam khwv tau tej nyiaj no tsawg dua thiab uas tam sim no ces tsuas tau txog li $240,000 xwb.
Lwm cov laj thawj ces yog tej neeg no ua hauj lwm rau yav lig ntawm lawv lub neej.
Tsis tas li ntawd los lawv kuj ua tej hauj lwm khwv tau nyiaj tsawg ntau dua xwb thiab.
Professor Susan Thorpe ntawm tsev kawm qib siab University of Sydney tshab txhais tias tej zaum tej neeg ua tej hauj lwm no los kuj yuav raug tej tswv lagluam yuam siv yam tsis raug kev raug cai thiab.
Nws hais tias 'tej zaum tej neeg no tsis paub txog tias tej tswv lagluam muaj lub luag hauj lwm yuav tsum tau them tej nyiaj superannuation rau yus, thiab yog ib txoj cai uas yuav tau ua, tab sis tej tswv lagluam yeej tsis them, los yog them tsawg dua rau lawv.'
Mary Delahunty thiaj hais tias 'kom nces cov Low Income Superannuation Tax Offset no kom ntau ntxiv rau tej neeg ua hauj lwm kwv tau nyiaj tsawg kom tsis txhob tau them se ntau rau lawv tej nyiaj super ces kuj yuav pab kom tau nyiaj super ntau me ntsis ntxiv rau tej neeg txog li ntawm 200,000 tus.'
Yog tias ua li no tiag ces yuav pab kom ib tug neeg ua hauj lwm khwv tau nyiaj $44,000 ib xyoos twg uas muaj hnoob nyoog 37 xyoo thiab xav so tsis ua hauj lwm thaum nto hnoob nyoog 67 xyoo ces yuav tau nyiaj super ntau tuaj ntxiv ntawm $293,000 mus ua $336,000 lawm.
Yog li ntawd tsis ntev los no tsoom fwv Albanese thiaj tau qhia tias nws yuav them nyiaj superannuation rau tej niam txiv uas so yug me nyuam tshiab uas tau cov nyiaj Paid Parental Leave ntawd kom tej neeg tau nyiaj super ntau tuaj ntxiv.
Thiab tam sim no ces yog koj ua hauj lwm ntawm teb chaws Australia no ces tej tswv lagluam yuav tsum tau them nyiaj super rau koj txog li 11% ntawm tej nyiaj koj khwv tau ib limtiam/ob limtiam twg rau koj thiab raws li ATO tau qhia ces tseem yuav nce kom ntau tuaj ntxiv ua 12% txij li tim 1 lub 7 hli ntuj xyoo 2025 no mus.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
