Raws li ABS (Australian Bureau of Statistics tau qhia ces muaj zej tsoom txog 95% tau mus koom Australia cov kev txheeb xyuas pej xeem xyoo 2016 dhau los.
Cov xov xwm tseem ceeb tshawb fawb tau los ntawm cov kev txheeb xyuas pej xeem xyoo 2016 muaj li no:
- Pej xeem Australia tsis ntseeg mooj kav moj coj ntau lawm: muaj txog li 1 feem 3 tsis ntseeg ib hom kev ntseeg dab tsi los yog muaj txog li 32.6% lawm. Tab sis tseem muaj cov neeg coj kev cai Christianity txog li ntawm 73% rau xyoo 2016. Cov ntseeg coob zum 2 ces yog kev cai Islam, ntxiv ntawd ces yog Buddhism thiab Hinduism. Cov kev cai Hinduism no yog cov muaj neeg ntseeg coob tuaj sai tshaj plaws. Tab sis yeej muaj neeg ntseeg Buddhism, Islam thiab Sikhism coob tuaj ntxiv lawm thiab.
- Pej xeem Australia ces yog: Cov poj niam 38 xyoo yuav txiv, yug hauv tebchaws Australia, muaj caj ceg neeg Askiv thiab hais lus Askiv, nyob hauv nroog, khwv tau nyiaj $662 rau ib limpiam thiab muaj 2 lub tsheb.
- Muaj pej xeem coob ntxiv: Australia pej xeem coob tuaj ntxiv 2 npaug txog li 24.4 roob tus rau 50 xyoo no lawm los yog muaj 2 roob (million) tus ntxiv txij tau txheeb xyuas pej xeem zaum dhau los xyoo 2011 ntawd. Muaj txog li 84.9% thiaj yog cov pej xeem neeg Australia tiag hos 9.1% ntawd tsuas yog cov neeg nyob ruaj (permanent residents) tsis yog pej xeem. Muaj txog 47.3% yog cov ua niam ua txiv uas yug hauv tebchaws Australia no. Tsuas yog 34.4% thiaj yog cov niam txiv yug txawv teb chaws tuaj nyob hauv Australia no xwb. Muaj pej xeem txog 97% tsis yog cov neeg txum tim los yog keeb cag neeg ntawm tebchaws Australia uas yeej ib txwm nyob ntawm lub tebchaws no. Tsuas muaj txog 2.7% (590,056) tus thiaj yog Australia cov keeb cag neeg xwb.
- Muaj neeg siv ntau hom lus hauv Australia tuaj ntxiv lawm: tau muaj cov neeg hais lus Askiv (English) tom tej vaj tse txog 73% lawm xwb. Cov hais coob zum 2 yog lus Suav, lus Arabic, lus Cantonese, thiab lus Nyab laj sib law liag.
Tham txog kev siv lus thiab hais lus ces muaj neeg siv txog 77.7% lus Askiv (English) diam. Cov siv ua zum 2 ces yog lus Suav, zum 3 yog Arabic, Cantonese (Suav Hongkong) thiab lus Nyab laj (Vietnamese) sib law liag. Cov hluas neeg nyab laj tsis tshua hais lawv cov lus ntau ntxiv tuaj lawm. Hos muaj cov laus neeg Greek Community hais lawv cov lus ntau tuaj ntxiv lawm.
Tim Maryfield uas yog tus coj ntawm lub koom haum Asia Education Foundation hais tias:
" Peb yauv tsum tau los xyuas cov kab lis kev cai uas tsis sib txig sib luag, los xyuas cov kev pheej tseem siv ib hom lus, cov tswv yim tswj tej txhooj cai qhia ntawv uas tsis tau yuam kom tej me yes yuav tau kawm hom lus ob hauv tebchaws Australia no. Vim yog peb los xyuas tej no tau zoo lawm ces yuav pab tau peb lub tebchaws kom muaj peev xwm sib tw tau lagluam thiab muaj peev xwm ua lagluam nrog cov tebchaws Asia uas yeej muaj cov neeg tsiv teb tsaws chaws ntawm cov tebchaws no tuaj nyob coob heev hauv Australia no lawm."
Hos xeev New South Wales tus pwm tsav lis laj fai txog ntau haiv neeg tej kab lis kev cai thiab cov lus Ray Williams tau hais tias:
" Lub koom haum Australian Bureau of Statistics tau txheeb tau cov xov xwm txheeb pej xeem tseem ceeb uas qhia txog qhov tseeb ntawm peb tej neeg zejzog ntawm nroog Sydney thiab xeev New South Wales kom tsoom hwv muaj peev xwm tsim tau tej cai thiab npaj tswv yim sawv cev rau tej neeg zejzog kom npaj tau tej peev txheej thiab tsim tau cai coj los siv txhawb nqa tau tej koom txoos rau tej neeg zejzog kom loj hlob huam vam tuaj thiab tsim kom tau tej neeg zejzog tej tsev qhia ntawv ua hom lus thib ob ntawd. Vim yog tej yam tseem ceeb heev rau peb lub xeev thiab peb lub tebchaws kom tau txais tej txiaj ntsim lagluam rau lub neej pem suab"
Teb chaws Australia tej pej xeem muaj txoj sia nyob ntev tuaj, laus zog tuaj, muaj ntau haiv neeg tuaj nyob ntxiv feem ntau yog tuaj ntawm cov tebchaws Asia, ntseeg kev cai los sis mooj kav moj coj tsawg ntxiv lawm.
2 feem 3 ntawm Australia cov pej xeem nyob hauv nroog. Xeev New South Wales lus nroog Sydney yog lub nroog loj tshaj plaws thiab muaj neeg nyob coob tshaj plaws tab sis nroog Melbourne ntawm xeev Victoria los kuj muaj neeg nyob coob tuaj ntxiv raws yuav cuag Sydney lawm thiab.
1 tug ntawm 6 tus pej xeem Australia muaj hnoob nyoog tshaj 65 xyoo lawm.
Muaj Hmoob coob txog 2,449 leeg, Myanmar (Phabmab) 32,655 tus, Thaib 66,229 tus, Cambodian txog 33,149 tus, Nplog coob txog 10,402 tus, Nyab laj txog 219,000 tus.
Tsis tas li no tseem muaj Australia cov pej xeem txog li 50% tuaj ntawm 5 lub tebchaws tuaj nyob rau tebchaws Australia no uas Indian yog cov coob tshaj plaws. Saib daim duab hauv qab no.
Raws li Nicholas Briddle ntawm txhooj faj lem Australian National University tau hais tias " tau muaj cov neeg txum tim (Cov keeb cag neeg) ntawm tebchaws Australia uas yav dhau los tsis kam qhia tias lawv yog leej twg tau qhia tias lawv yog cov neeg txum tim ntau tuaj ntxiv lawm thiab."
Txheeb tau cov xov xwm txheeb pej xeem kom ntxaws ntxiv tau raws li no:
