Txhua lub xyoo twg ces yeej muaj pej xeem Australia txog 1,500 tus raug ntsuam tau tais tau cov kab mob cancer hu ua Chronic Lymphocytic Leukaemia, uas yog ib cov kab mob cancer maj mam mob qeeb qeeb xwb tab sis yog ib cov kab mob nyaum kawg nkaus li.
Yog ib tug neeg twg raug ntsuam tau tias mob hom kab mob cancer no ces tsuas muaj txoj sia ua tau lub neej nyog ntev txog li 10 lawm xwb, uas yog ib hom kab mob cancer mob rau cov ntshav dawb hauv tus paj hlwb txha thiab thaum mob loj tuaj ces mam li kis mus raws cov ntshav kis mus thoob rau tus neeg mob ntawd lub cev.
Thaum uas Warren Lippiat raug ntsuam tau tias nws tau tus kab mob cancer Leukaemia no ces lub sij hawm twb dhau 5 xyoo mus lawm thiab tsuas tshuav 5 xyoo rau nws ua lub neej nyob lawm xwb, ces ntshe xyov nws puas yuav muaj caij nyoog nyob txog rau thaum nws tus me nyuam tau mus kawm ntawv thawj hnub ntawm teej kawm.
Tab sis kuj muaj hmoo uas tej xwm txheej tau tig qab teg ua qaum tes pab tau nws hloov nws lub neej lawm tom qab uas nws tau txiav txim siab mus koom sim cov tshuaj tshiab hu ua Imbruvica uas coj los kho cov kab mob cancer no. Tam sim no ces nws zoo tu qab lawm thiab yeej cia siab ntsoov yuav koom ua lub neej nrog nws tsev neeg dua ib zaug ntxiv.
"Kuv yeej npaj ntsoov tias yuav pom kuv tej me nyuam loj hlob tiav nkauj tiav nraug txog rau thaum lawv muaj hnoob nyoog 21 xyoos, thiab yog kuv tseem muaj txoj sia nyog mus txog rau thaum uas lawv yuav poj yuav sev muaj txwj muaj nkawm thiab muaj cuab yig mas haj yam zoo, vim rau qhov thaum ua ntej ntawv ces kuv yeej tsis muaj tej cib fim hais no li."
Yog li tom qab tsoom hwv Australia tau coj cov tshuaj kho kab mob cancer tshiab no mus teev zwm rau nws cov tshuaj pab cuam Pharmaceutical Benefits Scheme (PBS) lawm ces thiaj muaj peev xwm txo tau tus nqe kho cov mob no ntawm 100,000 dollars los tshuav tsawg dua li 500 dollars lawm xwb. Malcolm Turnbull uas yog Australia tus thawj pwm tsav hais tias -
"Yog tej yam zoo kawg nkaus li, vim tsis yog muaj peev xwm pab cawm tau cov neeg li Warren txoj sia xwb tab sis tseem pab tau nws tsev neeg, pab tau tej neeg mob tsev neeg, thiab pab tau lawv tej me nyuam kom nrog luag muaj niam muaj txi koom nrog lawv ua lub neej ntev niaj ntau xyoo rau yav pem suab thiab."
Zes Kais (Professor) Stephen Mulligan uas yog tus coj lub tuam chav teeb txheeb txog ntshav thiab cov kab mob cuam tshuam txog ntshav ntawm tsev kho mob Royal North Shore Hospital hais tias -
"Cov tshuaj no yuav mus tua cov protein uas yug cov cancer kom cov cancer no txhob ciaj los yog muaj sia, thiab kom txhob mob txhob kis tau ntxiv, ces thaum kawg ua rau cov qog cancer no tuag thiab cov tshuaj no kho tau cov kab mob cancer no zoo lawm."
Bill Petch uas yog tus coj ntawm lub koom haum Leukaemia Foundation qhia tias siv sij hawm ntau xyoo mam li muaj peev xwm los rhawv tsim tau cov tshuaj no coj los siv. Nws hais ntxiv tias lawv siv sij hawm ze txog li ntwm 4 lub xyoos los tsim cov tshuaj no thiab tom qab tsim tau cov tshuaj no lawm los tseem yuav tau siv sij hawm ntau xyoo los sim siv seb cov tshuaj no puas siv tau hauj lwm zoo thiab ua ntej yuav tsim kom tau cov tshuaj tseeb tiag tiag coj los siv. Txawm li cas los xij peem, nws yuav kub siab los xyuas kom tsim tau cov tshuaj no kom sai li sai tau rau tej neeg mob uas tau cov kab mob cancer no tau siv.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
