Nib Lis uas yog ib tug hluas Hmoob Australia tau mus ncaws kabtob rau Australia pab Australia Takraw uas twb tau mus sib tw ntau zaus ntawm Thaib teb dhau los lawm.
Nws hais tias tam sim no Australia Takraw tseem tab tom nrhiav cov neeg xav ncaws kab tob hauv Australia kom txaus los sib sau ua ib pab sawv cev rau teb chaws Australia mus sib tw King Cup ntawm Thaib teb thiab tej zaum mus sib tw ntawm teb chaws India cov kev sib tw ISTAF World Cup 2nd -5th November 2017 thiab King Cup ntawm Thaib teb rau hnub tim 11th -17th December 2017 no.
Nib hais tias yog leej twg xav mus chaw sawv cev rau teb chaws Australia los yog koom nrog Australia pab Australia Takraw ces kom nug nws ntawm Cairns, nug Vaj los yog Tsheej Thoj ntawm Brisbane thiab nug Tub Muas Yaj ntawm Melbourne, los yog mus txheeb xyuas tau Takraw Australia facebook page.
Xyoo no tej zaum yuav muaj Hmoob txog li 8 leej mus koom nrog lwm cov neeg li Kereng Myanmese, thiab lwm cov neeg ntawm central Australia los yog South Australia los yog Western Australia ntawd. Tab sis vim tsis paub seb ib txhia thov puas tau so kawm ntawv los yog so hauj lwm ces tseem yuav saib seb txog lub caij ntawd yuav zoo li cas.
Hais txog cov kev koom mus ncaws kab tob sawv cev rau teb chaws Australia no ces yus yuav tau rho yus nyiaj ntiag tug mus yuav pib dav hlau mus thiab rov qab, tab sis yog thaum mus txog tim Thaib teb lawm ces cov koom haum sib tw ntawm Thaib teb yeej pov plob chaw noj, nqe tsheb mus los, nqe noj haus me ntsi rau Australia pab neeg sib tw lawm thiab. Vim rau qhov yog ib cov kev sib tw tshiab ces tseem tsis tau txais kev pab cuam zoo los ntawm tsoom hwv Australia.
Yog li ces zoo li tseem mus tsis tshua taus li lwm cov teb chaws uas nom tswv yeej muaj nyiaj pab thiab txhawb nqa lawv zoo ces yeej ncaws thiab sib tw tau zoo zuj zus rau txhua lub xyoo ntxiv lawm uas txawv Australia pab uas tseem tsis tau txais kev pab cuam ntawd. Tab sis pej kum haiv yeej yuav muab cov kev sib tw ncaws kabtob (Sepat Takraw) coj mus sib tw hauv cov Commomwealth Game rau xyoo 2022 thiab. Ces tej zaum nom tswv lawv yuav nrhiav cov neeg mus ncaws rau Australia thiab yuav pab cuam zoo dua tuaj ntxiv lawm.
Cov teb chaws ntawm Southeast Asia feem ntau yeej mus koom tsuas tshuav East Timor thiaj tsis mus koom xwb. Nom tswv yeej tua xa ntawv caw cov teb chaws tshaj li 30 tawm lub kom mus koom cov kev sib tw no. Hos lwm cov teb chaws Europe li Bangladesh, Sri Lanka, Oman, Germany, Belgium yog cov tuaj tshiab uas tsis tshua tshaj lij tab sis yeej ncaws tau zoo lawm thiab.
Cov kev sib tw zaum no yuav muaj cov Division ib uas tsis tshuaj tshaj lij los yog cov teb chaws tshiab uas nyuam qhuav mus koom xwb, hos cov Premium ces yog cov teb chaws sib tw tau zoo lawm los sib tw ua ke.
Tab sis raws li Nib Lis tau qhia ces tsaib no yeej tau muaj 4 tug Hmoob tau ncaws rau America pab thiab xyoo no yeej cia siab tias yuav rov ntsib lawv dua ntawm Thaib teb cov kev sib tw King Cup dua.
Tham txog tias seb Nib Lis ho npaj li cas thiab xav tias puas yuav yeej ib cov npib los yog medal rau Australia no ces nws hais tias yog tias Australia pab tseem ncaw tau zoo li qub tsaib no dhau los ces tej zaum kuj yuav tau thiab mam li ncaw kom zoo li zoo tau seb puas yeej ib cov npib los rau Australia.
Nib Lis uas yog ib tug ncaws kabtob sawv cev rau teb chaws Australia los yog Takraw Australia qhia tias yog leej twg tsis nyiam los tsis ua li cas yog nyiam raug ces ho mus koom kom ho muaj Hmoob tau mus ncaws rau teb chaws Australia ces kuj yuav yog ib qho zoo rau Hmoob Australia thiab.
