Professor David Ziegler uas yog tus sau tsab ntawv cej luam txog cov kev teeb txheeb uas tshuaj ntsuam xyuas tej genes ntawm tej neeg mob tej cancer cells qhia tias lub tswv yim no pab kom nrhiav tau ib txoj xub ke zoo tshaj qub ntxiv coj los kho tau ib yam mob cancer twg.
Nws hais tias 'Qhov peb tau ua ces peb txheeb tias seb ho puas muaj tej genes pauv hloov li cas ntawm ib cov cancer li tej cancer tawv nqaij los yog tej cancer mis uas tsuas mob rau tej laus thiab tsis muaj rau tej me nyuam yaus, thiab mam siv tej tshuaj kho tej mob uas mob rau tej laus no coj mus kho tej mob cancer ntawm tej me nyuam yaus.'
Thiab raws li tau muaj cov kev tshawb fawb no rau lub sij hawm 3 xyoos ces kuj pom tau tias 55 feem pua ntawm tej me nyuam yaus yuav laug txog li 400 tus uas siv cov tshuaj chemotherapy ib txwm kho tsis zoo ntawd tej qog cancer kuj yaj tag los sis yeej yaus me ntsis lawm los sis pab kom lawv tus mob no nyob tus yam tsawg li 6 lub hli lawm.
Ces Professor Ziegler thiaj hais tias tom qab tau ob xyoos ces tej kws teeb txheeb kuj tau pom tias muaj tej me nyuam no muaj peev xwm ua tau lub neej nyob ntev tuaj ntxiv txog li ob npaug lawm thiab.
''Tam sim no ces peb yeej muaj peev xwm sim tej no, thiab muaj peev xwm nrhaiv tau ib co kev kho tshiab uas yuav pab kom muaj kev cia siab rau tej neeg mob uas yav tag los yeej tsis muaj tej kev cia siab dab tsi li,'' raws li Professor Ziegler hais.
Xyoo 2015 ntawd ces yuav tau siv sij hawm 1 xyoos mas thiaj txheeb tau tej qob cancer tiav tab sis tam sim no ces tsuas siv sij hawm tsawg dua 1 hlis ces yeej txheeb tau tiav lawm, txhais tau tias yuav muaj peev xwm kho tau tej me nyuam yaus uas mob cancer sai dua thiab kho tau zoo dua lawm.
Yog li ntawd Australia cov kev teeb txheeb no thiaj raug coj mus nthuav tawm rau ntawm phau ntawv xov xwm Journal of Nature Medicine uas yuav raug coj mus faib qhia rau tej kws kho mob thoob ntuj kom tau txais txiaj ntsim nthuav dav tuaj ntxiv los ntawm cov kev teeb txheeb no.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
