SBS tau xaus nws cov kev txheeb xyuas nws cov radio programs tiav lawm. Lub hom phiaj yog los kho kom tsim tau cov radio program siv tau haum raws li tau muaj kev pauv hloov rau txoj kev ua lub neej ntawm teb chaws Australia tam sim no. Xyoo 2012 ces tau los txheeb xyuas lub xov tooj cua SBS Radio no thawj zaug rau lub sij hawm 18 xyoo no. Ces pib txij ntawd los SBS thiaj tau los txheeb xyuas thiab hloov kho nws cov radio program txhua txhua 5 lub xyoo twg ib zaug thiab zaum kawg no tau kho rau xyoo 2016 thaum tau muaj kev txheeb xyaus pej xeem dhau los no.
Raws li cov kev txheeb pej xeem xyoo 2016 txheeb tau ces muaj neeg tshaj 1.3 roob (million) tus tsiv teb tsaws chaw tuaj nyob rau teb chaws Australia no 5 xyoos dhau los thiab muaj neeg ze txog 4.87 roob (million) tus hais lwm hom lus tom lawv tej vaj tse. Yog li xov tooj cua SBS cov radio program thiaj yuav tsum raug kho thiab hloov kom haum raws li lub teb chaws Australia tam sim no.
Tsis tas li no los SBS Radio Services tseem tau los xyuas seb tej neeg cov cuj pwm mloog cov xov tooj cua puas muaj kev pauv hloov dab tsi li cas, los yog seb lawv ho puas mus mloog hauv cov digital platform li cas, lawv ho nyob rau cheeb tsam twg thiab ho ua lub neej khwv tau nyiaj li cas coj los ua ib cov txuam thawj (factors) txiav txim siab tias seb yuav tsim cov radio program twg rau tej neeg zejzog twg mloog.
SBS Radio Hmong Program yeej tsis muaj kev pauv hloov dab tsi thiab tseem tshaj tawm li qub rau 2 hnub:
- Zwj Teeb (Thursday) sij hawm 18:00 (6pm AEDT-Australian Eastern Standard Time)
- Zwj Hnub (Sunday) sij hawm 11 am AEDT
Thiab SBS yuav pib siv cov radio program kho thiab hloov los yog tsim tshiab txij hnub tim 20/11/2017 no mus lawm.
SBS tau los txheeb xyuas nws lub chaw nthuav xov xwm kom muaj peev xwm tshaj tau tej xov xwm raws li lub neej tam sim no rau Australia tej neeg zejzog uas coj ntseeg ntau yam kev cai dab qhuas sib txawv thiab hais ntau hom lus tsis sib thooj ntawd tau mloog kom lawv totaub txog lub tebchaws Australia no txoj kev tswj hwm, txoj kev ua lub neej, kom paub txog Australia tej kev coj taug ua zoo (Australia values) thiaj li muaj peev xwm ua tau lub neej raws li qhov tsim nyog ntawm lub tebchaws Australia no.
Mandi Wicks uas yog SBS tus coj saib xyuas lub tuam chav xov xwm kaw ua suab thiab ua lus tau qhia tias tsim nyog yuav tau los hloov tej xov tooj cua no kom muaj peev xwm tshaj tau tej xov xwm ntawm lub neej tiam neej vam meej thiab raws li tej neeg zejzog no tau muaj kev pauv hloov kom thiaj pab lawv ua tau lub neej ntawm lub tebchaws Australia no.
SBS yeej tau siv cov zauv txheeb xyuas pej xeem xyoo 2016 los ntawm lub koom haum Australian Bureau of Statistics (ABS), tej ntaub ntawv tawm tsim yim tshaj 600 tsab los ntawm tej koom haum neeg zejzog 85 hom lus uas raws li ABS tau qhia muaj ze txog li 5 roob tus hais lwm hom lus thiab cov neeg mloog xov tooj cua SBS, nrog rau tej criteria ntau yam li cov neeg zej zog ntawd muaj coob tsawg npaum li cas, tuaj nyob tshiab hauv Australia, tuaj nyob hauv Australia ntev npaum li cas, muaj hnoob nyoog li cas los sis lawv tej cuab yim khwv tau nyiaj ib xyoos npaum li cas, thiab tej txuam thawj (factors) li ib pawg neeg twg, caj ces twg, haiv neeg twg, yog caj ceg neeg twg, yog hom neeg cev nqaij daim tawv dab tsi, coj los ua cov txiav txim tias seb puas tsim cov xov tooj cua nthuav xov xwm ua hom lus twg rau cov neeg zejzog twg.
Ces tom qab tuam txhab nthuav xov xwm SBS tau los koom tawm tswv yim nrog zej tsoom thiab siv tej txuam thawj (factors) hais dhau los saum no nrog nrog cov criteria coj los tsim 7 cov xov tooj cua lua lus tshiab xws li, cov lus Telugu, Karen, Teibetan, Kakha Chin, Rohingya, Mongolian thiab Kirundi los sis cov lus Rundi rau tej neeg zejzog no mloog.
Lub koom haum Federation of Ethnic Communities's Councils of Australia (FECCA) tus coj Joe Caputo los yeej qhia tias yog ib qhov tseem ceeb uas SBS yuav tau los xyuas kom tsim tau cov xov tooj cua tau raws li Australia tej neeg zej zog xav tau coj los pab rau lawv txoj kev ua lub neej ntawm lub teb chaws no thiab.
Tsis tas li no kuj tau muaj 12 hom lus ntawm cov xov tooj cua raug muab tso tseg tsis tshaj xov xwm ntxiv lawm uas yog cov lus Kannada, Tongan, Norwegian, Cook Island Maori, Fijian, Swedish, Lithuanian, Malay, Latvian, Danish thiab cov English African Radio Program uas yuav xau txij hnub tim 20 lub 11 hlis ntuj xyoo 2017 no mus lawm tom qab uas twb tau muab ib txhia program ncua tsis tshaj xov xwm los tau ib xyoos rau hli lawm.
Muaj ib cov xov tooj cua uas yog hom lus Turkish, Croatian raug txo cov sij hawm ntawm 5 teev los tshaj xov xwm ua 4 teev rau ib lim piam tawg lawm xwb. Cov lus German los kuj raug txo ntawm 7 teev ib lim piam twg los ua 5 teev lawm thiab xwb. Cov lus Huangarian thiab cov lus Bosnian nrog rau cov lus Albanian los raug txo los tshaj 1 teev rau ib lim piam lawm xwb.
Ntxiv ntawd los tau muab ib txhia xov tooj cua hloov tshaj xov xwm rau lub sij hawm tshiab lawm thiab xws li cov lus Dari, Dinka, Khmer, Maltese, Nepali, Pashto and Tigrinya.
Txhua txhua tsib xyoos twg ces SBS yeej tau los kho nws lub chaw nthuav xov xwm ib zaug twg.
Ces thiaj li ua rau SBS yog zej tsoom ib lub chaw nthuav xov xwm hauv ntiaj teb uas tshaj xov xwm ua ntau hom lus tshaj plaws txog 68 hom lus diam.
Koj muaj peev xwm mloog tau cov xov xwm ua lus Hmoob los yog lus Askiv (English) tau raws li cov vam sab hauv qab no:
Mloog tau cov program ib teev tag nrho rau hnub zwj Teeb (Thursday) 6pm AEST (Australian Eastern Standard Time) thiab zwj Hnub (Sunday) 11am AEST ntawm: www.sbs.com.au/hmong
Koj muaj peev xwm download cov xov xwm ua ib zaj ib zaj ua lub Hmoob thiab lus Askiv (English) los yog mloog tau ntawm:www.sbs.com.au/podcasts/yourlanguage/hmong
Mus download tau SBS Radio app tau hauv Google Play thiab App Store ntawm http://www.sbs.com.au/radio/article/2015/03/07/download-sbs-radios-free-mobile-app tso rau koj lub xov tooj ntawm tes ces mloog tau rau 2 hnub hais dhau los saum toj no. Los yog koj muaj lus nug cuam tshuam txog cov kev siv SBS Radio app ces saib thiab nyeem tau ntawm no ntxiv http://www.sbs.com.au/radio/sbs-radio-app
Tuaj ua tub koom siab thiab caum SBShmong qab hauv SBSHmong Facebook page, tuaj nyem nyiam (Click like) tuaj faib (Share) SBShmong cov xov xwm rau koj tej phooj ywg thiab tawm tswv yim (Comment) ntawm www.facebook.com/sbshmong
Thiab yog koj xav share thiab qhia koj zaj dab neeg thiab xov xwm rau xov tooj cua SBS Hmong Program tshaj thiab nthuav rau ib tsoom Hmoob sawv daws tau mloog kom sawvdaws ho hnov txog ces hu xov tooj rau +61 3 9949 2259 nrog SBS Radio Hmong Program tham tau.
Koj muaj peev xwm mloog tau cov xov tooj cua tau raws li lub vam sab ntawm no: http://www.sbs.com.au/radio/listen-amfm-radio
Thiab tseem mloog tau ntawm digital TV tshooj 38 ntxiv thiab.
