Australia yeej yog lub teb chaws uas muaj ib co ntug hiav txwv zoo tshaj plaws thiab muaj tej chaw zoo ua luam dej ntau qhov chaw hauv ntiaj teb.
Lub caij ntuj sov ntawm Australia thiaj yog ib lub caij uas pheej ua rau tej neeg zejzog los sis tej neeg tuaj xyuas Australia xav mus rau ntawm tej ntug hiav txwv ib qhov twg mus los sis mus ua luam dej ntawm ib qho chaw twg.
Tab sis txij tau muaj kab mob COVID-19 sib kis thoob ntuj los no, ces yeej tau muaj tej neeg poob deg tas sim neej ntau tuaj ntxiv, thiab lub caij ntuj sov no nkau xwb twb tau muaj 33 tus neeg poob deg tas sim neej lawm.
Dr Justin Scarr uas yog tus tuam thawj tswj ntawm lub koom haum Australian Water Safety Council Convener and Royal Life Saving Australia hais tias tej neeg Australia tsis tshua muaj peev xwm ua tau luam dej tsawg zuj zus lawm.
“Muaj ntau yam cuam tshuam li Australia muaj tej chaw ntau yam sib txawv, thiab muaj ntau tsav neeg tuaj nyob uas tej zaum tej neeg no los tsis muaj keeb kwm paub ua luam dej zoo txaus los sis tsis muaj tej txuj ci pab kom tau txais kev nyab xeeb ntawm tej dej. Tsis yog tias tej no thiaj ua rau muaj neeg poob deg ntau tuaj ntxiv xwb tab sis kuj tseem yog ib co teeb meem ua rau tej neeg tsis muaj kev lom zem nrog neeg Australia tej kev ua lub neej ntawm tej dej ntawm tej zejzog, cov kev ua luam dej ntawm tej chaw da dej zos los sis cov kev ua luam dej ntawm ib ib thaj ntug hiav txwv ntawm ib lub zos twg thiab."
Ces lub koom haum Australian Water Safety Council thiaj tau coj nws tej tswv yim tshiab hu ua Australian Water Safety Strategy 2030 coj los pab daws tej teeb meem no. Ua lawv cia siab tias yuav pab tau haiv neeg no tej hauj lwm los txo cov kab theem neeg poob deg ua rau tas sim neej no kom tsawg txog ib nrab (50 feem pua) txog rau xyoo 2030 no.
Ib co txuam thawj uas pheej ua rau muaj neeg poob deg tas sim neej ntau tuaj ntxiv los twb vim yog tsis muaj tej txuj ci pab kom yus tau txais kev nyab xeeb rau tej dej tsawg lawm, hais tsi ntsees rau tej neeg Australia uas tuaj ntawm lwm cov teb chaws tuaj rau Australia uas tsis tshua paub txog tej xub ke pab kom yus tau txais kev nyab xeeb ntawm tej dej.
Eve Wheeler ces yog tis tug neeg ntawm Sydney uas yeej pab saib xyua kev nyab xeeb thiab pab cawm tej neeg poob deg ntawm lub koom haum Bondi Surf Bathers Life Saving.
Tsis tas li ntawd los tej neeg Australia uas muaj hnoob nyoog lawm thiab tej neeg tsiv teb tsaws chaw yog cov uas yuav poob deg ntau dua. Eve Wheeler tau qhia rau SBS Arabic tias yeej tseem tsis tau lig rau yus mus xyaum kawm ua luam dej.
“Lub caij xyoo 1970s uas thaum kuv niam twg muaj hnoob nyoog 50 tawm xyoo lawm thiab tuaj ntawm teb chaws Lebanon tuaj rau Australia ces nws yeej tsis paub ua luam dej hlo li. Tab sis tam sim no nws twb muaj peev xwm ua luam dej nrog nws tej me nyuam. Thiab nws muaj peev xwm pov puag nws tej me nyuam thiab nws tej xeeb leej xeeb ntxwv. Cov kev paub ua luam dej no tsis yog tias yog ib co txuj ci uas tseem ceeb tshaj plaws xwb, tab sis tseem yog ib co txuj uas yuav pab cawm siav thiab."
Ntxiv ntawd los tej me nyuam yaus kuj yog cov yuav poob deg tau yooj yim thiab, ces Ms Wheeler thiaj hais tias kom tej niam txiv thiab tej neeg tu thiab saib xyuas tej me nyuam yuav tsum tau xyuam xim ceev faj heev thaum tej me nyuam no mus kov dej.
“Yog tej yam tseem ceeb ib puas feem pua uas yus tsis txhob tig mus saib ib qho qhov twg hlo li dua ntawm qhov uas yuav tau saib ntsoov yus tej me nyuam xwb. Vim peb yeej pom tias muaj ntau zaus uas peb saib xyuas tej neeg, ces yeej muaj peev xwm yuav raug tau kev phom sij rau lub sij hawm tsawg feeb xwb, tsis hais tej zaum yus tus me nyuam yuav raug cov nthwv dej muab tshoob, roob mus rau qhov chaw uas dej nqus ceev heev mus rau tom hiav txwv uas tej zaum yus tsis pom, thiab muaj peev xwm tshwm sim tau. Yog li ntawd peb thiaj xav nqua hu kom kub siab ntsoov, saib ntshis, tso yus tej xov tooj cia thiab saib xyuas yus tej me nyuam tiag tiag thiab pab lawv tiag tiag."
Tej tswv yim tshiab no yeej kub siab txog 3 yam tseem ceeb coj los pab txo kom muaj neeg poob deg tsawg tuaj ntxiv li: txhawb nqa kom tej neeg paub ua luam dej ntau tuaj ntxiv thiab muaj tej txuj ci pab kom tau txais kev nyab xeeb rau tej dej rau sawv daws, xyuas kom tej neeg tau txais kev nyab xeeb rau ntawm tej dej ntawm ib thaj chaw twg, thiab txhawb nqa kom muaj cov kev koom tes nrog lis tej dej num no ntawm txhua cov koom haum thiab txhua lub xeev.
Dr Scarr hais tias yeej muaj ntau yam xwm txheej poob deg no tshwm sim thaum uas tej neeg mus rau Australia tej dej ib qho twg.
“Lwm yam ces yog kuv xav tias tej neeg tab tom mus xyuas teb chaws Australia, tab sis thaum lawv mus ntoj ncig Australia ces tej zaum lawv yuav mus ntsib tej dej uas lawv tsis tshua swm zoo, tsis hais tej zaum thaj ntug hiav txwv ntawd tsis muaj neeg pab cawm neeg poob deg saib xyuas los sis tej zaum kuj yuav muaj ib tug dej muaj ib lub pas dej ntawm ib lub zos toj siab. Ces yog tias lawv tsis tshua paub ua luam dej los yog ho tsis muaj tej txuj ci uas yuav pab kom tau txais kev nyab xeeb ntawm tej dej, ces yuav ua rau lawv raug tau teeb meem saib kawg nkaus li."
Ib pawg neeg uas yog cov yuav poob deg yooj yim raws li tej tswv yim tshiab no txheeb tau ces yog tej txiv neej hluas hnoob nyoog txij 15 txog 29 xyoos.
Pawg neeg no ces yog cov uas poob deg tas sim neej ntau tshaj plaws, tsis yog tias lawv tsis muaj peev xwm ua luam dej, tab sis vim lawv yog cov uas pheej ua tej yam uas yuav raug tau kev phom sij rau lawv thaum cuam tshuam txog dej.
Dr Scarr hais tias tej txiv neej hluas los kuj yog cov uas ib txwm xa tau tej xo qhia kom tau txais kev noj qab haus huv thiab kom tau txais kev nyab xeeb rau lawv tau nyuaj dua thiab.
“Peb ntseeg tias tsis muaj peev xwm yuav cai tej txuj ci uas pab kom yus tau txais kev nyab xeeb ntawm tej dej tawm ntawm cov kev muaj peev xwm siv tau tej dej. Thiab yeej muaj kev sib cuam tshuam ntawm cov kev paub ua luam dej thiab paub tias tsim nyog ua luam dej rau qhov twg thiab vim li cas tsis tsim nyog ua luam rau rau ib qho chaw twg. Dej cawv los kuj yog ib feem ceeb ceeb, thiab peb yeej tab tom koom tes nrog tej tswj uas npaj tej koom txoos ua kev lom zej cuam tshuam txog dej kom muaj cib fim tsawg rau tej neeg haus dej cawv. Tab sis raws li ib txwm pom ces yeej yog tej yam nyuaj kawg uas yuav sib cuag tau nrog tej tub hluas, thiab vim li ntawd ces peb thiaj xav tias yuav tau txhawb nqa tej programs pab cawm siav qhia rau tej teej kawm qib nrab (High Schools) uas yog ib lub tswv yim zoo heev."
Yav dhau los mas yeej muaj tej sob kawm teev rau tej teej kawm tej txhooj cai qhia ntawv ntawm Australia kom tej hluas yuav tau kawm, tab sis zoo li tam sim no yeej tsis tshua muaj tej sob kawm ua luam dej tam li yog ib co sob kawm ntawm tej teej lawm lawm.
Xyoo 2025 lub koom haum Royal Life Saving Australia tau cej luam qhia tias 48 feem pua ntawm Australia tej tub kawm uas kawm xyoo 6 yeej tsis muaj peev xwm ua tua luam dej mus deb txog li 50 metres thiab yeej tsis paub pab kom yus lub cev ntab tau ntev txog li 2 ntiag tiv (minutes) li.
Dr Steve Georgakis ces yog ib tug neeg qhia ntawv txog cov kev teeb txheeb txog kev sib tw ntawm tsev kawm qib siab University of Sydney.
Nws hais tias tej sob kawm uas luam dej uas tej me nyuam yuav tsum tau kawm ntawm tej teej kawm no muaj peev xwm pab tau ntau tshaj qhov pab kom lawv tau txais kev nyab xeeb rau tej dej lawm thiab.
“Yeej paub tseeb tias qhov ntawd yog ib co laj thawj tseem ceeb tshaj plaws. Tab sis yog thaum yus txheeb txog qhov no kom ntxaws me ntsis los yog ua tib zoo xav kom ntxaws, ces yus yuav ras tias yog tias ib tug twg mloog tau tias lawv tau txais kev nyab xeeb thiab muaj kev zoo siab rau cov kev ua luam dej hauv tej dej lawm, ces lawv yuav siv sij hawm ntev dua hauv tej dej. Thiab yog thaum lawv siv sij hawm ntev zog hauv tej dej lawm, ces lawv kuj yuav hais kom lawv niam lawv txiv coj lawv mus ua si tom tej ntug suab puam los sis kom coj lawv mus da dej ntawm ib lub pa dej twg. Tej no yuav pab kom lawv tau kawm thiab tau sib ntsib sib cuag nrog lwm tus txuas ntxiv. Thiab yuav pab kom lawv nyiam tej txuab zeej txuab sim hav zoov hav tsuag ntau tuaj ntxiv. Lawv los yeej yuav muaj kev sib ntsib sib cuag nrog tej neeg thiab lawv tsev neeg ntau tuaj ntxiv thiab. Thiab peb yeej paub tias yuav pab kom lawv muaj kev kaj siab muaj kev zoo siab vim lawv muaj kev txaus siab zoo tshaj qub ntxiv rau lawv tus kheej lawm."
Raws li tau muaj ib cov kev teeb txheeb nrog tej niam txiv, ces tej tub kawm feem coob uas tsis tau kawm cov sob kawm ua luam dej ntawm tej teej kawm yog cov neeg txom nyem los sis yog cov nyob rau tej zos toj siab thiab nyob rau tej zos tuaj ntug nroog.
Thiab txawm tias tej sob kawm ua luam dej pheej muaj qhia rau tej chaw nyob npuag tej ntug hiav txwv ntau xwb, los yeej muaj tej xov xwm qhia tias yeej ib txwm pom muaj neeg poob deg tas sim neej ntau dua ntawm tej dej piv rau tej ntug hiav txwv, thiab 61 feem pua ntawm cov kev poob deg tas sim neej no yog cov xwm txheej tshwm sim nyob rau sab nraum tej nroog loj.
Dr Georgakis hais tias tsim nyog txhua txhua tus me nyuam ntawm Australia yog tej me nyuam uas muaj peev xwm ua luam dej.
“Qhov peb yuav tau ua tam li yog ib lub teb chaws ces yog ua tib zoo xyuas kom txhua txhua tus me yes (tub kawm) tsis hais lawv yuav nyob ntawm npuag tej ntug hiav txwv sab hnub tuaj los sis yuav nyob hauv plawv teb chaws Australia, yuav nyob ntawm tej hav suab puam li, kom lawv muaj cib fim tau mus xyaum kawm kom paub ua luam dej. Peb yuav tsum tau ua tib zoo xyuas kom coj tej kawm thiab tej teej kawm muaj peev xwm siv tau tej program qhia ua luam dej no. Thiab tsis tsim nyog peb pheej yuav sau nqe thiaj tau kawm. Tsim nyog tsoom fwv them tej nqe no. Thiab tsim nyog muab cov kev kawm ua luam dej no xam tias yog ib cov kev tau txais vaj huam sib luag. Tab sis yog tej yam tsis muaj hmoo uas tej xov xwm no tseem qhia rau peb tias niaj hnub niam no tseem tsis tau muaj peev xwm ua tau li hais ntawd."
