Ntsiab lus tseem ceeb:
- Cov khoom plig Order of Australia yog ib co lees paub ib tug twg uas tau ua ib yam muaj txiaj ntsim rau hauv zejzog..
- Koj yuav tsum teev ib tug twg npe mas seb tej zaum lawv puas yuav tau txais cov khoom plig Order of Australia no.
- Thiab yeej muaj ib co kev los ua tib zoo txheeb ntxaws heev txog cov kev teev ib tug twg npe seb puas tau tej khoom plig no.
- Txawm li cas los yeej tsis coj tej txheej txheem no coj los qhia rau ib tug twg paub li thiab.
Cov khoom plig Order of Australia yog ib feem ntawm peb haiv neeg no cov honours system (Cov kev lees paub ib tug twg lub meej mom). Thiab yog tej yam tshwj xeeb coj los lees paub thiab ua kev zoo siab rau tej neeg Australia uas ua tau ib yam dab tsi zoo thiab muaj txiaj ntsim pab rau tej zejzog.
Tej neeg uas raug teev npe seb puas tau cov khoom plog no yuav raug lub koom haum
Council for the Order of Australia txheeb, thiab lub koom haum no yeej yog ib lub tuaj nruab nrab tsis nce rau tog twg uas mam li txiav txim seb yuav xa leej twg npe mus rau tus nom sawv cev rau huab tais (Governor General) ua tus xaiv.
Rob Ayling uas yog tus director ntawm lub tuam chav Governor-General’s Office hais tias cov koom plig Order of Australia no ces yeej yog ib co khoom plig tsim rau txhua tus neeg Australia, uas yeej muaj tej txheej txheej xub pib los teev ib tug twg npe hauv tej zejzog.
“Muaj ib txhia neeg uas tau txais cov khoom plig no ces yeej yog tej neeg nto muaj koob nto npe heev, tab sis tej neeg feem coob ces yog cov uas yeej tsis tshua muaj neeg paub txog — thiab tej neeg no ces yeej yog tej nyob hauv peb tej zejzog uas peb paub thiab yog tej neeg uas lawv yeej ua hauj lwm yam tsis nco nkees, ua yam tsis xav txog lawv tus kheej kom ua tau ib yam dab tsu txais txiaj ntsim zoo pab rau tej zejzog.”
Yeej tsis cais tias leeg twg thiaj yuav raug lees paub, tab sis ib tug twg uas raug lees paub lawm yeej muaj yam dab tsi zoo sib xws — thiab yuav tsum yog muaj ib tug twg siv sij hawm me ntsis los teev tej neeg ntawd npe kom raug lees paub.Rob Ayling, Director at the Governor-General’s Office
Ces lub koom haum Council of the Order of Australia thiaj tswj tej txheej txheem no thiab mam txheeb tias tsim nyog leej twg raug lees paub raws li cov theem khoo plig li: Companion of the Order (AC), Officer of the Order (AO), Member of the Order (AM) thiab Medal of the Order (OAM) uas yog cov neeg Australia tau txais ntau tshaj plaws.
Dab tsi pheej ua rau yus teev ib tug twg npe seb puas tau khoom plig no?
Michael Smith tau tau siv sij hawm me ntsis mus teev ib tug neeg twg uas nws paub npe.
Nws hais tias “Ib tug neeg ntiag tug twg uas kuv teev npe ces ntawm kuv lawm kuv xav tias yog tus tau ua tej yam dab tsi zoo los ntev pab rau ib lub zejzog twg rau ib lub caij twg,”
“Kuv xav tias yuav tsum yog tej yam dab tsi uas tsim nyog raug lees paub. Tsis hais tej hauj lwm uas tus neeg ntawd tau ua yav tag los, los sis yog tus neeg ntawd ua hauj lwm yeem thaj, uas kuv xav tias tsim nyog teev nws npe vim zoo li yus pom tias nws tseem tsis tau raug lees paub rau tej khoom plig dhau los.”
Mr Smith thiaj hais ntxiv tias tej neeg no tsis tas yuav yog tej neeg uas ua tau ib yam dab tsi zoo, tej zaum lawv kuj yog tej neeg ua lub neej txhua hnub tib yam li sawv daws xwb thiab.
“Tej zaum lawv kuj yog cov yim neeg uas nyob ze yus, yog tej neeg yus koom ua hauj lwm nrog, thiab yog tej uas tau ua ib yam dab tsi zoo pab lwm tus thiab raug lees paub.”
Medal of the Order of Australia. Credit: Tim Thorpe
Muaj cov txheej txheej dab tsi?
Thaum uas tau xa daim ntawv teev ib tug twg npe lawm, ces yuav muaj ib tug neeg teeb txheeb ntawm lub tuam chav hauj lwm Governor-General’s Office mam los txheeb tej xov xwm uas yus tau xa rau lawv.
Vim yus yeej tau teev tej neeg referees uas yuav los txheeb lawv li los tawm tswv yim txog tus neeg ntawd los yog qhia txog tej hauj lwm lawv ua.
Ces tej neeg teeb txheeb no mam li ho nrog lwm tus referees tham ntxiv seb lawv xav li cas rau tus neeg yus teev npe ntawd kom lawv paub tias nws yog tus neeg zoo li cas tiag.
Mr Ayling thiaj tshab txhais tias tej txheej txheem uas txheeb ntxaws heev no thiaj siv sij hawm txij ntawm 18 hli txog 24 hli (1 xyoos 6 hli txog rau 2 xyoos).
“Ces lub koom haum Council of the Order of Australia thiaj yuav tos tej xov xwm ua tib zoo txheeb tus neeg yus teev npe ntawd kom ntxaws tias seb nws ua dab tsi, los yog nws tau ua dab tsi thiab tej nws ua ntawd ho tau txais txiaj ntsim dab tsi.”
Lub koom haum no mam ua tib zoo txheeb tej neeg raug teev npe no thiab mam li tawm tswv yim rau tus nom sawv cev rau huab tais (Governor-General) uas yog tus yuav los txiav tsim tias seb puas pom zoo.
Ces thiaj yuav qhia tej neeg raug teev npe ntawd rau lub 1 hlis ntuj thiab lub 6 hli ntuj ntawm ib lub xyoos twg.
Tim Thorpe receiving his OAM from former General Governor of Victoria Linda Dessau. Credit: Tim Thorpe OAM
Cov kev tsis pub qhia rau lwm tus paub yog tej yam tseem ceeb heev
Txij thaum pib txog thaum xaus, ces txhua cov txheej txheem los txheeb tej neeg no, suav tej neeg ntiag tug uas raug teev npe seb puas tau tej khoom plig no nrog tib si yeej tsis pub qhia tej no rau ib tug twg paub li.
Tim Thorpe ces kuj tau txais cov khoom plig OAM rau nws cov kev nthuav xov xwm hauv xov tooj cua zejzog.
Thorpe hais tias “Li ntawm lub 10 hli ntuj ces kuv tau txais ib tsab email qhia rau kuv tias kuv raug teev npe seb puas tau hom khoom plig tsi ntsees no lawm thiab kuv yuav tsum tau sau ib tsab ntawv teb rau lawv tias seb puas lees los tsis lees, ces kuv thiaj yuav tau sau daim ib daim form—thiab kuv yuav tau cog lus tias yuav tsis qhia rau leeg twg paub,”
“Txuas ntxiv ntawd ces lub 12 hlis ntuj kuv thiaj tau rov qab txais dua ib tsab email hais tias tus nom sawv cev rau huab tais tau pom zoo muab cov khoom plig ntawd rau kuv lawm, ua ke no los lawv kuj txwv nruj heev tsis pub kuv qhia tej no rau ib tug twg paub li thiab.”
Yog tias yus teev ib tug twg npe, ces yus yuav tsum tsis txhob qhia rau tus neeg yus teev npe ntawd paub thiab, kom thiaj tsis txhob pheej ua rau lawv muaj kev cia siab heev tias tej zaum lawv yuav tau — tsam ib pliag cov kev teev lawv npe ntawd ho tsis tau khoom plig li lawv xav thiab.
Tej referees los kuj yuav tsum tsis txhob qhia tej no rau ib tug twg paub li thiab.
Mr Ayling thiaj tshab txhais tias “Ces tus tswj tej dej num ntawm lub koom haum no thiab lub koom haum Council of the Order of Australia no thiaj li tos cov kev txheeb thiab cov kev qhia ua siab dawb paug thiab tej peev xwm ntawm tej referees txog ib tug neeg uas raug teev npe ntawd,”
“Confidentiality is taken very, very seriously so that the person that is being nominated will never know what a referee has said about them.”
Cov kev tau txais cov khoom plig Order of Australia no ho zoo li cas xwb?
Tim Thorpe ces tsis yog tias ua rau nws ceeb loj heev xwb uas tseem raug lwm tus teev npe mus sib tw, tab sis kuj tseem yog tej yam zoo heev rau nws tias cov khoom plig nws tau no yog ib co kev hwm ntawm tej neeg nws ua hauj lwm ua ke nrog thiab.
Qhov uas ib txwm pom thaum muaj ib tug twg tau txais tej khoom plig no lawm, ces pheej ua rau lawv xav tias, 'Kuv puas tsim nyog tau yam khoom plig no tiag?' Tab sis kuv xav tias cia lwm tus ua cov txiav txim tsis yog kuv. Thiab kuv yeej ris txiaj kawg tias lawv tau xav txog tias kuv yog ib tug tsim nyog tau txais cov khoom plig no.Tim Thorpe, OAM recipient
“Txawm li cas los kuj pom tias yus tau ua ib yam dab tsi zoo los pab rau tej neeg lub neej ces thiaj yog tej yam zoo uas yus paub txog tej no. Tej ntawd yog tej yam uas tag nrho peb sawv daws yeej xav tau ntawm ib lub caij rau ib lub caij twg. Thiab peb xav paub tias seb lwm tus ho xav li cas rau tej peb tau ua. Peb xav tau txais cov kev txhawb nqa ntawd. Thiab peb xav paub tias tej peb tau tab tom ua los ntev ntawd...yog tej tsim nyog ua.”
Ces tej neeg uas tau cov khoom plig OAM no thiaj yuav tau ib rab koob khawm xim kub thiab tau ib lub npig thiab raug caw mus koom lub koom txoos ua kev zoo siab ntawm Government House ntawm lub nroog ntawm yus lub xeev.
Mr Ayling hais tias “Tej koom txoos uas lees paub thiab muab lub meej mom rau lawv thiaj yog tej yam zoo heev, vim yog ib co caij nyoog zoo siab heev rau tej neeg tau txais tej khoom plig no thiab muaj lawv tsev neeg thiab tej phooj ywg thiab lwm tus neeg uas tau txais tej khoom plig no koom nrog lawv, ua rau lawv tau txais kev qhuas, raug lees paub los ntawm lwm tus neeg Australia,”
“Thiaj yog ib lub caij zoo heev rau tej neeg no vim rau qhov yog ib lub meej mom tshwj xeeb tshaj plaws uas tau ua kev zoo siab rau lawv.”
Hilkat Ozgun OAM
Tej khoom plig Order of Australia puas muaj peev xwm pauv hloov tau yus lub neej?
Cov khoom plig no muaj peev xwm txhawb nqa kom tej neeg tau txais haj yam kub siab tshaj qub ntxiv los ua lwm yam kom zoo tshaj qub ntxiv los pab rau lawv tej zejzog, tsis tas li ntawd los kuj yuav ua kom lawv tig los teev lwm tus npe kom tau txais cov meej mom tsim nyog muaj ntsis sib xws li tej lawv tau thiab.
Hilkat Ozgun los yeej tau txais cov khoom plig OAM rau tej hauj lwm nws ua pab rau nws lub zejzog Turkish thiab.
Ms Ozgun hais tias “Kuv los yeej tau teev ntau tus neeg ntawm peb tej zejzog Turkish npe los yog lwm cov zejzog nyob ntawm Australia no seb puas tau ntau cov khoom plig sib txawv thiab,”
Tsis tas li ntawd los nws kuj tseem tau pab kom muaj tej tub koom siab ntawm tej zejzog uas ua tau ib yam dab tsi zoo kom raug lees paub thiab tau ua kev zoo siab rau lawv tam li yog ib tug referee rau lwm tus neeg uas raug teev npe mus sib tw seb puas tau tej khoom plig no thiab.
Koj puas xav teev ib tug neeg twg npe?
Mr Ayling thiaj hais tias tsis xav kom pheej cia cov kev txhawj tias xyov yuav sau tej form li cas los tiv thaiv yus kom tsis txhob teev ib tug twg npe. Thiab Governor Genral Office los yeej zoo siab yuav pab yus.
“Peb sawv daws yeej xav kom cov khoom plig Order of Australia yog ib co uas sawv cev rau ntau tsav neeg sib txawv thiab qhov txog lub zog ntawm peb lub teb chaws no. Thiab tib txoj xub ke uas yuav ua tau li ntawd ces yog xav kom txhua tus neeg Australia kub siab mus koom, thiab txheeb ib puag ncig lawv tej zejzog seb puas muaj ib tug twg uas yus xav tias ua tau ib yam dab tsi zoo, thiab tau txais txiaj ntsim nthuav dav rau tej zejzog, tsis hais tus neeg ntawd yuav yog tsav neeg twg li, thiab xav seb puas teev lawv npe seb puas tau cov khoom plig Order of Australia.”
Subscribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia kom koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
