နံးပီလ်ထံလုၢ်ဘၢတၢ်ဝံၤတၢ်ထံၣ်န့ၢ်အါထီၣ်က့ၤပှၤအီစထြ့လယါခံဂၤပှဲၤဒီးတၢ်ပူၤဖျဲး နာ်သက့ပှၤလီၤမၢ်အိၣ်ဒံးအါမး

ပှၤအီစထြ့လယါဖိ လၢအပၣ်ဃုာ်ဖဲပှၤလီၤမၢ်ဖဲ နံးပီလ်—တံဘဲး ထံလုၢ်ဘၢတၢ်အကျါ ခံဂၤ ဘၣ်တၢ်ပာ်ဂၢၢ်ပာ်ကျၢၤလၢ တၢ်ထံၣ်န့ၢ်ကဒါက့ၤအဝဲသ့ၣ်လၢအပှဲၤဒီးတၢ်ပူၤဖျဲးန့ၣ်လီၤ.

ခဲကနံၣ်အံၤပှၤအီစထြ့လယါဖိ လၢအလီၤမၢ်သ့ၣ်တဖၣ်အနီၣ်ဂံၢ် အိၣ်က့ၤဝဲဒၣ် ၃၆ ဂၤန့ၣ်လီၤ.

SBS တၢ်ကစီၣ်သန့ နၢ်ပၢၢ်ဝဲဒၣ်လၢ ပှၤထံဖိကီၢ်ဖိခံဂၤအံၤ တၢ်ဆဲၤကျိးအီၤတန့ၢ်ဒ်ဘၣ်နာ်သက့ အဝဲသ့ၣ်န့ၣ် တၢ်ပာ်ဂၢၢ်ပာ်ကျၢၤလၢအပှဲၤဒီးတၢ်ပူၤဖျဲးဒီး တလိၣ်ဘၣ်ဝဲဒၣ် မီၢ်သီအတၢ်ဆီၣ်ထွဲမၤစၢၤဘၣ်.

ပှၤပၢၤစ့ Jim Chalmers စံးဝဲဒၣ် လၢအဝဲသ့ၣ်အဟံၣ်ဖိဃီဖိအဂီၢ်န့ၣ် တၢ်ကစီၣ်အံၤ ဒုးအိၣ်ထီၣ် "တၢ်သးဖှံလီၤကွံာ်ဖးဒိၣ်", ဘၣ်ဆၣ်သနာ်က့ ပဒိၣ်စံးဝဲဒၣ် အဝဲသ့ၣ်အိၣ်ဒီးတၢ်ဘၣ်ယိၣ်ဒိၣ်ဒိၣ်မုၢ်မုၢ်လၢပှၤလီၤမၢ်ဒံးသ့ၣ်တဖၣ်အဂီၢ်န့ၣ်လီၤ.

အဝဲတဲဘၣ်ဝဲဒၣ် ABC News Breakfast အတၢ်ရဲၣ်တၢ်ကျဲၤလၢ, “တနၤဃီအတီၢ်အပူၤတၢ်ဃုသ့ၣ်ညါဘၣ် ပှၤအီစထြ့လယါဖိခံဂၤအအိၣ်တၢ်လီၢ်အဃိ မ့ၢ်ဝဲတၢ်ကစီၣ်လၢအဂ့ၤန့ၣ်လီၤ. ပတၢ်ဘၣ်အိၣ်ဒံးဝဲလၢ ပှၤလီၤမၢ်ဒံး ၃၆ ဂၤအဂီၢ်န့ၣ်လီၤ.”

Chalmers စံးဝဲဒၣ် အီစထြ့လယါကီၢ် "ဆှၢပာ်လံဝဲဒၣ်ပှၤလၢအသ့ကတၢၢ်သ့ၣ်တဖၣ်" လၢကမၤစၢၤ တၢ်ကွၢ်ဃုက့ၤတၢ်ဒီး တၢ်မၤပူၤဖျဲးတၢ် အတၢ်ဖံးတၢ်မၤသ့ၣ်တဖၣ်အဂီၢ်န့ၣ်လီၤ.

အီစထြ့လယါကီၢ် လဲၤဆီလီၤပာ်ဝဲ ပှၤဘၣ်မူဘၣ်ဒါဒီးပှၤသ့ပှၤဘၣ်လၢ တၢ်ခီဆၢတၢ်တတၢၤတနါအဂီၢ် ၁၉ ဂၤ ဖဲနံးပီလ်အပူၤ ဒီး ဆူမဲာ်ညါစှၤကိးသီအတီၢ်ပူၤန့ၣ် အကဆှၢလီၤအါထီၣ်ကဒီးဝဲဒၣ် ၂၃ဂၤန့ၣ်လီၤ.

အီစထြ့လယါတၢ်ဆီၣ်ထွဲမၤစၢၤတၢ်ခီဆၢတၢ်တတၢၤတနါကရူၢ် — Australian Disaster Assistance Response Team လၢအကရူၢ်ဖိအိၣ် ၁၅ဂၤအံၤ တၢ်မုၢ်လၢ်ပာ်လၢ အကတုၤလီၤဖဲ Kathmandu ဖဲမုၢ်ဖီဖး—မုၢ်ယဲၢ်နံၤအံၤန့ၣ်လီၤ. မ့မ့ၢ်လၢ အီစထြ့လယါကီၢ်စၢဖှိၣ်ပၢၤကီၢ် ပှၤသ့ပှၤဘၣ်စဲၤနီၣ်လၢ တၢ်ဃိထံပာ်ဂၢၢ်ပာ်ကျၢၤပှၤကညီအစိၣ် မ့တမ့ၢ် ပှၤတူၢ်ဘၣ်တၢ် ဖဲတၢ်တတၢၤတနါအပူၤသ့ၣ်တဖၣ်န့ၣ် တၢ်မုၢ်လၢ်အိၣ်ပာ်လၢ အကလဲၤတုၤလီၤဝဲဒၣ်ဖဲ တနွံအံၤ နွံကတၢၢ်န့ၣ်လီၤ.

လၢကဟ့ၣ်လီၤတၢ်ဆီၣ်ထွဲမၤစၢၤ, တၢ်ဂ့ၢ်တၢ်ကျိၤ ဒီး တၢ်နဲၣ်ကျဲလၢ ပှၤအီစထြ့လယါလီၤမၢ်အဟံၣ်ဖိဃီဖိသ့ၣ်တဖၣ်အဂီၢ် အီစထြ့လယါကီၢ်စၢဖှိၣ်ပၢၤကီၢ် ပာ်လီၤန့ၢ်ဝဲ ဟံၣ်ဖိဃိဖိတၢ်ဃိထံသ့ၣ်ညါအပှၤဘၣ်မူဘၣ်ဒါတဂၤန့ၣ်လီၤ.

တၢ်ဆီၣ်ထွဲမၤစၢၤဟံၣ်ဖိဃီဖိသ့ၣ်တဖၣ်န့ၣ်ပၣ်ဃုာ်ဒီး တၢ်ကွၢ်ဃုမၤလီၤတံၢ်ဟံၣ်ဖိဃီဖိ ဒီး တၢ်မၤကွၢ် တၢ်လီၤစၢၤလီၤသွဲၣ် DNA သ့ၣ်တဖၣ်န့ၣ်လီၤ.

လၢတၢ်ဆီၣ်ထွဲမၤစၢၤဒီး တၢ်က့ၤသူၣ်ထီၣ်ဘှီထီၣ်က့ၤတၢ်လၢ တၢ်တတၢၤတနါအဂီၢ်န့ၣ် အီစထြ့လယါကီၢ် အၢၣ်လီၤပာ်လၢ ကမၤစၢၤဝဲ ဒီလၣ် ၁၁ ကကွဲၢ်န့ၣ်လီၤ.

တုၤလီၤဖဲမဟါမုၢ်လွံၢ်နံၤ—မုၢ်လ့ၢ်ဧိၤ န့ၣ် နံးပီလ်ပဒိၣ် ပာ်ဂၢၢ်ပာ်ကျၢၤလၢ ပှၤသံခီဖျိတၢ်တတၢၤတနါအံၤအိၣ်ဝဲ ၁,၂၅၉ ဂၤဒီး ပှၤလီၤမၣ်အိၣ်ဒံးဝဲ ၅,ဝ၈၃ဂၤ, လၢအပၣ်ဃုာ် ပှၤထံချၢကီၢ်ချၢ ၅၈၃ဂၤန့ၣ်လီၤ.

မ့မ့ၢ်လၢအဝဲသ့ၣ်အိၣ်ခီတကပၤန့ၣ် တရူးပဒိၣ်ပာ်ဂၢၢ်ပာ်ကျၢၤဝဲဒၣ်ပှၤသံအိၣ် ၂၁ ဂၤဒီး လီၤမၢ်အိၣ်ဒံးဝဲ ၅၄၁ ဂၤန့ၣ်လီၤ.

တၢ်ဟးဂူာ်ဟးဂီၤ အနီၣ်ထိၣ်သ့ၣ်တဖၣ် ဟဲအိၣ်ဖျါရှဲထီၣ်လံ ဒီး Reuters တၢ်ကစီၣ်သန့ပာ်ဖျါဝဲဒၣ် ပှၤဘၣ်မူဘၣ်ဒါသ့ၣ်တဖၣ် တယာ်လၢ တၢ်ကဘၣ်က့ၤသူၣ်ထီၣ်ဆီလီၤက့ၤ ဟံၣ်ဃီ ကအိၣ်အဖျၢၣ် ၂ဝ,ဝဝဝ ဃၣ်ဃၣ် လၢတၢ်ကဘၣ်သူၣ်ထီၣ်က့ၤအီၤဖျဲး တၢ်လီၢ်လၢအအိၣ်ဒီးတၢ်ပူၤဖျဲးသ့ၣ်တဖၣ်န့ၣ်လီၤ.

နံးပီလ် ပှၤဘၣ်မူဘၣ်ဒါလၢ တၢ်ခီဆၢတၢ်တတၢၤတနါအဂီၢ် Dharma Raj Upreti, တဲဘၣ်ဝဲ Reuters တၢ်ကစီၣ်သန့လၢ ဖဲအသီခါတၢ်တယာ်ကွၢ်အပူၤန့ၣ် ဟံၣ်ဃီလၢအဟးဂီၤကွံာ်ဆီဖ့ကလ့န့ၣ်အိၣ်ဝဲအဖျၢၣ် ၇,၅ဝဝ န့ၣ်လီၤ.

Upreti စံးဝဲဒၣ် ဟံၣ်လၢအအိၣ်ဆၢထၢၣ်န့ၢ်ဒံးသ့ၣ်တဖၣ်နာ်က့ တၢ်အိၣ်ဆိးအီၤတသ့လၢၤဘၣ်န့ၣ်လီၤ.

For the latest from SBS News, download our app and subscribe to our newsletter.