ដូច្នេះនៅពេលដែលលោកអ្នកកំពុងតែស្វែងរកការងារធ្វើនោះ នេះគឺជាជម្រើសមួយចំនួនដែលអាចជួយលោកអ្នកបាន។
តើអ្វីទៅជាប្រាក់ឧបត្ថម្ភ Newstart Allowance?
វាគឺជាប្រាក់ឧបត្ថម្ភដ៏ចំបងសម្រាប់អ្នកគ្មានការងារធ្វើដែលមានអាយុក្នុងចន្លោះវ័យធ្វើការ។ ទោះជាយ៉ាងណាក៏ដោយ វាក៏មានលក្ខខណ្ឌមួយចំនួនផងដែរ។ ឧទាហរណ៍ អ្នកត្រូវតែមានភស្តុតាងបញ្ជាក់ថា អ្នកកំពុងតែស្វែងរកការងារធ្វើពេញម៉ោង ត្រូវតែទៅជួបភ្នាក់ងារស្វែងរកការងារធ្វើរបស់លោកអ្នកតាមពេលកំណត់ ហើយអ្នកក៏ត្រូវតែបំពេញតាមកាតព្វកិច្ចដែលគេត្រូវការជាចាំបាច់ផងដែរ(mutual obligation requirements)។
តើខ្ញុំត្រូវរង់ចាំយូរប៉ុណ្ណា?
ពេលវេលារង់ចាំអាចខុសៗគ្នា ចន្លោះពី២អាទិត្យទៅ២ខែ គិតចាប់ពីពេលដែលលោកអ្នកបានដាក់ពាក្យសុំប្រាក់ជំនួយ Newstart Allowance រួចមក។ តាមធម្មតាវាអាស្រ័យទៅលើខាង Centrelink ជាអ្នកសម្រេច។
តើខ្ញុំអាចរកប្រាក់ចំណូលបានច្រើនប៉ុណ្ណា?
អ្នកអាចធ្វើការបណ្តើរ ហើយទទួលបានប្រាក់Newstart ក្នុងពេលតែមួយ។ ឧទាហរណ៍ប្រសិនបើអ្នកធ្វើការមួយវេន ក្នុងមួយសប្តាហ៍ អ្នកនៅតែអាចទទួលបានប្រាក់ឧបត្ថម្ភមួយផ្នែកដដែលដែលគេហៅថា Partial Payment។ អ្នកអាចរកចំណូលមុនបង់ពន្ធ បានរហូតដល់ទៅ$104 ក្នុងពីរសប្តាហ៍។ ប្រាក់ឧបត្ថម្ភរបស់អ្នកនឹងត្រូវកាត់5០សេន ចំពោះប្រាក់ចំណូល១ដុល្លារដែលលោកអ្នករកបានចាប់ពី $104 ដល់ $254 ក្នុងពីរសប្តាហ៍។ អត្រាកាត់កងនោះគឺ $75 បូកថែមនឹង65សេនក្នុងមួយដុល្លារដែលលោកអ្នករកបានលើសពី$254ក្នុងពេលពីរសប្តាហ៍។
តើនរណាខ្លះមានសិទ្ធិទទួលបានប្រាក់ឧបត្ថម្ភនេះ?
ពលរដ្ឋរស់នៅក្នុងប្រទេសអូស្រ្តាលីទាំងអស់ដែលរស់នៅក្នុងប្រទេសនេះចាប់ពី២ឆ្នាំឡើងទៅ មានសិទ្ធិទទួលបានប្រាក់ឧបត្ថម្ភនេះ។ ទោះជាយ៉ាងណាក៏ដោយ ពួកគេត្រូវការបំពេញតាមលក្ខខណ្ឌនៃការធ្វើតេស្តទ្រព្យសម្បត្តិនិងប្រាក់ចំណូល ( income and assets tests )ក៏ដូចជាកាតព្វកិច្ចត្រូវបំពេញ (Mutual Obligation Requirements) ផងដែរ។
អ្វីទៅជា 'Work for the Dole'?
វាគឺជាកម្មវិធីមួយដែលបង្កើតឡើងដើម្បីបង្កើនជំនាញអ្នកស្វែងរកការងារធ្វើ ផ្តល់នូវបទពិសោធន៍ការងារនិងធ្វើឲ្យពួកគេចូលរួមចំណែកនៅក្នុងសហគមន៍។ អ្នកត្រូវតែចូលរួមនៅក្នុងកម្មវិធី Work for the Dole រយៈពេល៦ខែនៃឆ្នាំនោះដើម្បីទាមទារប្រាក់ជំនួយក្រោមតម្រូវការរបស់Mutual Obligation Requirements។
តើនឹងមានអ្វីកើតឡើងប្រសិនបើខ្ញុំមិនធ្វើតាម Mutual Obligation Requirements?
ប្រាក់ឧបត្ថម្ភ Newstart របស់អ្នកអាចនឹងត្រូវព្យួរ ប៉ុន្តែនៅពេលដែលអ្នកទំនាក់ទំនងជាមួយភ្នាក់ងាររកការងារធ្វើរបស់លោកអ្នកឡើងវិញ អ្នកអាចនឹងទទួលបានប្រាក់ជំនួយម្តងទៀត។
ប្រាក់ឧបត្ថម្ភដល់អ្នកដែលគ្មានការងារធ្វើប្រភេទផ្សេងទៀតមានដូចជា Youth Allowance សម្រាប់អ្នកដែលស្វែងរកការងារធ្វើពេញម៉ោងអាយុពី១៦ទៅ២១ឆ្នាំ និងDisability Support Pension សម្រាប់អ្នកដែលមានអាយុចាប់ពី១៦ឆ្នាំដល់អាយុចូលនិវត្ត ដែលមិនអាចធ្វើការបានដោយសារតែពិការភាពខាងផ្លូវកាយ ផ្លូវចិត្តឬក៏សតិបញ្ញាជាដើម។
សម្រាប់ព័ត៌មានបន្ថែមស្តីពីជំនួយប្រាក់ចំណួលសូមចូលទៅកាន់គេហទំព័ររបស់Department of Human Services។
ជំនួយផ្នែកភាសាសម្រាប់អ្នកមិនចេះភាសាអង់គ្លេស
ប្រសិនបើអ្នកត្រូវការសេវាបកប្រែភាសាអ្នកអាចទូរសព្ទទៅកាន់ សេវាកម្មពហុភាសារបស់ នាយកដ្ឋាននេះបានតាមរយៈលេខ 131 202 ចាប់ពីម៉ោង៨ព្រឹកដល់ម៉ោង៥ល្ងាច ក្នុងពេលម៉ោងធ្វើការដើម្បីពិភាក្សាជាមួយនឹងបុគ្គលិកដែលចេះច្រើនភាសា៕
