ស្ទើរតែពាក់កណ្តាលនៃប្រជាជនអូស្ត្រាលី — ៤៩ភាគរយ — ជឿថាកម្រិតអន្តោប្រវេសន៍ខ្ពស់ខ្លាំងពេក។
នេះបើតាមរបាយការណ៍ចុងក្រោយរបស់មូលនិធិ Scanlon Foundation ដែលវាស់ស្ទង់អំពីភាពស្អិតរមួតក្នុងសង្គម នៅក្នុងប្រទេសអូស្ត្រាលី។
អ្នកនិពន្ធរបាយការណ៍ លោកបណ្ឌិត James O'Donnell មកពីសាកលវិទ្យាល័យជាតិអូស្ត្រាលី បាននិយាយថា ខណៈពេលដែលអាកប្បកិរិយារបស់យើងចំពោះផលប៉ះពាល់នៃការធ្វើអន្តោប្រវេសន៍នៅតែមានភាពវិជ្ជមាន វាអាចជះឥទ្ធិពលអវិជ្ជមាននៅក្នុងគ្រាដែលមានការលំបាកផ្នែកសេដ្ឋកិច្ច។
លោកបាននិយាយថា "នៅពេលដែលប្រជាជនព្រួយបារម្ភអំពីសេដ្ឋកិច្ច ហើយនៅពេលដែលពួកគេផ្ទាល់ជួបប្រទះភាពអត់ការងារធ្វើ ភាពតានតឹងផ្នែកហិរញ្ញវត្ថុ អាកប្បកិរិយារបស់ពួកគេចំពោះជនអន្តោប្រវេសន៍កាន់តែយ៉ាប់យ៉ឺនបន្តិច។ ពួកគេទំនងជានិយាយរឿងដូចជា ជនអន្តោប្រវេសន៍ដំឡើងថ្លៃផ្ទះ ឬក៏ពួកគេមកដណ្តើមការងារ"។
ប៉ុន្តែតើជំនឿទាំងនេះផ្អែកលើការពិតដែរឬទេ? ហើយតើវាប៉ះពាល់ដល់ជនអន្តោប្រវេសន៍និងជនភៀសខ្លួនយ៉ាងដូចម្តេចខ្លះ?
របាយការណ៍ស្តីពីការស្វែងយល់ពីភាពស្អប់ខ្ពើម -“Understanding Hate” វគ្គនេះ ក្រលែកមើលពីរបៀបដែលព័ត៌មានមិនពិត ផ្តោតគោលដៅមកលើជនអន្តោប្រវេសន៍ និងរបៀបដែលយើងអាចទប់ទល់នឹងជំនឿដែលបង្កជាគ្រោះថ្នាក់បាន។
