SBS Examines បានឮពីអង្គការជាច្រើនដែលប្រមូល និងរាយការណ៍ទិន្នន័យដែលឆ្លុះបញ្ចាំងពីស្ថានភាពនៃទំនាក់ទំនងសង្គមរបស់ប្រទេសអូស្ត្រាលី។
មានការកើនឡើងយ៉ាងច្បាស់នៅក្នុងឧប្បត្តិហេតុនៃការស្អប់ខ្ពើម រួមទាំងការបំពារបំពានពាក្យសម្ដី និងរូបរាងកាយ។
សាស្ត្រាចារ្យ Nick Haslam អ្នកចិត្តសាស្រ្តមកពីសាកលវិទ្យាល័យម៉ែលប៊ន បានប្រាប់ SBS Examines ថា "មនុស្សមានគំនិតខុសគ្នាជាច្រើន ក្នុងអ្វីដែលពួកគេកំណត់ថាជាការស្អប់"។
"ឧទាហរណ៍ មនុស្សមួយចំនួនទំនងជាមើលឃើញការប្រើពាក្យជេរប្រមាថជាតិសាសន៍ថា ជាការស្អប់ខ្ពើមពីធម្មជាតិ និងហិង្សា ហើយមនុស្សផ្សេងទៀតយល់ឃើញស្រាលជាងនេះ។ ដូច្នេះមានការខ្វែងគំនិតគ្នាយ៉ាងច្រើន អំពីប្រភេទនៃការនិយាយស្តីដែលមានលក្ខណៈ ថាជាការស្អប់ខ្ពើម ឬមិនស្អប់ខ្ពើម។"
ការបង្កើនចំណេះដឹង និងការយល់ដឹងអំពីពាក្យសម្ដីស្អប់ខ្ពើម អាចជាហេតុផលមួយដែលយើងកំពុងឃើញរបាយការណ៍កាន់តែច្រើន។
ប៉ុន្តែមានកត្តាមួយទៀតដែលមានឥទ្ធិពលជាខ្លាំង។ ការរំលោភបំពានលើអ៊ីនធឺណិតបានរីកសាយភាយយ៉ាងឆាប់រហ័ស ដោយអ្នកជំនាញបានអំពាវនាវឱ្យក្រុមហ៊ុនប្រព័ន្ធផ្សព្វផ្សាយសង្គមធ្វើអ្វីបន្ថែមទៀតដើម្បីបញ្ឈប់ការរីករាលដាលនៃការស្អប់ខ្ពើមដោយចេតនានៅលើវេទិការបស់ពួកគេ។
សាស្ត្រាចារ្យរង Matteo Vergani សង្គមវិទូ និងជានាយកនៃ Tackling Hate Lab បាននិយាយថា ការស្អប់ខ្ពើមនៅលើអនឡាញមានមានភាពស្មុគស្មាញដល់ពិភពពិតប្រាកដ។
វាផ្លាស់ប្តូរបទដ្ឋាន។ ខ្ញុំគិតថា យើងកំពុងតែឃើញការផ្លាស់ប្តូរវប្បធម៌ ព្រោះសង្គមកំពុងបែកបាក់។
លោកបាននិយាយថា៖ «មនុស្សកំពុងបង្ហាញខ្លួនគេកាន់តែច្រើន ជាពិសេសតាមអ៊ីនធឺណិតចំពោះក្រុមដែលធ្វើឲ្យមានការស្អប់ខ្ពើមនិងគំនិតលំអៀងជាទូទៅ»។
របាយការណ៍ស្តីពីការស្វែងយល់ពីភាពស្អប់ខ្ពើម -“Understanding Hate” វគ្គនេះ ក្រលែកមើលលើមូលហេតុមួយចំនួននៃការកើនឡើងសេចក្តីរាយការណ៍អំពីការស្អប់ខ្ពើមនៅក្នុងប្រទេសអូស្រ្តាលី៕
