អាចនឹងមានដាក់ចេញនូវការត្រូតពិនិត្យសុវត្ថិភាពតឹងរឹងជាងមុនសម្រាប់ការហោះហើរក្នុងស្រុករបស់ប្រជាជនអូស្រ្តាលី បន្ទាប់ពីមានការចោទប្រកាន់ថាមានផែនការភេរវកម្មសម្ងាត់ចង់បន្ទុះយន្តហោះមួយគ្រឿង។
យោងតាមរបាយការណ៍នៅក្នុងកាសែតThe Australian Newspaper រដ្ឋាភិបាលសហព័ន្ធពិចារណាចង់ឲ្យមានការត្រួតពិនិត្យអត្តសញ្ញាណ ការស្កេនពេញមួយតួខ្លួន និងការកម្រិតបរិមាណអង្គធាតុរាវស្រដៀងគ្នាទៅនឹងវិធានការសន្តិសុខសម្រាប់ការហោះហើរអន្តរជាតិដូច្នោះដែរ។
រឿងនេះកើតឡើង បន្ទាប់ពី បុរសក្រុងស៊ីដនីយ៍២នាក់ជាប់ចោទពីបទចោទប្រកាន់រៀបគ្រោងការសម្ងាត់ទម្លាក់យន្តហោះមួយគ្រឿងឆ្ពោះទៅកាន់Abu Dhabi កាលពីថ្ងៃទី១៥កក្កដាដោយប្រើប្រាស់ឧបករណ៍ផ្ទុះកែច្នៃ។
រដ្ឋមន្រ្តីក្រសួងយុត្តិធម៌ លោក Michael Keenana មានប្រសាសន៍ថា ប្រសិនបើតុលាការរកឃើញថាមានកំហុសមែននោះ បុរសទាំងពីរនាក់នេះប្រឈមមុខនឹងការកាត់ទោសឲ្យជាប់ពន្ធនាគារអស់មួយជីវិត៕
Share
