Еднаш наставник засекогаш наставник.
Таков е примерот со Менка Лошкоска - Постолов наставничка по македонски јазик.
По преселбата во Нов Зеланд и таму продолжува да работи како наставник по македонски јазик, учејќи ги најмладите македончиња да не го заборават мајчиниот јазик.
" Главна цел со часовите по македонски јазик ми е децата да се дружат меѓусебе но воедно да го учат и да не го заборават мајчиниот јазик" - вели Менка.
Со само шест ученици кога започнува да работи пред неколку години, во моментов наставата ја посетуваат триесетина ученици. Тие се поделени во неколку групи во зависност од возраста и познавањето на македонскиот јазик.
Во работата на Менка која патем е на доброволна основа и помагаат и родителите на дел од учениците.
За своите ученици вели:
" Децата се одлични ученици и сите сакаат да доаѓаат на часовите. Навистина сум пријатно изненадена колку брзо учат и можам слободно да кажам дека со возбуденост и љубов доаѓаат на часовите по македонски јазик".
За потербите на наставата Менка Лошкоска отстапува и дел од својата лична библиотека со цел да помогне со потребните книги и неопходни основни материјали за нормално одвивање на наставата. Во тоа помагаат и родителите но и со посебно задоволство истакнува дека ја добиле и првата донација од стотина книги од невладината организација од Македонија " Нов Контакт ".
Во наредниот период се очкува зголемување на бројот на ученици кои ќе го изучуваат македонскиот јазик во Нов Зеланд, каде македонската заедница е сконцентрирана во најголемиот град Оукланд вели наставничката Менка и додава:
"Расположени сме за соработка со секого и би биле благодарни како заедница на секој кој ќе ја понуди или донира книги и материјали во нашето училиште која ќе ни овозможи поквалитетна настава. Со оглед на тоа дека бројот на зченици постојано се зголемува ќе се обидеме и да добиеме некаква помош и од државата Нов Зеланд".
