Повеќе илјади претставници на македонските заедници од Канбера, Квинбијан, Сиднеј, Мелбурн, Перт, Волонгонг, Њукастел, Аделаид и од други градови во Австралија одржаа протестен собир пред амбасадата на РМ во Канбера на кој изразија загриженост и револт од, како што посочија, разнебитувањето на Македонија, македонскиот јазик и македонскиот идентитет.
Од собирот беше испратена Декларација до Претседателот на Република Македонија, до пратениците во Парламентот во Македонија и до Владата на Република Македонија. Преставници на македонската заедница на амбасадорот на РМ во Австралија, г-динот Веле Трпевски му ја предадоа Декларацијата,која тој, официјално, по дипломатски пат ќе ја проследи во Македонија.
Во Декларацијата на македонската заедница од Австралија, детално беа поставени барања до Претседателот, Собранието и Владата на РМ, за безусловно прекинување на разговорите и преговорите за името на државата, за отфрлање на законот за употреба на јазиците, со кој што се редефинира унитарноста и државноста на Македонија, за ослободување од затвор и притвор на сите осудени од случувањата на 27 април 2017 како и укинување на притворот за Едмонд Темелко, градоначалник на Општина Пустец. Македонците од Австралија исто така побараа македонските епископи да го повлечат барањето за прифаќање на Бугарската црква за мајка црква како неканонско и анти-историско.
„ Ние, Македонците во Австралија, ќе ги користиме сите дозволиви средства, секогаш, секаде и пред секого, за одбрана на името на државата и идентитетот на нацијата!“ , потенцираа Македонците во Декларацијата.
“ЕУ и Нато не се достојни за промена на името на државата и идентитетот на нацијата“,порачаа од говорницата на протестниот собир Стивен Каранфиловски, Жаклина Михајлова, Елизабета Богдановска, Петре Крстевски, Сузана Митева, Жарко Петрески и Роза Томеска.
