Добрите игри за младиот тим на Македонија Ѓорче Петров, на Константино Горгиовски му обезбедија повик за настап за репрезентацијата на Нов Зеланд до 17 години на првенството на Океанија кое ќе се игра на Фиџи.
Младиот и талентиран фудбалер на Македонија Ѓорче Петров, Константино Тино Горгиовски со своите добри игри на зелените терени си "заработи" повик за настап за репрезентацијата на Нов Зеланд до 17 години.
Константино се очекува својот прв настап за Нов Зеланд да го има на првенството на Океанија кое ќе се игра од 11 до 28 август 2023 во Фиџи.
"Многу ме израдува повикот да играм за Нов Зеланд и доколку селектрот Мартин Булок ми даде шанса да заиграм ќе дадам се од себе да оствариме добар резултат на првенството на Океанија"- вели Горгиовски.
Инаку Константино Горгиовски е роден во Нов Зеланд а неговите родители се по потекло од Скопје и има двојно државјанство.
Првите фудбалски чекори ги прави на четиригодишна возраст и тренира во повеќе клубови и фудбалски школи во Нов Зеланд.
Желбата да напредува и да ги усовршува своите фудбалски вештини го носат во познатиот македонски клуб Македонија Ѓорче Петров.
"Покрај тоа што сакав да напредувам на фудбалски план, сакав да бидам блиску до фудбалска Европа но и до селекторите на младите репрезентации на Македонија за кои имав голема желба да заиграм"- вели Константино и додава
"но освен еден повик за тренирање немаше ништо конкретно и затоа го прифатив повикот од Нов Зеланд".
Младиот Тино вели дека како играч од средината на теренот тренира двапати дневно за да ги подобри своите физички и технички можности.
"Тренирам напорно и во клубот но и на посебни тренинг сесии се со цел да ги подобрам моите перформанси бидејќи желба ми е еден ден да заиграм во некоја од посилните европски лиги".
