Секој чекор ќе ми биде лесен знаејќи дека тоа е за хумана цел

Да се изодат 10, 000 чекори на ден е голем предизвик. Да се истрчат ни помалку ни повеќе туку 70 километри во еден ден е "пеколно" тешко и достојно за почит. Но Марија Макри, мајка на три деца од Сиднеј е решена и подготвена да го направи тоа во рамките на хуманитарната акција STEPtember за подршка на болните од церебрална парализа, болест од која боледува и нејзиниот син Марк.

Marija Macri with her son Marc and her father Stevce Source: Marija Macri

Марија Макри, мајка со ведар дух, бескрајна упорност и надеж но и спортска "тврдоглавост" на 27 септември ќе се обиде да истрча 70 километри.

Овој подвиг Марија го прави во рамките на добротворната акција STEPtember.

"Планирам да истрчам 70 км и со тоа на некој начин да помогнам да се соберат финасиски средства во оваа акција кои ќе послужат за подршка на понатамошните истражувања и подигање на свеста за церебралната парализа од која боледува и мојот син Марк". - вели Марија и доадава: "Cекој чекор ќе ми биде лесен знаејќи дека тоа е за хумана цел, знаејќи дека со секој собран долар ќе се обезбедат опрема, терапија и услуги за децата и возрасните кои живеат со церебрална парализа".

Marc (in the middle) with his brothers Source: Marija Macri

Марија за својот син Марк вели дека сака многу танцување иако е врзан за инвалидскаа количка и се обидува во секојдневниот живот да не се фокусира на неговите слабости туку на неговиот позитивен карактер и позитивни страни.

Инспирацијата да истрчам 70 км потекнува од мојот татко Стевче Георгиевски, еден од најпознатите македонски атлетичари, вели Марија

"Татко ми, поранешен атлетичар е моја инспирација. Тој на 33 години ја истрча оваа должина овде во Австралија а сега и јас на иста годишна возраст сакам да го повторам неговиот успех".

Повозрасните љубители на спортот во Македонија но и во Австралија се уште се сеќаваат на Стевче Георгиевски и неговите успеси на атлетските патеки. Неприкосновен атлетичар на средни и долги патеки не само во Македонија туку и во Европа. Македонските рекорди на 1.500 метри, 5.000 метри и крос патеките се уште се во негова сопственост.

Stevce Georgievski on the athletics track Source: Stevce Georgievski

За каков талент и атлетичар станува збор кажува и податокот што своевремено го објави и дневниот весник "Нова Македонија" дека како јуниор на 1500 метри имал дури 2 секунди подобро време од легендата на светската атлетика Себастијан Коу.

Стевче Георгиевски за намерата на својата ќерка да истрча 70 км вели:

"Марија вредно тренира и се подготвува, секогаш сум покрај неа со совети и познавајќи ја за каков "борец" се работи сигурен сум дека ќе успее".

Подготвувајќи се за овој подвиг, Марија најпрвин истрча 50 км а на 5 септември ја истрча и должината од 60 км кога и со видео порака им се заблогодари на сите за огромната подршка што ја добива.