Традицијата на негување и зачувување на македонското културно наследство во рамките на македонската заедница и успешно претставување пред австралиското општество продолжува. Тоа на најдобар начин го потврди одржувањето на традиционалниот Илинденски фестивал - 2022 во Мелбурн.
Во организација на Федерацијата на македонските културно уметнички друштва на Викторија (ФОМКУД) на 13 август во Мелбурн се одржа традиционалниот Илинденски фестивал.
Одржувањето на фестивалот се совпадна и со одбележувањето на 119 годишнината од Илинденското востание и 78 годишнината од АСНОМ.
На фестивалот кој по две години пауза поради пандемијата со коронавирусот се одржа по 36 - ти пат, настапија сите осум културно-уметнички друштва од Мелбурн.
Секако најсреќни беа младите играорци бидејќи можеа повторно на дело да покажат дел од својот репертоар но и што можат во нормални услови да ги вежбаат своите кореографии по укинувањето на строгите рестриктивни мерки кои беа воведени порано.
Александар Николовски, кореограф во КУД "Танец" вели дека со нетрпение го очекувале фестивалот и додаде:
"Покрај тоа што можевме да покажеме што сме научиле нешто ново, ова беше убава можност и за дружење меѓу младите играорци нешто што ни недостасуваше во последните две години".
Тео Цветковски од КУД "Никола Карев" само ја потврдува радоста од одржувањето на фестивалот додавајќи:
"Фестивалот мина добро на организациски план и сите сме среќни што по две години повторно сме заедно".
Васко Николовски од КУД "Гоце Делчев" вели:
"Поради пандемијата како друштво минавме низ тежок период и не беше лесно но играорците дадоа се од себе и тоа се виде од нивниот настап на фестивалот".
Машката група на КУД "Јане Сандански" се претстави со две ора Пајдушко и Марица а играорецот Стивен Николовски истакнува:
"Конечно сме среќни и задоволни. Настапивме на фестивалот но и редовно вежбаме на нови кореографии во нормални услови по укинувањето на рестрикциите поради пандмеијата која многу не погоди".
А, кај младите "чувари" на македонскиот фолклор во Австралија паузата од настапите како воопшто да не оставила трага. Успешно се претставија со своите ора подготвени од кореографите но и потврдија дека се вистински промотори на македонските културно-уметнички традиции не само меѓу македонската заедница туку и пред австралиското општество.
На долгогодишниот културно-уметнички работник и претседател на ФОМКУД, Коста Колевски, му беше врачена награда за животно дело за неговите заслуги во организирањето и водењето на ФОМКУД и успешното претставување на македонскиот фолклор во Австралија.
Присутните ираорци и гости ги поздрави и новиот претседател на ФОМКУД, Џорџ Ламбески а беше прочитана и "Илинденска резолуција - Мелбурн 2022".
Кратки видеа од настапите на дел од учесниците на Илинденскиот фестивал - 2022 во Мелбурн.
