По повод 117-годишнината од смртта на македонскиот револуционер Гоце Делчев, во Мелбурн се одржа комеморација и се положи венец и свежо цвеќе пред неговиот споменик. Македонците од Австралија уште еднаш порачаа дека Гоце Делчев е Македонец и таков ќе остане.
Поради пандемијата со коронавирусот и рестриктивните мерки за движење за разлика од минатите години, годинава годишнината од загинувањето на македонскиот револуционер Гоце Делчев пред неговиот споменик во црквата "Св. Ѓеорѓи и Пресвета Богородица" во Мелбурн се одржа во поинакви услови и без претставници од македонските друштва и здруженија.
На комеморацијата панихида за Гоце Делчев одржаа Архимандрит Гаврил и отец Климент Станковски.
Говор за животот и делото на Делчев одржа претседателот на македонската православна општина за Мелбурн и Вкторија Мирчо Ангеловски.
Тој во говорот осврнувајќи се и на актуелната политичка состојба меѓудругото рече дека
"Договорите со Грција и Бугарија за Македонците во Австралија се неприфатливи и бараме веднаш да се поништат бидејќи немаат соодветна реалност со македонскиот идентитет и носат уште поголеми проблеми. За Македонците во Австралија, Гоце Делчев, е само Македонец и нашето историско минато било и ќе остане македонско".
Делчев е роден на 4 февруари 1872 година во Кукуш, а загинал во селото Баница, Егејска Македонија на 4 мај во 1903 година, по долга и измачувачка битка со турската војска. Делчев е идеолог, организатор, водач на македонското револуционерно национално ослободително движење и еден од творците на револуционерните правни акти.
Се школувал во гимназијата во Солун и на Воената академија во Софија. Учителствувал во Штип, а како член на Централниот комитет на ТМОРО работел на создавање мрежа на бази, комитети и комитски чети на Организацијата. Учествувал на Солунскиот конгрес на ВМРО (1896), а до 1901 година бил задграничен претставник на ВМРО во Софија.
По убиството во 1903-та, неговите посмртни останки се чувале во Баница, до 1917 година, кога биле пренесени во Ксанти, а потоа во Софија. До 1923 година, ковчежето со коските се чувало во домот на Михаил Чаков. Останките на Делчев на 11 октомври 1946 година биле пренесени во црквата „Свети Спас“ во Скопје.
