Кристофер Ќаев фудбалските вештини како голман започнал да ги учи во повеќе клубови во Австралија . Желбата и упорноста да научи повеќе и стекне искуство меѓу стативите го носи во Македонија. Освен тоа тој преку најважната споредна работа на светот воедно сака и подобро да ја запознае и родната земја на неговиот татко Георги Ќаев. По завршувањето на средното училиште заминува во најтрофејниот македонски клуб Вардар.Во разговорот за СБС Радио - програма на македонски јазик по враќањето во Австралија Кристофер вели:
" Вардар е импресивен клуб. Нешто повеќе од голем фудбалски клуб. Значен за Македонија. Располага со се што треба да има еден модерен фудбалски клуб - со сите придружни објекти за тренирање од најмладите па се до сениорските категории".
Кристофер со пофални зборови и за тренерскиот тим. Потенцира дека бил изненаден од професионалноста до најситни детали поврзани со тренажниот процес. А за тренерот на голманите Мане Манев само пофални зборови
" Ми беше чест и задоволство што работев и ме тренерираше Мане Манев познато тренерско име за кого сите имаат пофални зборови.Еден од најдобрите голмански тренери во Македонија кој и навистина тоа го потврдуваше со професионалноста на тренинзите".
Вардар за прв пат во својата историја но и во македонскиот фудбал годинава избори учество во групната фаза од Лигата на Европа. Но токму тој историски успех бил причината, вели Кристофер да не успее да влезе во првиот тим на Вардар.
"Мислам дека бев жртва на тој успех. Новиот тренер Чеде Јаневски се реши за искусни и проверени фудбалери за настапите во Лигата на Европа. Затоа и ние од младинската генерација иако игравме во младинската Лига на Европа и навистина имаше добри поединци речиси никој не доби шанса во првиот тим".
Иако имал понуди како позајмен играч да игра за други клубови решава да се врати назад во Австралија и искуството што го стекнал во Вардар да го искористи овде .
" Работев напорно во Македонија. Тоа беше добро фудбалско но и животно искуство за мене. Единствен начин да сфатам колку сум напредувал беше да се вратам онаму каде што започнав со фудбалот. Сега кога сум дома сфатив колку сум напредувал".
Паралелно со фудбалот Кристофер одблиску ја запознава и земјата од каде што потекнува неговиот татко. Вели дека се чуствувал добро во Макеоднија а за првите впечатоци што ги забележал вели :
" Не е како во Австралија. Но јас, а особено мојот татко беше многу изненаден од позитивните промени што се случиле во меѓувреме. Начинот на живот се променил многу од она што ми раскажуваше мојот татко за Македонија."
На почетокот од престојот во Македонија проблем за младиот Кристофер претставувал и македонскиот јазик кој не го познавал на виско ниво. Сепак со помош на новите пријатели и особено неговата баба каде и престојува полека почнал да ги совладува и јазичните бариери. Покрај баба, вели Кристофер, секогаш е полесно и додава:
" По подолго време се видов со мојата баба која беше среќна што сум со неа. На почетокот не беше лесно. Таа не знае англиски а јас македонски. Но со бабите секогаш е лесно, ќе се разбереш лесно. Таа се грижеше за мене јас за неа. Ми го покажа Скопје и убавините на градот."
Кристофер ни раскажа дека како член на Вардар ги посетил скоро сите градови во Македонија. Ги запознал убавините на Македонија но и стекнал нови пријатели.
"Покрај фудбалот имав време и за дружење. Стекнав пријатели со кои ми беше задоволство да другарувам. Со нив го учев и македонскиот јазик , културата, традициите и обичаите. Во клубот имав можност да се запознам и разговарам со многу поранешни играчи и легенди на Вардар."
"Македонија секако ќе ми недостига. Ќе ми недостигаат тренизите, новите пријатели, лугето од клубот. Сега се чуствувам исто како кога ја напуштив Австралија . Престојот за мене во Вардар и Македонија беше големо фудбалско и животно искуство. Задоволство ми беше што имав можност одблиску да ја запознаам родната земја на мојот татко"- вели Кристофер
Кристофер ги открива и плановите за во иднина
"Сега сум во Австралија и во потрага по нов клуб. Искуството што го стекнав во Македонија и Вардар верувам дека ќе го искористам и да најдам клуб во НПЛ и секако да продолжам со фудбалот и еден ден со успех да ги бранам ударите на противничките играчи".
