Поважни факти
- По 17 години пауза повторно во НПЛ на Викторија.
- Освоено пето место и учество во финалната серија.
- На последните шест натпрвари постигнати исто толку победи без примен гол.
- Натпреварот против Saouth Melbourne од трибините го следеа над 9000 навивачи.
Сезоната во НПЛ на Викторија во фудбал за 2025 година со право може да се каже дека ја одбелжа Престон Македонија.
По 17 години пауза клубот се врати онаму каде што фудбалски припаѓа.
Пред почетокот на првенството, фудбалските стручњаци не им даваа некоја посериозна шанса за пласман во финалната серија, но лавовите од Резерво размислуваа поинаку.
На крајот од регуларниот дел на првенството завршија на 5-то место со освоени 47 бодови, иако со малку спортска среќа можеа да бидат и место погоре на табелата.
Успехот се должи на макотрпната работа на фудбалерите и стручниот штаб, предводен од Љупче Ацевски со сестрана подршка од управата на клубот и верните навивачи.
Тренерот Љупче Ацевски и пред почетокот на првенството најави борба за висок пласман, задоволен од своите играчи по тешката сезона.
Тренерот на Престон Лајонс, Љупче Ацевски Credit: Preston Lions FC Facebook
"Тешка сезона. Знаевме дека сите против нас ќе играат максимално ангажирано и да не победат, но фудбалерите го дадоа максимумот и целосно ја оправдаа довербата".
Во финалната серија Preston Lions ќе игра против Oakleigh Cannons за кој Ацевски вели дека е познат и тежок противник.
"Секако ќе биде тежок натпревар но на секој тренинг гледам кај моите фудбалери желба за победа и докажување и очекувам да дадат се од себе".
Напаѓачот Џонас Марковски, кој последните неколку натпревари ги одигра во врвна форма и постигна неколку голови, вели дека е задоволен од постигнатото во регуларниот дел од првенството.
Џонас Марковски со претседателот на клубот Дејвид Цветковски Credit: Preston Lions FC Facebook
"Шесте победи по ред се само потврда за нашата добра форма и ќе се обидеме да ја задржиме и во финалната серија но и во новото натпреварување Australian Championship"
Шесте победи по ред без примен гол не се случајност. Цврстата игра во одбраната, предводена од Метју Божиновски, вроди со плод. Божиновски очекува добрата игра да продолжи и против Oakleigh Cannons FC.
Метју Божиновски, ФК Престон Македонија Credit: Preston Lions FC: Facebook
"Очекувам успех но во исто време очекувам и голема подршка од верните навивачи и на крајот заедно да се радуваме"
Друштво во одбраната на Божиновски му правеше Џејк Трајковски за кого немаше загубена топка на секој од натпреварите.
Џејк Трајковски во дресот на Престон Македонија Credit: Preston Lions FC Facebook
"Очекувам да продолжиме со добрите игри како во финалната серија така и во Australian Championship. Со подршката од нашите верни и многубројни навивачи способни сме за нови успеси".
Десниот бек Стефан Нигро ги одигра сите натпревари во неговата прва сезона за Престон Македонија.
Стефан Нигро ги одигра сите 26 натпревари за Престон Македонија Credit: Preston Lions FC: Facebook
"Иако по долга пауза клубот повторно е во НПЛ за Викторија и со доста нови играчи направивме добар успех. Во добра форма сме и полни со самодоверба. Oakleigh Cannons FC е добар тим, но со подршка од неверојатните навивачи очекувам добра атмосфера и успех".
Навивачите на Престон Македонија се посебна приказна, бодрејќи ги своите миленици и оваа сезона, како на домашен така и на гостински терен.
На натпреварот против South Melbourne имаше и рекордни над 9.000 навивачи што е само потврда дека клубот е меѓу ретките во Австралија кои можат да се пофалат со вакви бројки.
Стефо Ристевски, кој е меѓу оние навивачи кои со години не пропуштат натпревар на Престон Македонија, вели дека така ќе продолжи и понатаму.
Стефо Ристевски навивач на Престон Македонија Credit: Preston Lions FC /Facebook
"Убеден сум дека ќе го победиме Oakleigh Cannons FC. Верувам во играчите и секако ќе ја имаат нашата подршка".
Голема благодарност до навивачите за подршката упатува и претседателот на клубот Дејвид Цветковски.
Претседателот Дејвид Цветковски заедно со потпретседателката на клубот Силвана Наумовски го претставуваат пехарот за Australian Championship Credit: Preston Lions FC: Facebook
"Тие се наш 13-ти играч. Со ваква подршка и навивачи се е можно. Подготвени сме за нови успеси и се надевам тоа ќе го потврдиме наскоро. Клубот е стабилен како никогаш досега и е подготвен дури и за влегување во А - лигата".
Престон Македонија кон средината на септември заминува на турнеја во Македонија на покана од македонската влада и ФФМ а потоа ги очекува настапот во Australian Championship.
Првиот натпревар од групната фаза го игра на 11 октомври против Spirit FC од НЈВ.
За повеќе прилози, интервјуа и информации од СБС на македонски, проверете ја нашата колекција на поткасти овде:
For more stories, interviews, and news from SBS Macedonian, explore our podcast collection here:
