ഫെഡറല് പാര്ലമെന്റ് തെരഞ്ഞെടുപ്പില് അപ്രതീക്ഷിത വിജയം നേടി 11 ദിവസത്തിനു ശേഷമാണ് സ്കോട്ട് മോറിസന് സര്ക്കാര് അധികാരമേറ്റത്. നാഷണല് പാര്ട്ടി നേതാവ് മൈക്കല് മക്കോര്മാക്ക് ഉപപ്രധാനമന്ത്രിയായും ചുമതലയേറ്റു.
ക്യാന്ബറയിലെ ഗവണ്മെന്റ് ഹൗസില് നടന്ന ചടങ്ങില് കുടുംബാംഗങ്ങള്ക്കൊപ്പമാണ് സ്കോട്ട് മോറിസനും മൈക്കല് മക്കോര്മാക്കും എത്തിയത്.
കഴിഞ്ഞ മന്ത്രിസഭയിലെ ഭൂരിഭാഗം അംഗങ്ങളെയും നിലനിര്ത്തിയപ്പോള്, ചില പുതുമുഖങ്ങളെ മന്ത്രിസഭയിലേക്ക് കൊണ്ടുവന്നിട്ടുണ്ട്.
ചരിത്രത്തില് ആദ്യമായി ഏഴ് വനിതകളെയും സ്കോട്ട് മോറിസന് മന്ത്രിസഭയില് ഉള്പ്പെടുത്തി.
ഇതാദ്യമായി ഒരു വനിതയെ കൃഷിമന്ത്രിയായി നിയമിച്ചതാണ് മന്ത്രിസഭയിലെ ഏറ്റവും ശ്രദ്ധേയമായ മാറ്റം. നാഷണല് പാര്ട്ടി ഉപനേതാവ് ബ്രിജറ്റ് മക്കന്സിയാണ് കൃഷിമന്ത്രി.
ആദിമവര്ഗ്ഗ വകുപ്പിന്റെ ചുമതല വഹിക്കാന് ഇതാദ്യമായി ഓസ്ട്രേലിയന് ആദിമവര്ഗ്ഗ വിഭാഗത്തില് നിന്നു തന്നെ മന്ത്രിയെ ഉള്പ്പെടുത്തി. കെന് വ്യാറ്റാണ് പുതിയ ആദിമവര്ഗ്ഗ മന്ത്രി.
പരമ്പരാഗത രീതിയിലുള്ള കങ്കാരൂ തോല് മേലുടുപ്പണിഞ്ഞാണ് കെന് വ്യാറ്റ് സത്യപ്രതിജ്ഞ ചെയ്തത്. ആദിമവര്ഗ്ഗ ഭാഷയില് 'ബൂക്ക' എന്നറിയപ്പെടുന്ന ഇത് വെസ്റ്റേണ് ഓസ്ട്രേലിയയിലെ നൂന്ഗാര് ആദിമവര്ഗ്ഗ വിഭാഗക്കാര് അദ്ദേഹത്തിന് സമ്മാനിച്ചതാണ്.
സാധാരണക്കാരായ ഓസ്ട്രേലിയക്കാരുടെ ആഗ്രഹങ്ങള് സഫലമാക്കാനാകും പുതിയ സര്ക്കാര് ശ്രമിക്കുകയെന്ന് കഴിഞ്ഞ ദിവസം ഭരണകക്ഷി എം പിമാരോട് സംസാരിക്കുമ്പോള് സ്കോട്ട് മോറിസന് പറഞ്ഞിരുന്നു. സര്ക്കാരിലെ ഒത്തൊരുമയും പ്രതിബദ്ധതയും ഉറപ്പാക്കുമെന്നും അദ്ദേഹം പറഞ്ഞു.
ജൂലൈ ആദ്യ വാരം 46ാം പാര്ലമെന്റിന്റെ ആദ്യ സമ്മേളനം ചേരും എന്നാണ് സൂചന.
