വിക്ടോറിയയിൽ കൊറോണവൈറസ് നിയന്ത്രണങ്ങളിൽ സംസ്ഥാന സർക്കാർ തിങ്കളാഴ്ച ഒന്നാം ഘട്ട ഇളവുകൾ പ്രഖ്യാപിച്ചിരുന്നു. ഇതിന് പിന്നാലെയാണ്, സ്കൂളുകൾ തുറന്ന് പ്രവർത്തിക്കുന്നത് സംബന്ധിച്ച തീരുമാനം ചൊവ്വാഴ്ച രാവിലെ പ്രീമിയർ ഡാനിയൽ ആൻഡ്രൂസ് പ്രഖ്യാപിച്ചത്.
പ്രെപ്, ഒന്നും രണ്ടും ക്ലാസ്സിലെ കുട്ടികൾ, 11,12 ക്ലാസ്സിലെ കുട്ടികൾ എന്നിവർക്ക് മെയ് 26 നു സ്കൂളിലേക്ക് മടങ്ങാം. സ്‌പെഷ്യൽ സ്കൂളുകളും മെയ് 26നു പ്രവർത്തനം ആരംഭിക്കും.
മൂന്ന് മുതൽ പത്ത് വരെയുള്ള ക്ലാസ്സുകളിലെ കുട്ടികൾക്ക് ജൂൺ ഒമ്പതിനാണ് സ്കൂളുകളിലേക്ക് തിരിച്ചെത്താവുന്നത്.
അതായത് ജൂൺ ഒമ്പതോടെ സംസ്ഥാനത്തെ എല്ലാ കുട്ടികൾക്കും സ്കൂളുകളിലെത്താം.
അതേസമയം അധ്യാപകർക്കിടയിൽ സാമൂഹിക അകലം പാലിക്കൽ നിർബന്ധമാണ്.
സ്കൂളുകളിൽ സാമൂഹിക അകലം പാലിക്കാനായി ഉച്ച ഉച്ചഭക്ഷണ സമയത്തിലും, ഡ്രോപ്പ് ഓഫ്- പിക്ക് അപ് സമയങ്ങളിലും മാറ്റങ്ങൾ വരുത്തും. അതാത് സ്കൂളുകൾക്ക് ഈ സമയങ്ങൾ തീരുമാനിക്കാം.
കുട്ടികൾ അവരുടെ വാട്ടർ ബോട്ടിലുകളിൽ നിന്നും വെള്ളം കുടിക്കണമെന്നും സ്കൂളുകളിലെ വാട്ടർ ഫൗണ്ടനിൽ നിന്നും വെള്ളം കുടിക്കാൻ അനുവാദം ഉണ്ടാകില്ലെന്നും വിദ്യാഭ്യാസ മന്ത്രി അറിയിച്ചു. മാത്രമല്ല സ്കൂൾ ക്യാമ്പുകൾ സംഘടിപ്പിക്കാനും അനുമതിയില്ല.
രോഗ ബാധ കണ്ടെത്തുന്ന സ്കൂളുകൾ ഒന്നോ രണ്ടോ ദിവസത്തേക്ക് അടയ്ക്കുകയും സ്കൂൾ വൃത്തിയാക്കുകയും ചെയ്യും.
കുട്ടികൾ സ്കൂളിലേക്ക് എത്തുന്നത് മുതൽ മൂന്നാം ടേം അവസാനിക്കും വരെ എല്ലാ ദിവസവും സ്കൂളുകൾ വൃത്തിയാക്കാനാണ് പദ്ധതിയെന്ന് വിദ്യാഭ്യാസ മന്ത്രി ജെയിംസ് മെർലിനോ വ്യക്തമാക്കി. രോഗ വ്യാപനം തടയാനാണിത്. ഇതിനായി 45 മില്യൺ ഡോളർ അധിക ഫണ്ട് അനുവദിച്ചിട്ടുണ്ടെന്നും ഡാനിയൽ ആൻഡ്രൂസ് പറഞ്ഞു.
ആരോഗ്യ സംബന്ധമായ പ്രശ്നങ്ങൾ ഉള്ള 65 വയസ്സിന് മേൽ പ്രായമായ സ്കൂൾ ജീവനക്കാർക്കും രോഗപ്രതിരോധശേഷികുറവുള്ള ജീവനക്കാർക്കും 50 വയസ്സിന് മുകളിൽ പ്രായമുള്ള ആദിമവർഗ്ഗക്കാർക്കും വീട്ടിലിരുന്ന് ജോലി ചെയ്യാൻ അവസരമുണ്ടാകുമെന്നും പ്രീമിയർ പറഞ്ഞു.
മെയ് പകുതിയോടെ രണ്ടാം ടേം ആരംഭിച്ചെങ്കിലും അവശ്യ സേവനങ്ങളിൽ ജോലി ചെയ്യുന്നവരുടെ കുട്ടികൾക്ക് മാത്രമാണ് സ്കൂളുകളിലേക്ക് എത്താവുന്നത്. മറ്റ് കുട്ടികൾ റിമോട്ട് ലേണിംഗിലൂടെയാണ് സ്കൂൾ പഠനം നടത്തുന്നത്. നിലവിൽ സംസ്ഥാനത്തെ 97 ശതമാനം കുട്ടികളും വീട്ടിലിരുന്നാണ് പഠിക്കുന്നത്.
ഓസ്ട്രേലിയയിൽ കൊറോണവൈറസ് പ്രതിസന്ധി രൂക്ഷമായതോടെ രണ്ടാം ടേം പൂർത്തിയാകുന്നതിന് മുൻപ് തന്നെ റിമോട്ട് ലേണിംഗ് ആരംഭിച്ച സംസ്ഥാനമാണ് വിക്ടോറിയ.
സ്കൂളുകൾ അടയ്‌ക്കേണ്ടതില്ല എന്ന ഫെഡറൽ സർക്കാർ നിർദ്ദേശത്തിന് വിരുദ്ധമായി വിക്ടോറിയയിൽ സ്കൂളുകൾ നേരത്തെ അടയ്ക്കാൻ സംസ്ഥാന സർക്കാർ തീരുമാനിക്കുകയായിരുന്നു.
മാർച്ച് അവസാനത്തോടെ റിമോട്ട് ലേണിംഗിലേക്ക് മാറിയ വിദ്യാഭ്യാസരീതിയാണ് ഇപ്പോഴും സംസ്ഥാനത്ത് തുടരുന്നത്.
മൂന്നാം ടേമിൽ മാത്രമേ കുട്ടികൾക്ക് സ്കൂളിലേക്ക് മടങ്ങാൻ കഴിയുകയുള്ളുവെന്നാണ് പ്രീമിയർ ഡാനിയേൽ ആൻഡ്രൂസ് നേരത്തെ അറിയിച്ചിരുന്നത്. എന്നാൽ രോഗബാധ കുറഞ്ഞ സാഹചര്യത്തിലാണ് കുട്ടികൾക്ക് നേരത്തെ സ്കൂളുകളിലേക്ക് മടങ്ങാമെന്ന് സർക്കാർ അറിയിച്ചിരിക്കുന്നത്.
മറ്റ് സംസ്ഥാനങ്ങളിൽ കുട്ടികൾ ഈയാഴ്ച മുതൽ സ്കൂളിലേക്ക് മടങ്ങിത്തുടങ്ങി.
People in Australia must stay at least 1.5 metres away from others. Check your state’s restrictions on gathering limits. Testing for coronavirus is now widely available across Australia.
If you are experiencing cold or flu symptoms, arrange a test by calling your doctor or contact the Coronavirus Health Information Hotline on 1800 020 080. The federal government's coronavirus tracing app COVIDSafe is available for download from your phone's app store.
SBS is committed to informing Australia’s diverse communities about the latest COVID-19 developments. News and information is available in 63 languages at sbs.com.au/coronavirus.
