१.'कृ’ फिल्म कहिलेबाट रिलिज हुँदैछ ? यस फिल्मको कथावस्तु कस्तो रहेको छ ?
आगामी माघ २६ बाट नेपालभरका विभिन्न हलहरुमा 'कृ’ फिल्म रिलिज हुँदैछ । नेपालबाहेक अमेरिका, अष्ट्रेलिया, जापान र कोरियामा पनि फिल्म रिलिज हुनेछन् । सुपर काजल फिल्म्स् र सुबास इन्टरटेनमेन्टको संयुक्त ब्यानर निर्माण भएको यो फिल्म एक्सन लभ स्टोरीमा आधारित रहेको छ।
२. अभिनेताको रुपमा स्थापित भइसक्नु भएको तपाई पछिल्लो समय फिल्म प्रोडक्सनमा सक्रिय भइरहनु भएको छ । फिल्ममा अभिनय गर्न दिक्क लागेर प्रोडक्सनतिर हात हाल्नुभएको हो ?
अहिले मेरो होम प्रोडक्सन सुपर काजल फिल्म्स्ले फिल्म निर्माणका सक्रिय भएर लागि परेको हुँदा अभिनयबाट ब्रेक लिएको हुँ । फेरि छोरा अनमोल केसीले फिल्महरुमा काम गरिरहेको हुँदा उनलाई सहयोग गरिरहेको छु । चाँडै बन्न लागेको नयाँ फिल्ममा अभिनय गर्नेछु ।
३.पछिल्लो समय कुन फिल्ममा देखिनु भएको थियो ?
करिव सात वर्षअघि निर्माण भएको 'साथी म तिम्रो’ फिल्ममा काम गरेपछि प्रोडक्सनतिर व्यस्त भएं । फ्यानहरुको लागि भएपनि फिल्ममा अभियन गर्नेछु ।
४.विभिन्न विधाका फिल्महरुमा काम गरिसक्नु भएको तपाईको ड्रिम रोलचाँहि कस्तो हो ?
मैले अभियन गरिरहेको भन्दा नयाँ शैली प्रस्तुत हुने योजनामा छु ।
५. फिल्म निर्देशनको रुपमा नेपाली फिल्म क्षेत्रमा आउँदैछु भनेर भन्नु भएको थियो । तपाई निर्देशन गर्ने भनिएको फिल्म कहिले निर्माण हुँदैछ ?
अहिले मेरो होम प्रोडक्सनबाट निर्माण हुन लागेको नेपाली फिल्म 'क्याप्टेन’को तयारीमा जुटेको छु । नेपाली फुटबल खेलाडीको राष्ट्र प्रेमको कथा बोकेको यो फिल्मको काम सिध्याएलगत्तै मैले निर्देशन गर्ने फिल्मको लागि व्यस्त हुनेछु ।
६.नेपाली फिल्म क्षेत्रमा तपाई र अभिनेत्री जिया केसीको नाम जोडिएर विभिन्न प्रकारका गसिपहरु आइरहेका हुन्छन् । वास्तवमा तपाईहरुको सम्बन्धचाँहि कस्तो हो ?
मिडियाले हाम्रो नाम जोडिदिएर केवल स्क्यान्डलमात्र बनाइदिएको छ । हामी मिल्ने साथी हौं । मिल्ने साथीहरुको भेटघाटलाई सामान्य रुपमा लिनसक्नुपर्छ ।
७.अभिनेता अनमोल केसीको क्रेज भएकाले फिल्म निर्माणमा सक्रिय हुनु भएको हो ?
उनले नेपाली फिल्म हेर्न हलमै नजाने दर्शकलाई हलसम्म आएर फिल्म हेर्न बाध्य पारेका छ । त्यसैले उनको क्रेज बढेको हुनुपर्छ । पछिल्लो समय उनले होम प्रोडक्सनबाट निर्माण भएका फिल्महरुमा व्यस्त भएका छन् ।
८.'कृ’ फिल्मको प्रमोसन सुस्त हुनुको कारण के हो ? अभिनेता अनमोल केसीको क्रेजका कारण फिल्म चलिहाल्छ भनेर कम प्रमोसन गरिएको हो कि?
फिल्म रिलिज हुन केही दिनमात्र बाँकी हुँदासम्म फिल्मको सुटिङ सकिएको थिएन् । यसको प्रमोसनको अवधीभर हामी सुटिङको लागि विदेशमा थियौं । सबै कुरा तोकिएको समयमा हुँदापनि काम सिध्याउन नपाउँदा प्रमोसन कम हुन पुगेको हो ।'
