As the 15th annual Kathmandu Mountain Film Festival gets underway in Nepal, festival's director Basanta Thapa spoke to SBS Nepali about some of their highlights.
काठमाडौं – हरेक वर्ष आयोजना हुने काठमाडौं अन्तर्रा्ष्ट्रिय माउन्टेन फिल्म फेस्टिभल (किम्फ) बिहीबारदेखि राजधानीको कुमारी हलमा सुरु हुँदैछ। यसै सेरोफेरोमा रहेर काठमाडौं अन्तर्रा्ष्ट्रिय माउन्टेन फिल्म फेस्टिभलका अध्यक्ष बसन्त थापासँग गरेको कुराकानी :
१. हरेक वर्ष आयोजना हुने काठमाडौं अन्तर्रा्ष्ट्रिय माउन्टेन फिल्म फेस्टिभल (किम्फ) कहिलेबाट सुरु हुँदैछ ? कुन फिल्मबाट यसपटकको किम्फको औपचारिक रुपमा सुरुवात हुँदैछ ?
काठमाडौं अन्तर्रा्ष्ट्रिय माउन्टेन फिल्म फेस्टिभल (किम्फ)को १५ औं संस्करण बिहीबार मंसिर २८ गतेबाट सुरु हुँदैछ। पाँच दिने महोत्सवमा यसपटक ३७ देशका डकुमेन्ट्री र सर्ट लगायत विधाका फिल्महरु देखाइने छन् । अन्तराष्ट्रिय प्रतिस्पर्धातर्फ १५ र गैर प्रतिस्पर्धामा ४८ फिल्म प्रदर्शन हुनेछन् भने नेपाल पानोरोमा अन्तर्गत यसपटक १५ फिल्महरु प्रदर्शन गरिनेछन् । किम्फ प्रिमियर ३५ मिनेटको ‘द लास्ट हनी हन्टर’ नामक फिल्मबाट हुनेछ। भोजपूरमा खिचिएको यस फिल्मलाई नेसनल जेयोग्राफीको सहकार्यमा बेन नाइट्लीले निर्देशन गरेका हुन्। त्यस्तै महोत्सवको समापन भने आगामी ३ गते भुटानका जोङसार जामयाङ खेन्चे रिम्पोचले निर्देशन गरेको ‘हेमा हेमास् सिङ मि अ सङ ह्वाइल आइ वेट’ देखाएर हुनेछ।
२.किम्फको विभिन्न विधामा उत्कृष्ट हुने विजेताहरुलाई के कस्तो पुरस्कारको व्यवस्था गरिएको छ ?
अन्तराष्ट्रिय प्रतियोगितातर्फ प्रथम हुनेले १५ हजार अमेरिकी डलर, दोस्रो हुनेलाई एक हजार डलर र तेस्रो हुनेलाई पाँच सय डलर प्राप्त गर्नेछन् । नेपाल पानोरोमामा भने फिक्सन र नन फिक्सन दुई विधाका विजेताहरुलाई भने क्रमशः ७५ हजार र ५० हजार नगद पुरस्कार प्रदान गरिनेछ । त्यसबाहेक दर्शकले मनपराएको एक फिल्मलाई अडियन्स अवार्ड दिनेछ । इसिमोड सदस्य मुलुकबाट छानिएको उत्कृष्ट फिल्मले एक हजार अमेरिकी डलर पाउनेछ ।
३.यसपटकको किम्फको जुरीहरु को को हुनुहुनेछ ?
यस पटक भारतीय फिल्ममेकर रीना मोहन, बान्फ माउन्टेन फिल्म फेस्टिभलका जोआना क्रोस्टन र नेपाली डकुमेन्ट्री फिल्म निर्देशक केसाङ छेतेनको जुरीले उत्कृष्ट फिल्महरु छनोट गर्नेछन् ।
४.हिमाल एसोसिएसनले किम्फको सुरुवातचाँहि कसरी गरेको थियो ? १५ औं संस्करणसम्म आइपुग्दाका के के कठिनाईहरु भोग्नुपर्यो ?
किम्फको सुरुवात सन् २००० देखि भएको हो । सुरुवातमा दुई वर्षको अन्तरातमा महोत्सवको आयोजना हुन्थ्यो । सुरुमा अनुभवविना काम गरेका थियौं । यसले निरन्तरता पाएकोमा हामीनै आश्चर्यमा छौं । अहिलेसम्म महोत्सव आर्थिक अभावमै गरिरहेका छौं । हामीले वार्षिक रुपमा कुनै किसिमको प्रायोजक भेटाएका छैनौं । युवा दर्शकहरुको साथले गर्दा हरेक वर्ष महोत्सव गर्न प्रोत्साहन गरिरहेको छ ।
५.अहिलेसम्म किम्फको उपलब्धीचाँहि के के रहे ?
हामीले युवा दर्शकको जमात भेटाएका छौं । किम्फमा देखाएने फिल्महरु हलमा नदेखाइने भएकाले दर्शकहरुले हरेक वर्ष दशैंझैं किम्फको प्रतिक्षा गरेर बस्छन् । त्यसबाहेक नयाँ फिल्महरु देखाएर युवाहरुलाई फिल्म क्षेत्रमा आउन प्रोत्साहित गरिरहेका छौं।
६.काठमाडौं अन्तर्रा्ष्ट्रिय माउन्टेन फिल्म फेस्टिभल सकिएलगत्तै सुरु हुने ‘घुम्ती किम्फ’ चाँहि के हो ?
महोत्सव सकिएपछि देशभरका विभिन्न स्थानमा उत्कृष्ट फिल्महरु देखाउने गरेका छौं । अहिलेसम्म देशभरका ५० वटा जिल्लामा 'घुम्ती किम्फ’पुगिसकेको छ । त्यसबाहेक नेपाली समुदायहरु बस्ने हङ्कङ , मकाऊ र न्यूयोर्क लगायत देशमा एकदिने फिल्म महोत्सवको आयोजना गरिरहेका छौं ।
७.यसपटकको किम्फमा फिल्म प्रदर्शनबाहेक अन्य के कस्ता गतिविधिहरु हुनेछन् ?
फिल्म प्रदर्शनबाहेक छलफल र प्रवचनका विभिन्न सेसन हुनेछन् । युवा फिल्ममेकरहरुलाई प्रोत्साहन गर्दै सुरु गरिएको किम्फ डक ल्यावले निरन्तरता पाएको छ । यसले युवालाई फिल्म बनाउन सहयोग गर्नेछ । त्यस्तै स्टोरी पिचिङ आइडियाको लागि लाइभ डक पिच नामक कार्यक्रमको सुरुवात गरेका छौं । नयाँ काम सुरु गर्न चाहने एक जनालाई विभिन्न पाँच जनाको जुरी टोलीले छनोट गर्नेछन् । उत्कृष्ट भएकालाई भने २ लाख प्रदान गरिनेछ ।
