پدې معلوماتي مرکه کې به دې سوالونو ته ځواب ومومئ:
ټولنیزې رسنۍ اوسمهال څومره کاروونکي لري او څه وخت یې په فعالیت پیل کړی؟
د آسټرالیا څومره اوسېدونکي خواله رسنۍ کاروي او په ځانګړې توګه د فیسبوک شبکې د کاروونکو شمېر څومره کسانو ته رسېږي؟
فیسبوک په یوه کال کې په سلهاوو میلیونه ډالره ګټه لري، د آسټرالیا حکومت له فیسبوک څخه څه غواړي او فیسبوک ولې په آسټرالیا کې د خبرونو خدمتونه بند کړي؟
که چېرې فیسبوک د تل لپاره د آسټرالیا رسنیو ته په فیسبوک کې د خبرونو خپرولو اجازه ور نکړي نو خلک بل څه انتخاب لري؟
ټولنیزې رسنۍ ډېر اوږد تاریخ نلري، مګر په ډېر لنډ وخت کې د خلکو د ژوند مهمه برخه ګرځېدلې ده.
د فرینډسټر او مای سپیس په نومونو شبکې لومړنۍ خواله رسنۍ وې چې په ۲۰۰۲ او ۲۰۰۳ کلونو کې یې په فعالیت پیل وکړ ترڅو خلک وکولای شي د دغو شبکو له لارې نوي ملګري پیدا کړي او له یو بل سره په اړیکه کې اوسي.
د ۲۰۰۴م کال په فبرورۍ میاشت کې د فیسبوک ټولنیزه شبکه د مارک زوکربرګ لخوا جوړه شوه.
په پیل کې یواځې د هارورډ پوهنتون زدکړیالانو ورڅخه استفاده کولای شوه، مګر د وخت په تېرېدلو سره عامو خلکو هم کولای شول ترڅو دغه شبکه وکاروي.
له فیسبوک وروسته په ۲۰۰۶ کال کې د ټویټر او په ۲۰۱۰ کال کې د انسټاګرام شبکو په فعالیت پیل وکړ.
نن ورځ د فیسبوک، ټویټر، انسټاګرام او سنپ چټ ترڅنګ، د نړۍ اوسېدونکي یو زیات شمېر نورې خواله رسنۍ کاروي.
خپرې شوې شمېرې ښيي چې په ۲۰۲۰ کال کې، ۳.۶ میلیارده کسانو ټولنیزې رسنۍ کارولې.
د فیسبوک خواله رسنۍ تر ټولو زیات کارونکي لري چې شمېر یې شاوخوا ۲.۶ ملیارده کسانو ته رسېږي. اټکل کېږي چې تر ۲۰۲۵ کال پورې به د ټولنیزو شبکو د کارونکو شمېر ۴ .۴ میلیارده کسانو ته ورسېږي.
دا او نور مهم معلومات دلته واورئ.
