د آسټرالیا د بهرنیو چارو وزیرې پيني وانګ، په قطر کې د حماس پر مشرانو د اسراییلو هوایي بریدونه غندلي او ویلې یې دي چې دا بریدونه به "په څرګنده توګه د سولې تړون ته د رسېدو هڅې لا ستونزمنې کړي".
د اسراییلو بریدونه د قطر په پلازمېنه دوحه کې د حماس پر یوه مرکز ترسره شوي چې په پایله کې یې د حماس پنځه غړي او د قطر یو امنیتي افسر وژل شوی دی.
د اسراییلو او حماس ترمنځ د سولې د تړون او د یرغمل شویو کسانو د خوشې کولو لپاره خبرې اترې ډیری وختونه د قطر په خلیجي هېواد کې ترسره کېږي.
اغلې وانګ ویلي چې په قطر کې دغه بریدونه به یادې هڅې له خطر سره مخ کړي.
هغې نن سهار د اې بي سي شبکې سهارنۍ خپرونې کې ویلي:
"د آسټرالیا حکومت باور لري چې دا کار ناسمه پرېکړه وه. لکه څنګه چې تاسو پوهېږئ، قطر د اوربند د ژر تر ژره ټینګېدو د هڅه کوونکو له ډلې څخه دی. دغه هېواد د برمته شویو کسانو د بېرته ستنولو لپاره له امریکا سره کار کوي."
"دا د قطر د حاکمیت سرغړونه ده. دا د اوربند په اړه روانې هڅې له خطر سره مخ کوي او د شخړې د زیاتېدو امکان رامنځته کوي."
وانګ زیاته کړه چې آسټرالیا د اسراییل او حماس ترمنځ د شخړې د پای ته رسولو په برخه کې محدود توان لري، خو لا هم له نورو هېوادونو سره په ګډه د سولې لپاره هڅې کوي.
"موږ نشو کولی جګړه پای ته ورسوو. هغه څه چې موږ یې کولی شو، د اوربند غوښتنې ملاتړ کول دي او د امریکا او نورو د هڅو ملاتړ چې د اوربند د منځګړیتوب لپاره کوي."
د اس بي اس پښتو خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
