د آسټرالیا د پوځ پخواني سرتیري، بین رابرټس سمیت د فدرال محکمې د قاضي د تېر کال حکم ننګولی دی، ټاکل شوې چې د ۱۰ ورځو په مودې کې درې قاضیان د هغه د وکیلانو لخوا پراخ دلیلونه واوري.
د نوموړي د استیناف اورېدنه به د دوشنبې په ورځ پیل شي ځکه بدنام شوی جنګی تجربه کار یوځل بیا د خپل شهرت د بېرته جوړولو هڅه کوي.
دغه ۴۵ کلن پخوانی سرتیری د تیر کال د جون په میاشت کې د فدرالي محکمې د قاضي موندنې ننګوي چې په رپوټونو کې شوې ادعا یې رښتیا بللې وه. په رپوټونو کې ادعا شوې چې هغه په افغانستان کې د څلور زندانیانو په غیر قانوني وژنه کې مسئول او ښکیل وو.
بین رابرټس سمیت د ۲۰۰۶ او ۲۰۱۲ کلونو ترمنځ، شپږ ځله افغانستان ته د وظیفې لپاره استول شوی.
نوموړي په افغانستان کې د آسټرالیا له ځانګړو ځواکونو (SAS) سره دنده ترسره کړې.
په افغانستان کې له پنځم پوځي ماموریت وروسته، نوموړي ته د آسترالیا تر ټولو لوړ پوځی مډال (ویکتوریا کراس) ورکړل شوی.
د سیډني مارنینګ هیرالډ، ایج او کنبرا ټایمز ورځپاڼو په ۲۰۱۸ کال کې په یو لړ راپورونو کې تور لګولی وه چې رابرټس سمت، د ۲۰۰۹ او ۲۰۱۲ کلونو ترمنځ په افغانستان کې جنګي جنایتونه ترسره کړي.
په افغانستان کې د جنګي جرمونو له تورونو وروسته هغه د دریو ورځپاڼو او دریو ژورنالیستانو خلاف د بدنامۍ قضیه ثبت کړې وه.
د ۲۰۲۳ کال د جون په لومړی نېټه، د رابرټس سمېټ د قضیې قاضی انتوني بیسانکو د قضیې په اړه خپله پریکړه صادره کړه، او ویې ویل چې د هغه پر وړاندې تورونه "ښه بنسټیز" دي.
ټاکل شوې چې د نوموړي د استیناف اورېدنه به د دوشنبې په ورځ پیل شي.
ښاغلی رابرټس سمیت تر دې دمه په افغانستان کې د خپلو کړنو لپاره په کوم جنايي جرم نه دی محکوم شوی او وايي چې بې ګناه دی.
که چېرې دغه قانوني ننګونه ناکامه شي، نو بین رابرټس سمیت او په سیون شبکې کې د هغه تمویل کونکي په شمول دې میلیاردر کیري سټوکس به، د لسګونو ملیونو ډالرو قانوني لګښتونو سره مخ شي.
شریکول
